ସିବିଆଇ, ଆଇବି ନ୍ୟାୟପାଳିକାର ସହାୟତା କରୁନାହାନ୍ତି : ପ୍ରଧାନ ବିଚାରପତି
ନୂଆଦିଲ୍ଲୀ : ଝାଡ଼ଖଣ୍ଡର ଧନବାଦରେ ବିଚାରପତିଙ୍କୁ ହତ୍ୟା ମାମଲାର ବିଚାର କରି ସିବିଆଇ ଓ ଆଇବିକୁ ଅତି କଠୋର ଭାଷାରେ ସମାଲୋଚନା କରିଛନ୍ତି ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ ଏନ.ଭି. ରମନ୍ନା ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ ପ୍ରଭାବଶାଳୀ ଲୋକ କିମ୍ବା ଗ୍ୟାଙ୍ଗଷ୍ଟରମାନେ ସଂପୃକ୍ତ ଥିବା ମାମଲାଗୁଡ଼ିକର ବିଚାର ବେଳେ ବିଚାରପତିମାନଙ୍କୁ ବିଭିନ୍ନ ପ୍ରକାରର ଧମକ ମିଳୁଛି । କିନ୍ତୁ ଏ ସମ୍ପର୍କରେ ସିବିଆଇ କୌଣସି ପଦକ୍ଷେପ ନେଉନାହିଁ । କୌଣସି ବିଚାରପତି ସିବିଆଇ କିମ୍ବା ପୁଲିସ ନିକଟରେ ଅଭିଯୋଗ କଲେ ବି କୌଣସି ସୁଫଳ ମିଳୁନାହିଁ । ସିବିଆଇ, ଆଇବି (ଗୁଇନ୍ଦା ବ୍ୟୁରୋ) ପରି ସଂସ୍ଥାମାନେ ନ୍ୟାୟପାଳିକାକୁ କୌଣସି ସହାୟତା କରୁନାହାନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ଆଜିକାଲି ଦେଶରେ ଏକ ନୂଆ ଟ୍ରେଣ୍ଡ୍ ଆରମ୍ଭ ହୋଇଯାଇଛି । କୌଣସି ମାମଲାରେ ପ୍ରତିକୂଳ ରାୟ ଶୁଣାଇଲେ ବିଚାରପତିମାନଙ୍କ ନାଁରେ ବିଭିନ୍ନ ପ୍ରକାରର କୁତ୍ସାରଟନା କରାଯାଉଛି ।
ଗତ ମାସରେ ଧନବାଦର ଜିଲ୍ଲା ସେସନ୍ସ ଜଜ୍ ଉତ୍ତମ ଆନନ୍ଦ ପ୍ରାତଃଭ୍ରମଣ କରୁଥିବାବେଳେ ଏକ ଅଟୋରିକ୍ସା ତାଙ୍କୁ ଧକ୍କା କରି ମାରିଦେଇଥିଲା । ତାଙ୍କୁ ହତ୍ୟା କରାଯାଇଥିବା ସଂଦେହ କରାଯାଉଛି । ପୁଲିସ ଏହି ଘଟଣାରେ ଦୁଇଜଣଙ୍କୁ ଗିରଫ କରି ତଦନ୍ତ ଚଳାଇଛି । ଏହି ମାମଲାରେ ସୁପ୍ରିମକୋର୍ଟ ଚିନ୍ତା ପ୍ରକଟ କରିବା ସହ ନିଜ ଆଡ଼ୁ ଏକ ମାମଲା ରୁଜ୍ଜୁ କରି ଶୁଣାଣି କରୁଛନ୍ତି ।