ପୁଣି ସୁଏଜ୍ କେନାଲ ଅତିକ୍ରମ କଲା ବୃହତ୍ ମାଲବାହୀ ଜାହାଜ ‘ଏଭର ଗିଭିନ’
କାଇରୋ : ଚଳିତ ବର୍ଷ ମାର୍ଚ୍ଚ ମାସରେ ସୁଏଜ କେନାଲରେ ଫସି ରହି ସମଗ୍ର ବିଶ୍ବ ବାଣିଜ୍ୟକୁ ଏକରକମ ଅଟକାଇଦେଇଥିବା ବୃହତ୍ ମାଲବାହୀ ଜାହାଜ ଏଭର ଗିଭିନ ଗତକାଲି ଅର୍ଥାତ ଶୁକ୍ରବାରଦିନ ପୁଣି ଥରେ ସୁଏଜ କେନାଲ ଅତିକ୍ରମ କରିଥିଲା । ବ୍ରିଟେନରୁ ଚୀନ ଯାଉଥିବାବେଳେ ଜାହାଜଟି ସୁଏଜ କେନାଲ ଅତିକ୍ରମ କରିଥିଲା । କିନ୍ତୁ ଏଥର ଜାହାଜଟି ସୁରୁଖୁରୁରେ କେନାଲ ଅତିକ୍ରମ କରିଥିଲା ବୋଲି ସୁଏଜ କେନାଲ ଅଥରିଟି (ଏସସିଏ) ପକ୍ଷରୁ ସୂଚନା ଦିଆଯାଇଛି । ଏଥର ଏହି ଜାହାଜ ଅତିକ୍ରମ କରିବା ବେଳେ ଏସିଏର ଦୁଇଟି ଟଗବୋଟ୍ ଏହାକୁ ପାଇଲଟିଂ କରି ନେଇଥିଲେ । ଗତ ମାର୍ଚ୍ଚ ମାସ ପରେ ପ୍ରଥମ ଥର ପାଇଁ ଏହି ବୃହତ ଜାହାଜ ସୁଏଜ କେନାଲ ଅତିକ୍ରମ କରିଥିଲା ।
Sambad is now on WhatsApp
Join and get latest news updates delivered to you via WhatsApp
ଗତ ମାର୍ଚ୍ଚ ୨୩ରେ ଜାପାନର ସୋଇ କିସେନ କାଇସା ନାମକ କମ୍ପାନି ମାଲିକାନାରେ ଥିବା ୪୦୦ ମିଟର ଲମ୍ବ ଏଭର ଗିଭିନ ସୁଏଜ କେନାଲରେ ଫସିଯାଇଥିଲା । ଏହା ପରେ ହିଁ ପ୍ରାୟ ୧ ସପ୍ତାହ ଧରି ସୁଏଜ କେନାଲ ସଂକଟ ଆରମ୍ଭ ହୋଇଥିଲା । କେନାଲର ଉଭୟ ପଟେ ଶହ ଶହ ଜାହାଜ ଅଟକି ରହିଥିଲେ । ଏହା ଫଳରେ ବିଶ୍ବ ବାଣିଜ୍ୟର ଏକ ଗୁରୁତ୍ବପୂର୍ଣ୍ଣ ପଥ ପ୍ରଭାବିତ ହୋଇଥିଲା ।