ଟ୍ରେନ୍, ବସ୍ ଭଡ଼ା ବଢ଼ିବ, ପନିପରିବା ମହଙ୍ଗା ହେବ
ଭୁବନେଶ୍ବର: ପେଟ୍ରୋଲ୍ ଓ ଡିଜେଲ୍ ଦାମ୍ରେ ହେଉଥିବା ବୃଦ୍ଧି ରେଳବାଇ ଠାରୁ ଆରମ୍ଭ କରି ଟେଲିକମ୍ କଂପାନି ଓ ସାଧାରଣ ଲୋକଙ୍କ ଠାରୁ ଆରମ୍ଭ କରି ଚାଷୀଙ୍କ ପର୍ଯ୍ୟନ୍ତ ସମସ୍ତଙ୍କୁ ପ୍ରଭାବିତ କରିବ। ଦେଶରେ ସର୍ବାଧିକ ଡିଜେଲ୍ ରେଳବାଇ ଏବଂ ପରିବହନ କ୍ଷେତ୍ରର ଟ୍ରକ୍ ଓ ଅନ୍ୟାନ୍ୟ ଗାଡ଼ିଗୁଡ଼ିକରେ ବ୍ୟବହାର କରାଯାଏ। ଡିଜେଲ୍ ଦାମ୍ରେ ହେଉଥିବା ବୃଦ୍ଧି ରେଳ ଟିକଟ ଦରବୃଦ୍ଧିର କାରଣ ହୋଇପାରେ। ବସ୍ ଭଡ଼ା ବୃଦ୍ଧିର ଏହା ଏକ ପ୍ରମୁଖ କାରଣ ହେବ। ଟ୍ରକ୍ ଜରିଆରେ ପରିବହନ ହେଉଥିବା ପନିପରିବା ଠାରୁ ଆରମ୍ଭ କରି ପ୍ରାୟ ସବୁ ପ୍ରକାର ସାମଗ୍ରୀର ଦାମ୍ ବଢ଼ିବ। ଟେଲିକମ୍ କଂପାନିଗୁଡ଼ିକ ମଧ୍ୟ କେତେକ ଟାୱାରରେ ଡିଜେଲ୍କୁ ଇନ୍ଧନ ଭାବେ ବ୍ୟବହାର କରୁଛନ୍ତି।
Sambad is now on WhatsApp
Join and get latest news updates delivered to you via WhatsApp
ବଡ଼ ବଡ଼ ଆପାର୍ଟମେଣ୍ଟ୍ରେ ଡିଜେଲ୍ ଜେନେରେଟର ରହିଛି। ତେଣୁ ଡିଜେଲ୍ ଦାମ୍ ବଢ଼ିଲେ ଟେଲିକମ୍ ଶୁଳ୍କ ଓ ଆପାର୍ଟମେଣ୍ଟ୍ର ସୋସାଇଟି ଚାର୍ଜ ବଢ଼ିବାର ମଧ୍ୟ ଆଶଙ୍କା ରହିଛି। ଡିଜି ସେଟ୍, ଟ୍ରାକ୍ଟର ଓ ପାୱାର ଟିଲର୍ ରଖିଥିବା ଚାଷୀଙ୍କ ଖର୍ଚ୍ଚ ମଧ୍ୟ ବଢ଼ିଛି। ପେଟ୍ରୋଲ୍ ଦରବୃଦ୍ଧି କେବଳ ବେତନଭୋଗୀ, କର୍ପୋରେଟ୍ ଜଗତରେ କାର୍ଯ୍ୟ କରୁଥିବା ପେସାଦାର ଓ କର୍ମଚାରୀ ଏବଂ ଦୂରଦୂରାନ୍ତ ସ୍ଥାନକୁ ନିଜ ଗାଡ଼ିରେ ଯାତ୍ରା କରୁଥିବା ଲୋକମାନଙ୍କୁ ପ୍ରଭାବିତ କରିବ। ଏହା ପରିବାରର ସଞ୍ଚୟକୁ କମ୍ କରିବ ଯାହା ଭାରତ ଭଳି ଏକ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ପାଇଁ ଆଦୌଁ ଭଲ ନୁହେଁ।
ନିକଟରେ କରାଯାଇଥିବା ଏକ ସର୍ଭେରେ ଭାଗ ନେଇଥିବା ଅଧିକାଂଶ ଲୋକ ମତ ଦେଇଛନ୍ତି ଯେ ପେଟ୍ରୋଲ୍ ଓ ଡିଜେଲ୍ ଦାମ୍ ବଢ଼ିବା ପରେ ସେମାନଙ୍କ ମାସିକ ଖର୍ଚ୍ଚ ବଢ଼ିଛି। ତେଲ ଦରବୃଦ୍ଧି ଗାଡ଼ି ବିକ୍ରିକୁ ମଧ୍ୟ ପ୍ରଭାବିତ କରିବ। ଏବେ ପେଟ୍ରୋଲ୍ ଓ ଡିଜେଲ୍ ଦାମ୍ରେ ବିଶେଷ ଫରକ ନାହିଁ। ତେଣୁ ଲୋକମାନେ ପେଟ୍ରୋଲ୍ ତୁଳନାରେ ଡିଜେଲ୍ ଗାଡ଼ି ପ୍ରତି ଯେଉଁ ଅତ୍ୟଧିକ ଆଗ୍ରହ ଦେଖାଉଥିଲେ ତାହା ହ୍ରାସ ପାଇବାରେ ଲାଗିଛି। କାର୍ ଓ ବାଇକ୍ ବିକ୍ରି ଏମିତିରେ ଦେଶରେ ଭଲ ସ୍ଥିତିରେ ନାହିଁ। କରୋନା ମହାମାରୀ ଯୋଗୁଁ ଗାଡ଼ି ବିକ୍ରି ଗୁରୁତର ଭାବେ ପ୍ରଭାବିତ ହୋଇଛି। କେବଳ ଟ୍ରାକ୍ଟରକୁ ବାଦ ଦେଲେ ଅନ୍ୟ ସବୁ ପ୍ରକାର ଗାଡ଼ିର ବିକ୍ରି ଭଲ ସ୍ଥିତିରେ ନାହିଁ। ଗାଡ଼ି ବଜାର ମାନ୍ଦା ହେଲେ ବଡ଼ ବଡ଼ ଗାଡ଼ି କଂପାନି ଓ ସେମାନଙ୍କୁ ପାର୍ଟସ୍ ଯୋଗାଇ ଦେଉଥିବା ଅନେକ କ୍ଷୁଦ୍ର ଓ ମଧ୍ୟମ ଧରଣର କଂପାନିରେ କାର୍ଯ୍ୟ କରୁଥିବା ଲକ୍ଷ ଲକ୍ଷ ଲୋକଙ୍କ ଜୀବିକା ପ୍ରତି ବିପଦ ସୃଷ୍ଟି ହେବ। ବ୍ୟବସାୟ ଜଗତକୁ ମଧ୍ୟ ତୈଳ ଦର ବୃଦ୍ଧି ପ୍ରଭାବିତ କରିବ ଯାହାର ବୋଝକୁ ଶେଷରେ ସେମାନେ ଗ୍ରାହକଙ୍କ ମୁଣ୍ଡରେ ଲଦିବାକୁ ବାଧ୍ୟ ହେବେ।