ଯୋଗୀ ସରକାରଙ୍କ ନିଷ୍ପତ୍ତି: କ୍ଷୀର ଦେବା ବନ୍ଦ ପରେ ଗାଈକୁ ବେସାହାରା ଛାଡ଼ିଲେ ରୁଜୁ ହେବ ଏତଲା
ଲକ୍ଷ୍ନୌ: ଏବେ କ୍ଷୀର ଦେବା ବନ୍ଦ କରିବା ପରେ ଗାଈମାନଙ୍କୁ ବେସାହାରା ଛାଡ଼ିଲେ ଗୋପାଳକ ବିରୋଧରେ ରୁଜୁ ହେବ ଏତଲା । ରାସ୍ତାରେ ବୁଲୁଥିବା ଗାଈଙ୍କ ସଂଖ୍ୟା କମ କରିବା ପାଇଁ ଯୋଗୀ ସରକାର ବଡ଼ ନିଷ୍ପତ୍ତି ନେଇଛନ୍ତି। ୟୁପି ସରକାର ସୋମବାର କହିଛନ୍ତି ଯେ ପ୍ରାଣୀ ନିଷ୍ଠୁରତା ନିରୋଧୀ ଆଇନ ଅନୁଯାୟୀ ଏଭଳି ଚାଷୀଙ୍କ ବିରୋଧରେ ମାମଲା ରୁଜୁ ହେବ।
Sambad is now on WhatsApp
Join and get latest news updates delivered to you via WhatsApp
ପଶୁପାଳନ ମନ୍ତ୍ରୀ ଧରମପାଲ ସିଂ କହିଛନ୍ତି ଯେ ଜଣେ କଂସେଇ ଏବଂ ଚାଷୀଙ୍କ ମଧ୍ୟରେ ପାର୍ଥକ୍ୟ ଅଛି। ଆମେ କୃଷକମାନଙ୍କର ଯତ୍ନ ନେବୁ, କଂସେଇମାନଙ୍କର ନୁହେଁ। ବିଧାନସଭାରେ ପ୍ରଶ୍ନୋତ୍ତର ସମୟରେ ସପା ବିଧାୟକ ଅବଧେଶ ପ୍ରସାଦଙ୍କ ପ୍ରଶ୍ନର ଉତ୍ତର ଦେଇ ସେ କହିଛନ୍ତି ଯେ, ଯେଉଁମାନେ ପ୍ରାଣୀ ନିଷ୍ଠୁରତା ନିରୋଧୀ ଆଇନ ଅନୁଯାୟୀ ପଶୁମାନଙ୍କୁ ବେସାହାରା ଛାଡ଼ିବେ, ସେମାନଙ୍କ ବିରୋଧରେ ଏକ ମାମଲା ରୁଜୁ ହେବ।
ଦିଗହରା ପଶୁମାନଙ୍କ ସମସ୍ୟାର ମୁକାବିଲା ପାଇଁ ଏବଂ ସେମାନଙ୍କ ଯୋଗୁଁ ମୃତ୍ୟୁବରଣ କରିଥିବା ବ୍ୟକ୍ତିଙ୍କୁ କ୍ଷତିପୂରଣ ଦେବା ପାଇଁ ପ୍ରସାଦ ସରକାରଙ୍କୁ ଏହି ଯୋଜନା ସହ ଜଡିତ ଏକ ପ୍ରଶ୍ନ ପଚାରିଥିଲେ। ଏହାର ଉତ୍ତରରେ ଧରମପାଲ ସିଂ କହିଛନ୍ତି ଯେ ଏମାନେ ଦିଗହରା ଗାଈ ନୁହଁନ୍ତି। ସେମାନଙ୍କୁ ବେସାହାରା ଛାଡ଼ି ଦିଆଯାଉଛି। କିଏ ସେମାନଙ୍କୁ ଛାଡିଛନ୍ତି ସମସ୍ତେ ଜାଣନ୍ତି। ଯେତେବେଳେ ଗୋଟିଏ ଗାଈ କ୍ଷୀର ଦିଏ, ଏହାକୁ ରଖାଯାଏ ଏବଂ ଯେତେବେଳେ ଗାଈଟି କ୍ଷୀର ଦେବା ବନ୍ଦ କରିଦିଏ, ସେତେବେଳେ ଗାଈକୁ ବେସାହାରା ଛାଡ଼ିଦିଆଯାଏ। ମେ’ ୧୫ ତାରିଖ ପର୍ଯ୍ୟନ୍ତ ରାଜ୍ୟର ସହରାଞ୍ଚଳ ତଥା ଗ୍ରାମାଞ୍ଚଳରେ ୬,୧୮୭ ଗୋରୁ ଆଶ୍ରୟ କେନ୍ଦ୍ର ପ୍ରତିଷ୍ଠା କରାଯାଇଛି। ସେଥିରେ ୮,୩୮,୦୧୫ ପ୍ରାଣୀଙ୍କୁ ରଖାଯାଇଛି।