ନୂଆଦିଲ୍ଲୀ : ସାମରିକ ଓ କୂଟନୈତିକ କ୍ଷେତ୍ରରେ ଭାରତ ଓ ଚୀନ ମଧ୍ୟରେ ସଂପର୍କ ଦିନକୁ ଦିନ ଖରାପ ହେଉଛି । ଅନ୍ୟପକ୍ଷରେ ଭାରତ ଓ ଆମେରିକା ମଧ୍ୟରେ ସମ୍ପର୍କ ନିବିଡ଼ ହେଉଛି । କିନ୍ତୁ ବାଣିଜ୍ୟ କଥା କହିଲେ ଠିକ ଏହାର ବିପରୀତ ଘଟୁଛି । ବାଣିଜ୍ୟ କ୍ଷେତ୍ରରେ ଭାରତ ଓ ଆମେରିକା ମଧ୍ୟରେ ଏବେ ସମ୍ପର୍କ ଭଲ ନାହିଁ । ବାଣିଜ୍ୟ କାରବାର କ୍ଷେତ୍ରରେ ଉଭୟ ଚୀନ ଓ ଭାରତ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ବିଷଦୃଷ୍ଟିରେ ପଡିଛନ୍ତି । କିନ୍ତୁ ଏହି ମୌକାରେ ଭାରତ ଓ ଚୀନ ପରସ୍ପରର ନିକଟତର ହେଉଛନ୍ତି । ଗତକାଲି ଭାରତ ଗସ୍ତରେ ଆସିଥିବା ଚୀନ ବାଣିଜ୍ୟ ମନ୍ତ୍ରୀ ଝଙ୍ଗ ସାନ କହିଛନ୍ତି ଯେ ଭାରତ ସହ ଚୀନର ବୃହତ ବାଣିଜ୍ୟ ନିଅଣ୍ଟକୁ କମାଇବାକୁ ହେବ ।
ଶାନ ଚୀନରେ ଭାରତୀୟ ନିବେଶକୁ ସ୍ୱାଗତ କରିଥିଲେ ଏବଂ ଦୁଇ ଦେଶ ମଧ୍ୟରେ ବ୍ୟବସାୟିକ କ୍ଷତି ସମସ୍ୟାର ସମାଧାନ ବାହାର କରିବା ପାଇଁ ସହମତି ଦେଇଥିଲେ । ସେ ଦ୍ୱିପାକ୍ଷିକ ବ୍ୟବସାୟିକ ସମ୍ବନ୍ଧ, କାର୍ଯ୍ୟ ଯୋଜନା ପ୍ରସ୍ତୁତି, ବ୍ୟାପକ ଆର୍ଥିକ ସହଯୋଗ (RCEP) ଉପରେ ଆହୁରି ଅଧିକ ଫୋକସ ତଥା ଇ-ଡାଇଲଗ ଭଳି ବିଷୟ ଉପରେ ହୋଇଥିବା ବିଚାର ବିମର୍ଶ ସମ୍ବନ୍ଧରେ ଉଲ୍ଲେଖ କରିଥିଲେ । ମି. ଝଙ୍ଗ ଶାନ କହିଥିଲେ ଯେ ଭାରତ ସହିତ ବ୍ୟବସାୟିକ ସମ୍ବନ୍ଧ ଉପରେ ସ୍ପଷ୍ଟ ଏବଂ ଆବଶ୍ୟକୀୟ ବିଚାର-ବିମର୍ଶ କରାଯିବା ଫଳରେ କେବଳ ଦୁଇ ଦେଶର ନୁହେଁ ବରଂ ସମଗ୍ର କ୍ଷେତ୍ରରେ ବିକାଶକୁ ଗତି ମିଳିବ ।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ ଭାରତର ବାଣିଜ ମନ୍ତ୍ରୀ ସୁରେଶ ପ୍ରଭୁ କହିଥିଲେ ଯେ ଭାରତ ଏବଂ ଚୀନ ମଧ୍ୟରେ ସବୁଠାରୁ ପୁରୁଣା ଓ ସର୍ବାଧିକ ମହତ୍ୱପୂର୍ଣ୍ଣ ଯୋଗାଯୋଗ ବ୍ୟବସ୍ଥା ରହିଛି । ବୈଠକରେ ସର୍ବାଧିକ ମହତ୍ୱପୂର୍ଣ୍ଣ ବିଷୟ ଚୀନ ସହିତ ଭାରତର ବ୍ୟବସାୟିକ ଅସନ୍ତୁଳନ ସମ୍ବନ୍ଧରେ ବିଚାର କରାଯିବ । ଶ୍ରୀ ସୁରେଶ ପ୍ରଭୁ ଚୀନର ବାଣିଜ୍ୟ ମନ୍ତ୍ରୀଙ୍କୁ ରେପସିଡ, ସୋୟାବିନ, ବାସୁମତି ତଥା ଅଣ ବାସୁବତି ଚାଉଳ, ଫଳ, ପନି ପରିବା ଓ ଆଖୁ ଭଳି କୃଷି ଉତ୍ପାଦ ପାଇଁ ବ୍ୟାପକ ବଜାର ପହଞ୍ଚ ବ୍ୟବସ୍ଥା କରିବା ପାଇଁ ନିବେଦନ କରିଥିଲେ । ଭାରତରୁ ଚୀନକୁ ରପ୍ତାନୀ କରାଯାଉଥିବା ଆଉ ଏକ ଉତ୍ପାଦ ହେଉଛି ଗୁଣବତ୍ତା ସମ୍ପନ୍ନ ଫାର୍ମାସ୍ୟୁଟିକାଲ ଉତ୍ପାଦ । ଭାରତର ଆଇଟି, ଆଇଟି ସକ୍ଷମ ସେବା ତଥା ପର୍ଯ୍ୟଟନ ଏବଂ ସ୍ୱାସ୍ଥ୍ୟ ସୁବିଧା କ୍ଷେତ୍ରରେ ଫୋକସ କରିବାର ଆବଶ୍ୟକତା ରହିଛି ବୋଲି ସେ କହିଥିଲେ ।