ପାଟଣା: ରହସ୍ୟମୟ ଗୁମ୍ଫା । ରହସ୍ୟମୟ ଗୁମ୍ଫାରେ ରହସ୍ୟମୟ ଦ୍ୱାର ପାହାଡ଼ର ପାଦଦେଶରେ ରହିଛି ପଥରର ଚଟାଣ । ଆଉ ପଥର ଚଟାଣରେ ତିଆରି ହୋଇଛି ଗୁମ୍ଫା । ଗୁମ୍ଫା ଭିତରେ ରହିଛି ଟନ୍ ଟନ୍ ସୁନା । ସୁନାକୁ ସୁରକ୍ଷିତ ରଖିବା ପାଇଁ ଗୁମ୍ଫାର ଦ୍ୱାରକୁ ପଥର ଦେଇ ବନ୍ଦ କରିଦିଆଯାଇଛି । କଣ ରହିଛି ଗୁମ୍ଫାରେ, କେବଳ ସୁନା ରହିଛି ନା ଆଉ କିଛି ଅମୂଲ୍ୟ ସମ୍ପଦ ରହିଛି । ଏହାର ରହସ୍ୟ ଭେଦ କରିବାକୁ ଇଂରେଜମାନେ ଶତ ଚେଷ୍ଟା କରିଥିଲେ । ହେଲେ ବିଫଳ ହୋଇଥିଲେ । ତୋପରେ ଗୁମ୍ଫାର ଦ୍ୱାରକୁ ଉଡ଼ାଇ ଦେବାକୁ ମଧ୍ୟ ପ୍ରୟାସ କରିଥିଲେ । କିନ୍ତୁ କିଛି ଲାଭ ହୋଇନଥିଲା, ଏହି ରହସ୍ୟମୟ ଗୁମ୍ଫାର ରହସ୍ୟ ଉନ୍ମୋଚନ ହୋଇପାରିନଥିଲା ।..
Sambad is now on WhatsApp
Join and get latest news updates delivered to you via WhatsApp
ଏହି ରହସ୍ୟମୟ ସ୍ୱର୍ଣ୍ଣ ଭଣ୍ଡାର ଗୁମ୍ଫା ରହିଛି ବିହାରର ରାଜଗିରି ଜିଲ୍ଲାରେ । ପ୍ରାଚୀନ କାଳରେ ମଗଧର ରାଜଧାନୀ ଥିଲା ରାଜଗିରି । ଏଠାରେ ସମ୍ରାଟ୍ ବିମ୍ବିସାରଙ୍କୁ ଧର୍ମୋପଦେଶ ଦେଇଥିଲେ ଭଗବାନ ବୁଦ୍ଧ । ପୁଅ ଅଜାତଶତ୍ରୁକୁ ନଜଣାଇ ବିମ୍ବିସାର ଏହି ଗୁମ୍ଫାରେ ହିଁ ଟନ୍ ଟନ୍ ସୁନା ଲୁଚାଇ ରଖିଥିଲେ । ଏହି ଗୁମ୍ଫା ନିକଟରେ ରହିଛି ଏକ ପୁରାତନ ଜେଲ୍ । ଏହି ଜେଲରେ ବିମ୍ବିସାରଙ୍କୁ ବନ୍ଦୀ କରି ରଖିଥିଲେ ଅଜାତଶତ୍ରୁ ।
ସୁନା ଗୁମ୍ଫାର ଦ୍ୱାର ଦେଶରେ ରହିଛି ଏକ ବିଶାଳ, ଶକ୍ତ ପଥର । ଏହି ପଥରରେ ବିମ୍ବିସାରଙ୍କ ସମୟରେ ପ୍ରଚଳିତ ଶଙ୍ଖ ଭାଷାରେ କିଛି ଲେଖାଯାଇଛି । କୁହାଯାଉଛି କି ଦ୍ୱାର ଖୋଲିବାର ରହସ୍ୟ ଏହି ଲେଖାରେ ରହିଛି । ତେବେ ଏହି ଶଙ୍ଖଭାଷା ଆଜି ଦିନରେ କେହି ପଢିପାରୁନଥିବାରୁ ଏଥିରେ କଣ ଲେଖାହୋଇଛି ତାହା କେହି ଜାଣିପାରୁ ନାହାନ୍ତି ।.. ସୁନା ଭଣ୍ଡାର ଗୁମ୍ଫାର ପ୍ରବେଶ ପଥରେ ଏକ ବଡ କୋଠରୀ ରହିଛି । କୁହାଯାଉଛି କି ଏହି କୋଠରୀରେ ସୁନାକୁ ରକ୍ଷା କରିବା ପାଇଁ ସଶସ୍ତ୍ର ସୈନିକ ରହିଥାନ୍ତି ।
ସ୍ଥାନୀୟ ଲୋକେ ବିଶ୍ୱାସ କରନ୍ତି କି ଦ୍ୱାପର ଯୁଗରେ ଏହି ଗୁମ୍ଫା ଭିତରେ ରହିଥିଲା ମଗଧ ସମ୍ରାଟ୍ ଜରାସନ୍ଧଙ୍କ ସ୍ୱର୍ଣ୍ଣ ଭଣ୍ଡାର । ତେବେ ସତରେ କଣ ଏହି ଗୁମ୍ଫାରେ ରହିଛି ସରାସନ୍ଧଙ୍କ ସ୍ୱର୍ଣ୍ଣ ଭଣ୍ଡାର, ସତରେ କଣ ଏଇଠି ସମ୍ରାଟ୍ ବିମ୍ବିସାର ଲୁଚାଇ ରଖିଛନ୍ତି ଟନ୍ ଟନ୍ ସୁନା । ଯେତେବେଳେ ଏହି ଗୁମ୍ଫାର ଦ୍ୱାର ଖୋଲିବ ସେତେବେଳେ ଯାଇ ସବୁ ରହସ୍ୟ ଉନ୍ମୋଚନ ହେବ । ଆଉ ସେତେଦିନ ପର୍ଯ୍ୟନ୍ତ ରହସ୍ୟମୟ ହୋଇ ରହିଥିବା ରାଜଗିରିର ଏହି ସ୍ୱର୍ଣ୍ଣ ଭଣ୍ଡାର ଗୁମ୍ଫା।