ଭୁବନେଶ୍ୱର : ଓଡ଼ିଶାର ଖଣି ଓ ଶିଳ୍ପ କ୍ଷେତ୍ରରେ ବ୍ୟାପକ ସମ୍ଭାବନା ରହିଛି । ଏ କ୍ଷେତ୍ରରେ ଅଷ୍ଟ୍ରେଲିଆର ଅନେକ ଅଭିଜ୍ଞତା ଥିବାରୁ ଓଡ଼ିଶା ତାହାର ସୁଯୋଗ ନେଇପାରିବ । ଏହା ଛଡା ଖଣି ଉପକରଣ,ଶିକ୍ଷା ଓ ଦକ୍ଷତା ବିକାଶ କ୍ଷେତ୍ରରେ ମଧ୍ୟ ଓଡ଼ିଶା ଆଗାମୀ ଦିନରେ ଅଷ୍ଟ୍ରେଲିଆ ପାଇଁ ଏକ ଫୋକସ ବା ଅଗ୍ରାଧିକାର ରାଜ୍ୟରେ ପରିଣତ ହେବ ବୋଲି କହିଛନ୍ତି କୋଲକତାରେ ଥିବା ଅଷ୍ଟ୍ରେଲୀୟ କନସୁଲେଟ୍ ଜେନେରାଲ ଆଣ୍ଡ୍ର୍ୟୁ ଫୋର୍ଡ କହିଛନ୍ତି ।
ଏକ ଦିନିକିଆ ଓଡ଼ିଶା ଗସ୍ତରେ ଆସିଥିବା ଫୋର୍ଡ କହିଛନ୍ତି ଯେ ଚୀନ ଏବେ ଅଷ୍ଟ୍ରେଲିଆର ବୃହତ୍ତମ ବାଣିଜ୍ୟ ସହଯୋଗୀ ରହିଛି । ଚୀନ ପଛକୁ ଜାପାନ, ଆମେରିକା ଓ ଭାରତ ରହିଛନ୍ତି । ଭାରତ ସହ ଅଷ୍ଟ୍ରେଲିଆର ହେଉଥିବା ବାଣିଜ୍ୟ କାରବାରର ଏକ ବଡ଼ ଭାଗ କୋଇଲା ଅଧିକାର କରିଛି । ଭାରତ ନିଜର କୋକିଂ କୋଲ ଆବଶ୍ୟକତାର ଆଧିକାଂଶ ଭାଗ ଅଷ୍ଟ୍ରେଲିଆରୁ ଆମଦାନୀ କରେ । ଓଡ଼ିଶା ଭାରତର ଇସ୍ପାତ ରାଜଧାନୀ ହୋଇଥିବାରୁ ଓଡ଼ିଶାକୁ ଅଷ୍ଟ୍ରେଲିଆରୁ କୋକିଂ କୋଲ ଆମଦାନୀ ହୋଇ ଆସିଥାଏ ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶାରେ ଚାଲିଥିବା ଖଣି ନିଲାମରେ କୌଣସି ଅଷ୍ଟ୍ରେଲୀୟ କମ୍ପାନି ଭାଗ ନେଇଛନ୍ତି କି ନା, ସେପ୍ରଶ୍ନର ଉତ୍ତରରେ ସେ କହିଛନ୍ତି ଯେ ଏହି ନିଲାମରେ କୌଣସି ଅଷ୍ଟ୍ରେଲୀୟ କମ୍ପାନି ଭାଗ ନେଇଥିବାର ସୂଚନା ନାହିଁ । ତେବେ ଖଣିଜ ଅନେ୍ଵଷଣ ବା ଏକ୍ସପ୍ଲୋରେସନ କ୍ଷେତ୍ରରେ ଭାରତ ସରକାରଙ୍କ ରାଷ୍ଟ୍ରାୟତ ମିନେରାଲ ଏକ୍ସପ୍ଲୋରେସନ କର୍ପୋରେସନ ( ଏମଇସିଆଇଏଲ) ଅଷ୍ଟ୍ରେଲିଆର ଖଣିଜ ସନ୍ଧାନ ସଂସ୍ଥା ସହ ସହଯୋଗୀତା କରିଛି । ସୂଚନାଯୋଗ୍ୟ ଯେ ଭାରତ ସରକାର ନିଜର ସଂଶେଧିତ ଖଣି ଆଇନରେ ବିଦେଶୀ କମ୍ପାନିମାନଙ୍କୁ ଖଣିଜ ସଂଧାନ କ୍ଷେତ୍ରରେ ପ୍ରବେଶ କରିବାର ପଥ ଖୋଲିଦେଇଛନ୍ତି ।
ସେ କହିଛନ୍ତି ଯେ ଆସନ୍ତା ୨୦୩୫ ସୁଦ୍ଧା ଭାରତରେ ଅଷ୍ଟ୍ରେଲିଆର ନିବେଶ ପରିମାଣ ୧୦୦ ବିଲିୟନ ଅଷ୍ଟ୍ରେଲିଆ ଡଲାରରେ ପହଞ୍ଚିବ । ଏସବୁ ନିବେଶ ପାଇଁ ୧୦ଟି ଅଗ୍ରାଧିକାର କ୍ଷେତ୍ର ଚୟନ କରାଯାଇଛି । ଏସବୁ କ୍ଷେତ୍ର ମଧ୍ୟରେ ରହିଛି ଶିକ୍ଷା, କୃଷିବ୍ୟବସାୟ, ସମ୍ବଳ (ଖଣିଜ ସାମଗ୍ରୀ ଇତ୍ୟାଦି), ପର୍ଯ୍ୟଟନ,ଶକ୍ତି, ସ୍ୱାସ୍ଥ୍ୟ ସେବା, ଭିତ୍ତିଭୂମି, ବନ୍ଦର ଇତ୍ୟାଦି ।