ବର୍ଓ୍ଵାନି : ମଧ୍ୟପ୍ରଦେଶର ବର୍ଓ୍ଵାନୀରେ ପରିବାର ଲୋକେ ନିଜ ଝିଅକୁ ହତ୍ୟା କରିଥିବା ଅଭିଯୋଗ ହୋଇଛି । ଅସୁସ୍ଥ ମା’କୁ ଦେଖିବାକୁ ଆସିବା ପାଇଁ କହି ଝିଅ ଘରକୁ ଆସିବା ପରେ ପରିବାର ଲୋକେ ମିଶି ତାଙ୍କୁ ହତ୍ୟା କରିଥିବା ଜଣା ପଡ଼ିଛି । ପୀଡ଼ିତା ଜଣଙ୍କ ଅନ୍ୟ ସଂପ୍ରଦାୟର ପୁଅକୁ ଭଲ ପାଇବା ସହ ଘରର ବିପକ୍ଷରେ ଯାଇ ତାକୁ ବିବାହ କରିଥିବାରୁ ଏହି ହତ୍ୟା କରାଯାଇଥିବା ପୁଲିସ ସୂଚନା ଦେଇଛି । ଏ ନେଇ ପୁଲିସ ମୃତ ମହିଳାଙ୍କ ବାପାଙ୍କୁ ଗିରଫ କରିଥିବା ବେଳେ ତାଙ୍କ ମା’ ଏବଂ ଭାଇ ଫେରାର ଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୂତାବକ, ସର୍ଲା ମଲ୍ଲୀ ବର୍ଷେ ପୂର୍ବେ ଘରର ବିରୋଧରେ ଯାଇ ଅନ୍ୟ ସଂପ୍ରଦାୟର ଯୁବକ ପଙ୍କଜ ମଲ୍ଲୀଙ୍କୁ ବିବାହ କରିଥିଲେ । ସର୍ଲାଙ୍କ ବିବାହକୁ ବର୍ଷେ ପୂରି ଯାଇଥିଲେ ମଧ୍ୟ ପରିବାର ଲୋକେ ତାଙ୍କୁ କ୍ଷମା କରି ପାରି ନଥିଲେ । ଏଥି ପାଇଁ ସର୍ଲାଙ୍କ ଭାଇ ଗତ ରାତିରେ ମା’ଙ୍କ ଦେହ ଖରାପ ଅଛି କହି ସର୍ଲାଙ୍କ ଘରକୁ ନେଇ ଆସିଥିଲେ । ଘରେ ପହଞ୍ଚିବା ପରେ ଆଜି ସକାଳେ ବିବାହ କଥାକୁ ନେଇ ଝଗଡ଼ା ହୋଇଥିବା ବେଳେ ପରିବାର ଲୋକେ ଏକ ଧାରୁଆ ଅସ୍ତ୍ରରେ ସର୍ଲାଙ୍କୁ ହତ୍ୟା କରିଥିଲେ ବୋଲି ପୁଲିସ ସୂଚନା ଦେଇଛି । ଅନ୍ୟ ପକ୍ଷରେ ଏହି ଘଟଣା ସାମ୍ନାକୁ ଆସିବା ପରେ ପୁଲିସ ଅଭିଯୁକ୍ତ ବାପା ଦେବୀଦାସ କୋଲି(୫୫)ଙ୍କୁ ଗିରଫ କରିଥିବା ବେଳେ ଫେରାର ଥିବା ମା’ ଏବଂ ଭାଇଙ୍କୁ ଖୋଜିବା ଆରମ୍ଭ କରିଛି ପୁଲିସ ।