ନୂଆଦିଲ୍ଲୀ : ଆସନ୍ତା କାଲି ଅର୍ଥାତ ମେ ୧୬ ତାରିଖରେ ଦେଶରେ ୪ର୍ଥ ପର୍ଯ୍ୟାୟ ଲକଡାଉନ ସଂପର୍କରେ ଘୋଷଣା ହୋଇପାରେ । ତେବେ ଗତ ଥର ଭଳି ଏଥର ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏ ସଂପର୍କରେ ଘୋଷଣା ନ କରିବାର ସମ୍ଭାବନା ରହିଛି । କେବଳ ଗୃହ ମନ୍ତ୍ରାଳୟ ଏ ସଂପର୍କରେ ଏକ ଗାଇଡଲାଇନ ଜାରି କରି ଘୋଷଣା କରିବ ।
Sambad is now on WhatsApp
Join and get latest news updates delivered to you via WhatsApp
ଏକ ଜାତୀୟ ସ୍ତରର ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ ୪ର୍ଥ ପର୍ଯ୍ୟାୟ ଲକଡାଉନରେ ନିୟମାବଳୀକୁ ଆହୁରି କୋହଳ କରାଯାଇ ଅର୍ଥନୈତିକ କାର୍ଯ୍ୟକଳାପ ଯେପରି ସ୍ୱାଭାବିକ ହୁଏ ସେ ସଂପର୍କରେ ଗୁରୁତ୍ୱ ଦିଆଯିବ । ତେବେ ଲୋକମାନଙ୍କୁ ସାଧାରଣ ସ୍ୱାସ୍ଥ୍ୟଗତ ଗାଇଡଲାଇନ(ସାମାଜିକ ଦୂରତ୍ୱ,ମାସ୍କ ପିନ୍ଧିବା, ହାତଧୋଇବା ଆଦି) ପାଳନ କରିବାକୁ ହେବ ।
ଅନ୍ୟପକ୍ଷରେ ଗ୍ରୀନ ଜୋନଗୁଡ଼ିକରେ ଶିଳ୍ପାନୁଷ୍ଠାନ, ବ୍ୟବସାୟ ପ୍ରତିଷ୍ଠାନ ଖୋଲିବା, ବସ,ଟାକ୍ସି ଆଦି ଚଳାଚଳ କରିବାକୁ ଅନୁମତି ମିଳିବ । ତେବେ ଦେଶରେ କେବଳ ସ୍ୱତନ୍ତ୍ର ଟ୍ରେନ ବ୍ୟତୀତ ଅନ୍ୟ ଯାତ୍ରୀବାହୀ ଟ୍ରେନକୁ ଅନୁମତି ମିଳିବ ନାହିଁ ।
ପ୍ରଧାନମନ୍ତ୍ରୀ ପ୍ରଥମେ ମାର୍ଚ୍ଚ ୨୪ ତାରିଖରେ ସାରା ଦେଶରେ ଲକଡାଉନ ସଂପର୍କରେ ଘୋଷଣା କରିଥିଲେ । ପ୍ରଥମ ଦଫା ଲକଡାଉନ ୨୧ଦିନ ପାଇଁ ଘୋଷିତ ହୋଇଥିଲା ଓ ଏହା ଏପ୍ରିଲ ୧୪ରେ ସମାପ୍ତ ହୋଇହେବାର ଥିଲା । ତେବେ ଏହାକୁ ମେ ୪ ଓ ତାପରେ ମେ ୧୭ ପର୍ଯ୍ୟନ୍ତ ବଢାଇଦିଆଯାଇଥିଲା । ତେବେ ୨ୟ ଦଫା ଲଡକାଉନ ପରଠାରୁ ସରକାର ପର୍ଯ୍ୟାୟକ୍ରମେ କେତେକ କ୍ଷେତ୍ରକୁ ଧୀରେ ଧୀରେ ଖୋଲିବା ଆରମ୍ଭ କରିଥିଲେ ।