ଝାନସୀ ଯୁବତୀ ଚାଲାଣ ଘଟଣା, ୫ ଗିରଫ
ଛେଣ୍ତିପଦା: ଛେଣ୍ତିପଦା ଥାନା ବାଗେଡିଆ ଅଞ୍ଚଳର ଜଣେ ଯୁବତୀକୁ ତାଙ୍କ ଇଛା ବିରୋଧରେ ସ୍ଥାନୀୟ ଏଜେଣ୍ଟ ମାଧୢମରେ ଝାନସୀର ୩ ଜଣ ଲୋକଙ୍କୁ ବିକ୍ରି କରିବା ଘଟଣାରେ ପୁଲିସ ସଂପୃକ୍ତ ଯୁବତୀଙ୍କ ମା ସମେତ ୫ ଜଣଙ୍କୁ ଗିରଫ କରିଛି। ତେବେ ଏଥିରେ ସଂପୃକ୍ତ ଜଣେ ତଥାକଥିତ ଗଣମାଧୢମ ପ୍ରତିନିଧି ଫେରାର ହୋଇଯାଇଛି। ପୁଲିସ ସୂତ୍ରରୁ ପ୍ରକାଶ, ଗତକାଲି ସକାଳ ୯ ଟାରେ ଏକ ମନ୍ଦିରରେ ଝାନସୀ ଅଞ୍ଚଳର ଜଣେ ବ୍ୟକ୍ତିଙ୍କ ସହିତ ସ୍ଥାନୀୟ ଏଜେଣ୍ଟ ଜରିଆରେ ବାଗେଡିଆ ଅଞ୍ଚଳର ଜଣେ ଯୁବତୀଙ୍କ ବିବାହ ପାଇଁ ପ୍ରସ୍ତୁତି ସରିଥିଲା। କୁଣ୍ଢେଇଗୁଳା ନିକଟରେ ଏକ ମନ୍ଦିରରେ ବିବାହ କରିବା ପୂର୍ବରୁ ଏ ସଂପର୍କରେ ଖବର ପାଇ ଛେଣ୍ତିପଦା ଆଇଆଇସି ନିର୍ମଳା ଗୋଛାୟତ ପହଞ୍ଚି ବାହାଘରକୁ ବନ୍ଦ କରି ଦେଇଥିଲେ। ପରିବାର ଲୋକଙ୍କୁ ବିବାହ ପୂର୍ବରୁ ଝାନସୀରୁ ଆସିଥିବା ବର ସ˚ପର୍କରେ ତଥ୍ୟ ଜାଣିବା ପରେ ବିବାହ କରିବାକୁ ପରାମର୍ଶ ଦେଇଥିଲେ। ଫଳରେ ବାହାଘର ବନ୍ଦ ହୋଇଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଏହାପରେ ସ୍ଥାନୀୟ ଏଜେଣ୍ଟ ସ˚ଜୟ ବାରିକ(୩୨ଙ୍କ ଜରିଆରେ ମଧୢପ୍ରଦେଶର ଝାନସୀ ଅଞ୍ଚଳର ଲହରା ଗ୍ରାମର ରାମମୋହନ ଶର୍ମା(୩୦), ପବନ ଶର୍ମା(୨୮) ଓ ରାମ ନରେଶ ଶର୍ମା(୪୦) ୪୦ ହଜାର ଟଙ୍କାରେ ସଂପୃକ୍ତ ଯୁବତୀଙ୍କୁ ଝାନସୀକୁ ନେବାକୁ ଆସିଥିଲେ। ଯୁବତୀଙ୍କ ମା’ଙ୍କ ସହିତ ସେମାନେ ଗତକାଲି ସ˚ଧୢାରେ କଥାବାର୍ତା ବେଳେ ଝିଅ ଏହା ଜାଣିପାରିଥିଲା। ପରେ ଯୁବତୀ ଜଣକ ଘରୁ ଗ୍ରାମର ଲକ୍ଷ୍ମୀମଣ୍ତପକୁ ପଳାଇ ଯାଇ ଗ୍ରାମବାସୀଙ୍କୁ ଜଣାଇଥିଲେ। ଗ୍ରାମବାସୀ ଏଜେଣ୍ଟ ସ˚ଜୟ ଓ ଝାନସୀ ଅଞ୍ଚଳର ତିନିଜଣ ବ୍ୟକ୍ତିଙ୍କୁ ଡକାଇ ଆଲୋଚନା କରିଥିଲେ। ଏହି ସମୟରେ ତଥାକଥିତ ସମ୍ବାଦିକ ହଟକିଶୋର ଷଡଙ୍ଗୀ(୩୯) ପହଞ୍ଚି ‘୭ ହଜାର ଟଙ୍କା ଦିଅ ଥାନାରେ ସମସ୍ୟାର ସମାଧାନ କରିବା’ କହି ଝାନସୀର ୩ ଜଣ ବ୍ୟକ୍ତିଙ୍କୁ ନେଇ ଘଟଣାସ୍ଥଳରୁ ପଳାଇଥିଲେ। ଏ ଘଟଣା ସଂପର୍କରେ ଥାନା ଆଇଆଇସି ନିର୍ମଳା ଗୋଛାୟତ ଜାଣିବା ପରେ ସଦଳବଳ ସେଠାରେ ପହଞ୍ଚି ଅସହାୟ ଯୁବତୀଙ୍କୁ ଉଦ୍ଧାର କରିଥିଲେ। ଯୁବତୀଙ୍କ ବୟାନ ରେକର୍ଡ ପରେ ପୁଲିସ ଏକ କେସ୍ ରୁଜୁ କରି ତାଙ୍କ ମା,ଝାନସୀର ରାମମୋହନ, ରାମନରେଶ ଓ ପବନ, ଏଜେଣ୍ଟ ସଂଜୟକୁ ଗିରଫ କରିଛନ୍ତି। ଏହି ଘଟଣାରେ ସଂପୃକ୍ତ ସାମ୍ବାଦିକ ହଟକିଶୋର ଫେରାର ହୋଇଯାଇଛି।