ଆନ୍ଧ୍ରପ୍ରଦେଶ ପରେ ଛତିଶଗଡ଼ର ପେପର ମିଲରେ ଗ୍ୟାସ ଲିକ: ଗୁରୁତର ଅସୁସ୍ଥ ହୋଇ ୭ଜଣ ଡାକ୍ତରଖାନାରେ ଭର୍ତ୍ତି
ରାୟପୁର: ରାସାୟନିକ କାରଖାନାରୁ ଗ୍ୟାସ୍ ଲିକ୍ ହେତୁ ଗୁରୁବାର ଦିନ ଆନ୍ଧ୍ରପ୍ରଦେଶର ବିଶାଖାପାଟଣାରେ ୧୧ ଜଣଙ୍କର ମୃତ୍ୟୁ ଘଟିଥିବା ବେଳେ ପଡ଼ୋଶୀ ଛତିଶଗଡରେ ମଧ୍ୟ ସେଭଳି ଘଟଣା ଘଟିଥିବାର ସୂଚନା ମିଳିଛି। ରିପୋର୍ଟରେ କୁହାଯାଇଛି ଯେ, ରାୟଗଡ ଜିଲ୍ଲାର ଏକ ପେପର ମିଲରେ ଗ୍ୟାସ ଲିକ୍ ହେବାରୁ ୭ଜଣ କର୍ମଚାରୀ ଅସୁସ୍ଥ ହୋଇଛନ୍ତି।
Sambad is now on WhatsApp
Join and get latest news updates delivered to you via WhatsApp
“ବିଷାକ୍ତ ଗ୍ୟାସ ଲିକ୍ ହେବା ସମୟରେ ମିଲର ଏକ ଟାଙ୍କି ସଫା କରୁଥିବାରୁ ୭ଜଣ କର୍ମଚାରୀ ଗ୍ୟାସର ସଂସ୍ପର୍ଶରେ ଆସି ଏବେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସେମାନଙ୍କ ମଧ୍ୟରୁ ତିନିଜଣଙ୍କ ଅବସ୍ଥା ସଙ୍କଟାପନ୍ନ ରହିଛି ବୋଲି ରାୟଗଡ ପୁଲିସ ଅଧୀକ୍ଷକ କହିଛନ୍ତି। ଏହି ତିନି ଜଣ ଗୁରୁତରଙ୍କୁ ଚିକିତ୍ସା ପାଇଁ ରାଜଧାନୀ ରାୟପୁରକୁ ସ୍ଥାନାନ୍ତର କରାଯାଉଥିବା ସୂଚନା ମିଳିଛି। ରାୟଗଡ ଏସପି କହିଛନ୍ତି ଯେ, ପେପର ମିଲ ପରିଚାଳନା କମିଟି ପୁଲିସକୁ ସୂଚନା ଦେଇ ନାହିଁ | ଡାକ୍ତରଖାନା ପକ୍ଷରୁ ସେମାନଙ୍କୁ ଗ୍ୟାସ୍ ଲିକ ସମ୍ପର୍କରେ ସୂଚନା ମିଳିଥିବା ସେ କହିଛନ୍ତି |
ସୂଚନା ମୁତାବକ, ଗତକାଲି ରାତିରେ ଶ୍ରମିକମାନେ ସଫେଇ କରୁଥିବା ବେଳେ ଏହି ଲିକ୍ ଆରମ୍ଭ ହୋଇଥିବା ଜଣାଯାଇଛି। ଲକ୍ଡାଉନ୍ ହେତୁ ଗତ କିଛି ସପ୍ତାହ ଧରି ଏହି ମିଲ୍ ବନ୍ଦ ରହିଥିଲା ଏବଂ ଖୁବ୍ ଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ଆଶା କରାଯାଉଥିଲା।