ଗୁଜୁରାଟରୁ ଫେରୁ ଫେରୁ କେଜ୍ରିୱାଲଙ୍କ ସାଥ ଛାଡି ବିଜେପିରେ ସାମିଲ ହୋଇଗଲେ ଆପର ଶତାଧିକ ନେତା
ଅହମ୍ମଦାବାଦ: ଗୁଜୁରାଟରେ ଆମ୍ ଆଦମୀ ପାର୍ଟିକୁ ଏକ ବଡ ଝଟକା ଲାଗିଛି | ମିଳିଥିବା ସୂଚନା ମୁତାବକ ଦଳର ପ୍ରାୟ ୧୫୦ ଜଣ ନେତା ଓ କର୍ମୀ ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି। କେବଳ ଆପ ନୁହେଁ ବରଂ ଏହି ସମୟ ମଧ୍ୟରେ କଂଗ୍ରେସ ମଧ୍ୟ କ୍ଷତି ସହିଛି। ଦଳର ଅନେକ ସଦସ୍ୟ ବିଜେପିରେ ଯୋଗଦେବାକୁ ନିଷ୍ପତ୍ତି ନେଇଛନ୍ତି। ବିଶେଷ କଥା ହେଉଛି ଯେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଓ ପଞ୍ଜାବର ମୁଖ୍ୟମନ୍ତ୍ରୀ ଭଗବନ୍ତ ମାନ ଗୁଜୁରାଟ ଗସ୍ତ ସାରି ଫେରୁଫେରୁ ଏତେ ସଂଖ୍ୟକ ଆପ ନେତା ନିଜ ଦଳ ବଦଳାଇ ଦେଇଛନ୍ତି। ଏହାକୁ ନେଇ ଗୁଜୁରାଟ ବିଜେପିର ସାଧାରଣ ସମ୍ପାଦକ ପ୍ରଦୀପସିଂହ ବାଘେଲା କହିଛନ୍ତି, “ଦିଲ୍ଲୀର ମୁଖ୍ୟମନ୍ତ୍ରୀ ଏବଂ ପଞ୍ଜାବର ମୁଖ୍ୟମନ୍ତ୍ରୀ ଘରେ ନ ପହଞ୍ଚୁଣୁ ତାଙ୍କ ଦଳର ଅନେକ ସଦସ୍ୟ ବିଜେପିରେ ଯୋଗ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହା ସ୍ପଷ୍ଟ ଭାବରେ ଦର୍ଶାଉଛି ଯେ ସେମାନେ ଗୁଜୁରାଟର ଲୋକଙ୍କୁ ବୋକା ବନାଇ ପାରିବେ ନାହିଁ। ତାଙ୍କର ଗୁଜୁରାଟ ଗସ୍ତର କୌଣସି ଅର୍ଥ ନାହିଁ। ଗୁଜୁରାଟବାସୀଙ୍କ ଆଶୀର୍ବାଦ ବିଜେପି ଉପରେ ଅଛି। ନୂତନ ନେତାମାନଙ୍କୁ ଦଳକୁ ସ୍ୱାଗତ କରି ବାଘେଲା କହିଛନ୍ତି, ଆଜି ଆପଣ ଆପ ଏବଂ କଂଗ୍ରେସ ଛାଡିଛନ୍ତି। ସେମାନେ କହିବେ ଯେ ତୁମେମାନେ ଅଦରକାରୀ ଥିଲ | କିନ୍ତୁ, ମୁଁ କହିବାକୁ ଚାହେଁ ଗୁଜୁରାଟର ବିକାଶ ପାଇଁ ଆପଣମାନେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ |
ସୂଚନା ଥାଉ କି ଦୁଇ ଦିନ ତଳେ ଗୁଜୁରାଟ ଗସ୍ତରେ ଯାଇ କେଜ୍ରିୱାଲ ଏବଂ ମାନ ରୋଡ ସୋରେ ଭାଗ ନେଇଥିଲେ। ଏହା ସହିତ ଦୁହେଁ ସାବରମତୀ ଆଶ୍ରମ ପରିସରସ୍ଥିତ ମହାତ୍ମା ଗାନ୍ଧୀ ରହୁଥିବା ସ୍ଥାନ ‘ହୃଦୟକୁଞ୍ଜ’କୁ ମଧ୍ୟ ଯାଇଥିଲେ | ଏହା ବ୍ୟତୀତ କେଜ୍ରିୱାଲ ଦଳର କର୍ମୀ ଏବଂ ଅନ୍ୟ ନେତାଙ୍କ ସହ ବୈଠକ କରିଥିଲେ। ଚଳିତ ବର୍ଷ ଶେଷ ଆଡ଼କୁ ଗୁଜରାଟରେ ବିଧାନସଭା ନିର୍ବାଚନ ଥିବାରୁ ସେଠାରେ କ୍ଷେତ୍ର ପ୍ରସ୍ତୁତି ନିମନ୍ତେ ଉଦ୍ୟମ କରିବା ଲାଗି ଦୁହେଁ ଅହମ୍ମଦାବାଦ ଯାଇଥିବା ଚର୍ଚ୍ଚା ହୋଇଥିଲା |