ଅହମଦାବାଦ: କୁହାଯାଏ ଶିକ୍ଷାଗ୍ରହଣ ମଣିଷକୁ ଜୀବନ ବଢ଼ିବାରେ ନୂଆ ଦିଗ ଦେଇଥାଏ | ତେବେ ଯେଉଁ ପିଲାମାନେ ଆର୍ଥିକ କ୍ଷେତ୍ରରେ ସେତେଟା ସ୍ଵଛଳ ନଥାନ୍ତି ସେମାନେ ବେସରକାରୀ ବିଦ୍ୟାଳୟମାନଙ୍କରେ ପାଠ ପଢ଼ିପାରିନଥାନ୍ତି | ସେହିପରି ପିଲାମାନଙ୍କ ଅଭିଭାବକମାନେ ମଧ୍ୟ ପିଲାମାନଙ୍କୁ ବିଦ୍ୟାଳୟକୁ ପଠାଇପାରିନଥାନ୍ତି | ଏସବୁକୁ ଦେଖି ଅହମଦାବାଦ ଟ୍ରାଫିକ ପୁଲିସ ପକ୍ଷରୁ ନିଆଯାଇଛି ଏକ ସୁନ୍ଦର ପଦକ୍ଷେପ | ଫୁଟପାଥରେ ରହୁଥିବା ପିଲାମାନଙ୍କୁ ଶିକ୍ଷାଦାନ ଦେବା କାମରେ ଏବେ ଲାଗିପଡିଛନ୍ତି ପୁଲିସ ଅଧିକାରୀ |
Sambad is now on WhatsApp
Join and get latest news updates delivered to you via WhatsApp
ପୁଲିସ ପାଠଶାଳା ନାମରେ ନାମିତ ଏହି ନୂଆ ଯୋଜନା ମାଧ୍ୟମରେ ପ୍ରାୟ ୧୫୦ରୁ ୨୦୦ ଜଣ ପିଲାଙ୍କୁ ନିୟମିତ ଶିକ୍ଷାଦାନ ଦିଆଯାଉଛି | ସମ୍ପୂର୍ଣ୍ଣ ମୁକ୍ତ ଭବରେ ସହରର ୩ଟି କେନ୍ଦ୍ରରେ ପିଲାମାନଙ୍କୁ ଟ୍ରାଫିକ ପୁଲିସର ଅଧିକାରୀମାନେ ପାଠ ପଢ଼ାଉଛନ୍ତି | ଏହାକୁ ନେଇ ଅହମଦାବାଦର ଟ୍ରାଫିକ ଏସିପି ଆକାଶ ପଟେଲ କୁହନ୍ତି ଯେ ଦେଢ଼ ବର୍ଷ ତଳୁ ଏହି କାର୍ଯ୍ୟକ୍ରମକୁ ଆରମ୍ଭ କରାଯାଇଥିଲା |
ଫୁଟପାଥରେ ରହୁଥିବା ପିଲାମାନେ ବେଳେବେଳେ ଅପରାଧ ସହ ସମ୍ପୃକ୍ତି ରହୁଥିବାର ଦେଖି ସେମାନଙ୍କୁ ଶିକ୍ଷାଦାନ କରାଯିବାର ନିଷ୍ପତ୍ତି ନିଆଯାଇଥିଲା | ପିଲାମାନଙ୍କୁ ଶିକ୍ଷା ପ୍ରତି ଆଗ୍ରହ ସୃଷ୍ଟି କରାଯାଉଛି ଓ କିଭଳି ସୁନାଗରିକ ହୋଇପାରିବେ ତାହା ବୁଝାଯାଉଛି |