ଆସନ୍ତା କିଛି ବର୍ଷରେ ପେଟ୍ରୋଲ, ଡିଜେଲ ଦର ୧୨୦ ଟଙ୍କା ଟପିବ, କାହିଁକି ଜାଣନ୍ତୁ

0 380

ଲଣ୍ଡନ : ବିଶ୍ୱ ବଜାରରେ ବଢିଚାଲିଥିବା ତେଲ ଦର ସାମୟିକ ଭାବେ ନିୟନ୍ତ୍ରଣରେ ରହିଛି । ଓପେକ ଦେଶ ସମୁହ ଉତ୍ପାଦନ ଦିନକୁ ୧୦ ଲକ୍ଷ ବ୍ୟାରେଲ ବଢାଇବାକୁ ରାଜି ହେବାରୁ ଏହା ସମ୍ଭବ ହୋଇପାରିଛି । କିନ୍ତୁ ବିଶେଷଜ୍ଞମାନଙ୍କ ମତରେ ଆଗାମୀ ଦିନରେ ତେଲଦର ବଢିଚାଲିବ । ଏପରିକି କିଛି ବର୍ଷ ପରେ ତେଲ ବ୍ୟାରେଲ ପିଛା ୧୫୦ ଡଲାର ଟପିବା ଅସମ୍ଭବ ନୁହେଁ । ତୈଳ ବଜାର ବିଶେଷଜ୍ଞ ନୀଲ ବେଭରିଜ୍‌ଙ୍କ ମତରେ ବିଶ୍ୱରେ ତେଲ ଚାହିଦା ବଢିଚାଲିଥିବାବେଳେ ନୂଆ ନୂଆ ତୈଳ ବ୍ଲକ ସନ୍ଧାନ ଲାଗି ବିଶ୍ୱର ପ୍ରମୁଖ ତୈଳ କମ୍ପାନିମାନେ ନିବେଶ ହ୍ରାସ କରିଛନ୍ତି । ଏଥିଲାଗି ୨୦୦୦ ମସିହା ତୁଳନାରେ ଏବେ ବିଶ୍ୱରେ ପ୍ରମାଣିତ ତୈଳ ଭଣ୍ଡାର ପରିମାଣ ୩୦ ପ୍ରତିଶତ ହ୍ରାସ ପାଇଛି । ଆହୁରି ଚିନ୍ତାର ବିଷୟ ହେଉଛି ଅର୍ଥନୈତିକ ଉନ୍ନତି ସହ ଆଗାମୀ ଦଶକରେ ଏସିଆର ଆଉ ପ୍ରାୟ ୧୦୦ କୋଟି ଲୋକ ସହରରେ ରହିବା ଆରମ୍ଭ କରିଥିବେ । ଏହା ଫଳରେ କାର ଓ ଅନ୍ୟାନ୍ୟ ଯାନବାହାନର ଚାହିଦା ବଢିବ, ବିମାନଯାତ୍ରା ବଢିବ । ଏହା ଦ୍ୱାରା ତେଲ ଚାହିଦା ବଢିବ । କିନ୍ତୁ ନୂଆ ତୈଳ ବ୍ଲକ ଆବିଷ୍କାର ହେଉନଥିବାରୁ ଉତ୍ପାଦନ କମିବା ସହ ଦର ଆକାଶଛୁଆଁ ହେବ । ତେଲ ବ୍ୟାରେଲ ପିଛା ୧୫୦ ଡଲାର ଟପିଲେ ଆମ ଦେଶରେ ପେଟ୍ରୋଲ, ଡିଜେଲ ଦର ୧୨୦ ଟଙ୍କା ଟପିବା ଅସମ୍ଭବ ନୁହେଁ ।

ସମ୍ବନ୍ଧିତ ଖବର

Leave A Reply

Your email address will not be published.