ମୋଦୀଙ୍କ ସମାବେଶକୁ ଯିବା ପାଇଁ ସାମ୍ବାଦିକ ଦେବେ ଚରିତ୍ର ପ୍ରମାଣପତ୍ର
ନୂଆଦିଲ୍ଲୀ: ଦଶହରା ଅବସରରେ ହିମାଚଳପ୍ରଦେଶକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସୁଥିବାବେଳେ ତାଙ୍କ କାର୍ଯ୍ୟକ୍ରମକୁ ଯିବାକୁ ହେଲେ ସାମ୍ବାଦିକମାନଙ୍କୁ ସୁରକ୍ଷା ପାସ୍ ପାଇଁ ଏକ ଚରିତ୍ର ପ୍ରମାଣପତ୍ର ଦେବାକୁ କୁହାଯାଇଛି। ଜିଲ୍ଲା ପ୍ରଶାସନର ଏହି ଆଦେଶ ଏକ ବଡ଼ ବିବାଦ ସୃଷ୍ଟି କରିଛି। ତେବେ ଏହି ନିର୍ଦ୍ଦେଶନାମା କେବଳ ବେସରକାରୀ ନ୍ୟୁଜ୍ ଚ୍ୟାନେଲ, ପ୍ରିଣ୍ଟ ଏବଂ ଡିଜିଟାଲ୍ ମିଡିଆ ସହିତ ଜଡିତ ସାମ୍ବାଦିକ ନୁହଁନ୍ତି, ଅଲ୍ ଇଣ୍ଡିଆ ରେଡିଓ ଏବଂ ଦୂରଦର୍ଶନ ପ୍ରତିନିଧୀଙ୍କ ପାଇଁ ମଧ୍ୟ ଲାଗୁ ହେବ | ନିର୍ଦ୍ଦେଶନାମାରେ କୁହାଯାଇଛି ଯେ ଚରିତ୍ର ଯାଞ୍ଚର ପ୍ରମାଣପତ୍ର ଡେପୁଟି ପୁଲିସ୍ ଅଧୀକ୍ଷକ ସିଆଇଡି, ବିଲାସପୁର କାର୍ଯ୍ୟାଳୟ ଦ୍ୱାରା ପ୍ରଦାନ କରାଯିବ। ରାଲି କିମ୍ବା ସଭାରେ ଯୋଗଦେବା ପାଇଁ ଏହି ପ୍ରମାଣପତ୍ର ଦେଲେ ହିଁ ସାମ୍ବାଦିକମାନେ ଯାଇପାରିବେ ବୋଲି କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଏହାକୁ ନେଇ ଆମ୍ ଆଦମୀ ପାର୍ଟି ମୁଖପାତ୍ର ପଙ୍କଜ ପଣ୍ଡିତ କହିଛନ୍ତି ଯେ ସାମ୍ବାଦିକତା କ୍ଷେତ୍ରରେ ତାଙ୍କର ୨୨ ବର୍ଷ କ୍ୟାରିଅରରେ ସେ ପ୍ରଥମ ଥର ପାଇଁ ଏଭଳି ‘ବିଚିତ୍ର’ ନିର୍ଦ୍ଦେଶନାମା ଦେଖୁଛନ୍ତି। ହିମାଚଳପ୍ରଦେଶ କଂଗ୍ରେସ କମିଟିର ମୁଖ୍ୟ ମୁଖପାତ୍ର ନରେଶ ଚୌହାନ ମଧ୍ୟ ପ୍ରଶାସନର ବିଜ୍ଞପ୍ତିକୁ ନିନ୍ଦା କରିବା ସହ କହିଛନ୍ତି ଯେ ଏହି ପଦକ୍ଷେପ ଗଣମାଧ୍ୟମର ସ୍ୱାଧୀନତା ବିରୁଦ୍ଧ । ଆଶ୍ଚର୍ଯ୍ୟଜନକ କଥା ହେଉଛି ଯେ ସାମ୍ବାଦିକମାନଙ୍କଠାରୁ ଚରିତ୍ର ଯାଞ୍ଚର ପ୍ରମାଣପତ୍ର ଖୋଜାଯାଉଥିବାବେଳେ ଏହି ରାଲିରେ ଯୋଗଦେବାକୁ ଆସୁଥିବା ହଜାର ହଜାର ଲୋକଙ୍କୁ କୌଣସି ପରିଚୟ ପ୍ରମାଣର ଆବଶ୍ୟକତା ପଡିବ ନାହିଁ। ସୂଚନା ଥାଉ କି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୁଧବାର ଦିନ ହିମାଚଳ ପ୍ରଦେଶ ଗସ୍ତ କରିବେ।
ସେ ବିଲାସପୁରରେ ନୂତନ ଭାବେ ନିର୍ମିତ ଅଲ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (AIIMS) ର ଉଦଘାଟନ କରିବେ | ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ) ଦ୍ୱାରା ଜାରି ଏକ ବିବୃତ୍ତି ଅନୁଯାୟୀ ମୋଦୀ ଏହି ସମୟ ମଧ୍ୟରେ ୩୬୫୦ କୋଟି ଟଙ୍କା ମୂଲ୍ୟର ବିଭିନ୍ନ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କରିବେ।