ଖୋର୍ଦ୍ଧା: ‘କରୋନା ମହାମାରୀରେ ସେମାନେ ନିଜ ଜୀବନକୁ ବାଜି ଲଗାଇ ନିରବଚ୍ଛିନ୍ନ ଭାବେ ଲୋକଙ୍କ ସେବା କରିଛନ୍ତି । ସରକାରଙ୍କ ନିର୍ଦ୍ଦେଶକୁ ପାଳନ କରି କାର୍ଯ୍ୟ କରିଛନ୍ତି । କେବଳ ଏହାନୁହେଁ ସାଧାରଣ ସମୟ ଓ ପ୍ରାକୃତିକ ବିପର୍ଯ୍ୟୟରେ ମଧ୍ୟ ସେମାନେ ନିଜ ଦାୟିତ୍ୱ ପାଳନ କରିବାରେ ଅବହେଳା କରିନାହାନ୍ତି । କିନ୍ତୁ ସେମାନଙ୍କ ଦୀର୍ଘ ଦିନର ସମସ୍ୟା ସମାଧାନ କରାଯାଉନଥିବାରୁ ସେମାନେ ସରକାରଙ୍କ ଏଭଳି ଅଣଦେଖା ବ୍ୟବହାରକୁ ବିରୋଧ କରି କୋଭିଡ୍-୧୯ ଟିକା ନେବେନାହିଁ ବୋଲି ଆଜି ଖୋର୍ଦ୍ଧା ଜିଲ୍ଲା ସ୍ୱାସ୍ଥ୍ୟକର୍ମୀ ଓ ସ୍ୱାସ୍ଥ୍ୟ ପରିଦର୍ଶକ ସଂଘ ପକ୍ଷରୁ କୁହାଯାଇଛି ‘। ଆଜି ଅପରାହ୍ଣରେ ଖୋର୍ଦ୍ଧା ଜିଲ୍ଲାର ପ୍ରାୟ ୪୦ରୁ ଉର୍ଦ୍ଧ୍ବ ମହିଳା ଓ ପୁରୁଷ ସ୍ୱାସ୍ଥ୍ୟକର୍ମୀ, ସ୍ୱାସ୍ଥ୍ୟ ପରିଦର୍ଶକ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ଭେଟି ଏନେଇ ଦାବିପତ୍ର ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା ବିଶ୍ୱରଂଜନ ପତି ସେମାନଙ୍କ ଠାରୁ ଦାବିପତ୍ର ଗ୍ରହଣ କରିବା ସହ ସେମାନଙ୍କ ସମସ୍ୟା ସମ୍ପର୍କରେ ରାଜ୍ୟ ସରକାରଙ୍କୁ ଜଣାଇବେ ବୋଲି ପ୍ରତିଶ୍ରୁତି ଦେଇଛନ୍ତି । ଦାବିପତ୍ର ପ୍ରଦାନ ପରେ ମହିଳା ସ୍ୱାସ୍ଥ୍ୟକର୍ମୀ ସଂଘର ନେତ୍ରୀ ମମତା ନାୟକ କହିଛନ୍ତି ଯେ ସରକାର ଡାକ୍ତର, ନର୍ସ ଆଦି କ୍ଲିନିକାଲ୍ ଷ୍ଟାଫଙ୍କୁ ଚାକିରି କାଳରେ ୫ରୁ ୭ଟି ପଦୋନ୍ନତି ଦେଉଛନ୍ତି । କିନ୍ତୁ ସ୍ୱାସ୍ଥ୍ୟକର୍ମୀ ଓ ସ୍ୱାସ୍ଥ୍ୟ ପରିଦର୍ଶକଙ୍କ କ୍ଷେତ୍ରରେ ସେଭଳି ବ୍ୟବସ୍ଥା ନାହିଁ । ପଦବୀ ପରିବର୍ତନ ଓ କ୍ୟାଡର ପୁନର୍ଗଠନ ପାଇଁ ଅନେକ ଥର ଦାବି କରାଯାଇଥିଲେ ମଧ୍ୟ ସରକାର ସେମାନଙ୍କ କଥା ଶୁଣୁନାହାନ୍ତି । ଏଣୁ ସେମାନେ ସରକାରଙ୍କ ଏଭଳି ଅବହେଳାକୁ ପ୍ରତିବାଦ କରି କରୋନା ଟିକା ଗ୍ରହଣ କରିବେ ନାହିଁ ବୋଲି ନିଷ୍ପତ୍ତି ନେଇଛନ୍ତି ।
ପୁରୁଷ ସ୍ୱାସ୍ଥ୍ୟକର୍ମୀ ନେତା ପ୍ରଶାନ୍ତ ସାମନ୍ତରାୟ କହିଛନ୍ତି ଯେ ସମଗ୍ର ରାଜ୍ୟରେ ୧୫ହଜାର ମହିଳା-ପୁରୁଷ ସ୍ୱାସ୍ଥ୍ୟକର୍ମୀ, ସ୍ୱାସ୍ଥ୍ୟପରିଦର୍ଶକ କାମ କରୁଥିବା ବେଳେ ଖୋର୍ଦ୍ଧା ଜିଲ୍ଲାରେ ୬୫୦ ଜଣ କାମ କରୁଛନ୍ତି । ଆଜି ସମଗ୍ର ରାଜ୍ୟରେ ଓଡ଼ିଶା ରାଜ୍ୟ ପୁରୁଷ ଓ ମହିଳା ବହୁମୁଖୀ ସ୍ୱାସ୍ଥ୍ୟକର୍ମୀ ଓ ସ୍ୱାସ୍ଥ୍ୟ ପରିଦର୍ଶକ ମିଳିତ ମହାସଂଘ ପକ୍ଷରୁ ଏଭଳି ଦାବିପତ୍ର ପ୍ରଦାନ କରାଯାଇଛି । ଆଗାମୀ ଦିନରେ ଜିଲ୍ଲାପାଳଙ୍କୁ ମଧ୍ୟ ପ୍ରଦାନ କରାଯିବ । ଆଜିର ଏହି ଦାବିପତ୍ର ପ୍ରଦାନ ବେଳେ ଅନ୍ୟମାନଙ୍କ ମଧ୍ୟରେ ଅନୂପ ଶତପଥୀ, ଜିତେନ୍ଦ୍ର ମହାପାତ୍ର, ସଂଧ୍ୟାରାଣୀ ପାତ୍ର, କାଂଚନ ମଲିକ, ଜ୍ୟୋତିର୍ମୟୀ ଚୌଧୁରୀ, ଅମିତା ସାହୁ ପ୍ରମୁଖ ଉପସ୍ଥିତ ଥିଲେ ।