ନୂଆଦିଲ୍ଲୀ : ବୋଧହୁଏ ଏୟାର ଇଣ୍ଡିଆକୁ କିଣି ଫସିଯାଇଛି ଟାଟା । କାରଣ ପୂର୍ବରୁ ଏହି ରାଷ୍ଟ୍ରାୟତ୍ତ ଉଦ୍ୟୋଗରେ ହୋଇଥିବା କୁପରିଚାଳନା ଓ ଅନିୟମିତତାର କୁଫଳ ଏବେ ଭୋଗୁଛି ଟାଟା । କୋଭିଡ୍ ମହାମାରୀ ସମୟରେ ବାତିଲ ହୋଇଥିବା କିମ୍ବା ବିଳମ୍ବ ହୋଇଥିବା ଫ୍ଲାଇଟର ଯାତ୍ରୀମାନଙ୍କୁ ଭଡ଼ା ଫେରସ୍ତ ବାବଦରେ ୧୨୧.୫ ନିୟୁତ ଡଲାର ( ଭାରତୀୟ ମୁଦ୍ରାରେ ୯୮୦ କୋଟି ଟଙ୍କା) ଓ ଜୋରିମାନା ବାବଦରେ ୧.୪ ନିୟୁତ ଡଲାର ( ୧୧ କୋଟି ଟଙ୍କା) ପ୍ରଦାନ ପାଇଁ ଆମେରିକାର ପରିବହନ ବିଭାଗ ନିର୍ଦ୍ଦେଶ ଦେଇଛି ।
Sambad is now on WhatsApp
Join and get latest news updates delivered to you via WhatsApp
କେବଳ ଏୟାର ଇଣ୍ଡିଆ ନୁହେଁ ମୋଟ ୬ଟି ଅନ୍ତର୍ଜାତୀୟ ଏୟାରଲାଇନ୍ସଙ୍କୁ ମୋଟ ୬୦୦ ନିୟୁତ ଡଲାର ପ୍ରଦାନ ପାଇଁ ଏହି ବିଭାଗ ନିର୍ଦ୍ଦେଶ ଦିଆଯାଇଛି । ଏସବୁ ଏୟାରଲାଇନ୍ସଙ୍କ ମଧ୍ୟରେ ଅଛନ୍ତି ଫ୍ରଣ୍ଟିଅର, ଟାପ୍ ପର୍ତ୍ତୃଗାଲ,ଏରୋ ମେକ୍ସିକୋ, ଆଭିଆଙ୍କା ।
କରୋନା ମହାମାରୀ ସମୟରେ ଅନେକ ଫ୍ଲାଇଟ ବାତିଲ ହୋଇଥିଲା କିମ୍ବା ସମୟ ପରିବର୍ତ୍ତନ ହୋଇଥିଲା । ଏହା ଦ୍ବାରା ଟିକେଟ୍ କାଟିଥିବା ଅନେକ ଯାତ୍ରୀ କ୍ଷତି ସହିବା ସହ ସମସ୍ୟାରେ ପଡ଼ିଥିଲେ । ଏହା ସତ୍ତ୍ବେ ଏୟାର ଇଣ୍ଡିଆ ପକ୍ଷରୁ ଯାତ୍ରୀମାନଙ୍କୁ ଟିକେଟ୍ ବାବଦ ଅର୍ଥ ଫେରସ୍ତ କରାଯାଇନଥିବା କିମ୍ବା ବିଳମ୍ବରେ ଫେରସ୍ତ କରାଯାଇଥିଲା । ଏୟାର ଇଣ୍ଡିଆର ନିୟମ ଅନୁସାରେ ଯାତ୍ରୀ ଅନୁରୋଧ କଲେ ହିଁ ଫେରସ୍ତ ମିଳିବ ( ଅର୍ଥାତ ଜଣେ ଯାତ୍ରୀ ଅନୁରୋଧ ନ କଲେ ଆପେ ଆପେ ଫେରସ୍ତ ମିଳିବ ନାହିଁ ) । ଏହା ସତ୍ତ୍ବେ ୧୯୦୦ ଜଣ ଯାତ୍ରୀଙ୍କ ଫେରସ୍ତ ଆବେଦନକୁ ୧୦୦ ଦିନ ପରେ ବି ଫେରସ୍ତ ଦିଆଯାଇନଥିଲା । ପୁଣି ଏସବୁ ଘଟଣା ଟାଟା ଦ୍ବାରା ଏୟାର ଇଣ୍ଡିଆ ଅଧିଗ୍ରହଣ ପୂର୍ବରୁ ହୋଇଥିଲା ।
କିନ୍ତୁ ଆମେରିକା ସରକାରଙ୍କ ନିୟମ ଅନୁସାରେ ଏୟାରଲାଇନ୍ସମାନେ ଫେରସ୍ତ ଦେବାକୁ ବାଧ୍ୟ । ଏଣୁ ଆମେରିକାର ପରିବହନ ବିଭାଗ ଏୟାର ଇଣ୍ଡିଆ ଓ ଅନ୍ୟମାନଙ୍କ ଉପରେ ଏହି ନିର୍ଦ୍ଦେଶ ଜାରି କରିଛି ।