କେନ୍ଦୁଝର: କେନ୍ଦୁଝର ଜିଲ୍ଲା କାଞ୍ଜିପାଣି ଥାନା ଅନ୍ତର୍ଗତ କାଞ୍ଜିପାଣି ଘାଟି ନିପୋ ଗାଁ ନିକଟରେ ଟ୍ରାକ୍ଟରକୁ ପିଟିଲା ଟ୍ରକ୍ । ଘଟଣାସ୍ଥଳରେ ଜଣେ ମହିଳାଙ୍କ ସମେତ ୨ ଜଣଙ୍କର ମୃତ୍ୟୁ ଘଟିଛି । ଅନ୍ୟ ୪ ଜଣ ଆହତ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି। ନିପୋ ଘାଟି ରାସ୍ତା କଡ଼ରେ କେନ୍ଦୁ ବିକ୍ରି କରୁଥିବା ବେଳେ ଏକ ଓଡି ୩୧ ଏ ୬୮୦୧ ନମ୍ବର ଟ୍ରାକ୍ଟରରେ ଥିବା ୫ ଜଣ କର୍ମଚାରୀ ରାସ୍ତା କଡରେ ଟ୍ରାକ୍ଟର ରଖି କେନ୍ଦୁ କିଣୁଥିଲେ । ଏହି ସମୟରେ ଦ୍ରୁତ ଗତିରେ ଆସୁଥିବା ଓଡି ୦୯ ପି ୩୫୮୯ ନଂ ବିଶିଷ୍ଟ ଏକ ଟ୍ରକ୍ ସମସ୍ତଙ୍କୁ ପଛପଟୁ ଧକ୍କା ଦେଇଥିଲା।
Sambad is now on WhatsApp
Join and get latest news updates delivered to you via WhatsApp
ଫଳରେ କେନ୍ଦୁ ବିକ୍ରି କରୁଥିବା ମହିଳା ଓ ଟ୍ରାକ୍ଟର କର୍ମଚାରୀଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା । ମୃତ ମହିଳା କାଞ୍ଜିପାଣି ଥାନା ନିପୋ ଗାଁର ନିଆଳି ମନ୍ତ୍ରୀ ହୋଇଥିବା ବେଳେ, ମୃତ ଟ୍ରାକ୍ଟର କର୍ମଚାରୀ ବରଗଡ଼ ଜିଲ୍ଲା ସୁନପୁର ଅଞ୍ଚଳର ସୁଦର୍ଶନ ଛତରିଆ ୩୫ ବର୍ଷ ବୋଲି ଜଣାପଡ଼ିଛି । ଆହତ କେନ୍ଦୁ ବିକ୍ରି କରୁଥିବା ଜଣେ ମହିଳା ଓ ଟ୍ରାକ୍ଟରରେ ଥିବା ଅନ୍ୟ ୩ ଜଣ କର୍ମଚାରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି । ଏହି ଘଟଣାକୁ ନେଇ କିଛି ସମୟ ୪୯ ନଂ ଜାତୀୟ ରାଜପଥ ଅବରୋଧ କରିବା ସହ ଉତ୍ତେଜନା ପ୍ରକାଶ ପାଇଥିଲା।