ଲକଡାଉନ-୪.୦: ଏସବୁ କଟକଣା ଜାରି ରହିବ
ରାଜ୍ୟ ସରକାରଙ୍କୁ ଦିଆଗଲା ପ୍ରମୁଖ ଦାୟିତ୍ୱ
ନୂଆଦିଲ୍ଲୀ: ମେ ୩୧ ଯାଏଁ ସାରା ଦେଶରେ ଲକଡାଉନର ଅବଧି ବଢିଛି | ଆଉ ଚତୁର୍ଥ ପର୍ଯ୍ୟାୟ ଲକଡାଉନ ପାଇଁ କିଛି ଗାଇଡଲାଇନ ଜାରି କରାଯାଇଛି | ଗାଇଡଲାଇନରେ ସ୍ପଷ୍ଟ ଭାବେ କୁହାଯାଇଛି ଯେ ରାଜ୍ୟ ସରକାର ଏଣିକି ରେଡ, ଗ୍ରୀନ ଓ ଅରେଞ୍ଜ ଜୋନ ନିର୍ଦ୍ଧାରଣ କରିବେ | ସେହିପରି ବର୍ତ୍ତମାନ ତିନିଟି ଜୋନ ବଦଳରେ ୫ଟି ଜୋନ ରହିବ | ରେଡ, ଗ୍ରୀନ ଓ ଅରେଞ୍ଜ ଜୋନ ସହ ବଫର ଓ କଣ୍ଟେନମେଣ୍ଟ ଜୋନ ମଧ୍ୟ ରାଜ୍ୟ ସରକାର ସ୍ଥିର କରିବେ | ମୋଟାମୋଟି ଲକଡାଉନ-୪.୦ରେ ରାଜ୍ୟ ସରକାରମାନଙ୍କୁ ପ୍ରମୁଖ ଦାୟିତ୍ୱ ଦିଆଯାଇଛି |
Sambad is now on WhatsApp
Join and get latest news updates delivered to you via WhatsApp
ଏସବୁ ବନ୍ଦ ରହିବ
ଗାଇଡଲାଇନରେ କୁହାଯାଇଛି ଯେ ମେଟ୍ରୋ ଟ୍ରେନ ସେବା ସହ ସମସ୍ତ ବିମାନ ଉଡାଣ ବନ୍ଦ ରହିବ | ସମସ୍ତ ଅନ୍ତରାଷ୍ଟ୍ରୀୟ ଓ ଦେଶ ଭିତରେ ବିମାନ ଉଡାଣ ବନ୍ଦ ରହିବ| ଶ୍ରମିକଙ୍କୁ ନେଇ ଚାଲୁଥିବା ଏକ୍ସପ୍ରେସ ଛଡା ଅନ୍ୟ ସବୁ ପାସେଞ୍ଜର ଓ ଏକ୍ସପ୍ରେସ ଟ୍ରେନ ବନ୍ଦ ରହିବ | ସେହିପରି ଧାର୍ମିକ ଅନୁଷ୍ଠାନ, ସିନେମା ହଲ, ସୁଇମିଙ୍ଗ ପୁଲ, ବନ୍ଦ ରହିବ |
କୌଣସି ଧାର୍ମିକ, ସାମାଜିକ ଓ ରାଜନୈତିକ ବୈଠକ କରିବାକୁ ଅନୁମତି ଦିଆଯିବ ନାହିଁ | ସେହିପରି କଣ୍ଟେନମେଣ୍ଟ ଜୋନରେ କୌଣସି କଟକଣାକୁ କୋହଳ କରାଯିବ ନାହିଁ | ସନ୍ଧ୍ୟା ୭ଟାରୁ ସକାଳ ୭ଟା ଯାଏଁ ଲୋକଙ୍କ ଚଳପ୍ରଚଳ ଉପରେ ମଧ୍ୟ କଟକଣା ବଳବତ୍ତର ରହିଛି | ସେହିପରି ସ୍କୁଲ, କଲେଜ ବନ୍ଦ ରହିବ | ରେଷ୍ଟରାଣ୍ଟକୁ ହୋମ ଡେଲିଭରି ଅନୁମତି ଦିଆଯାଇଛି | ରାଜ୍ୟମାନଙ୍କ ମଧ୍ୟରେ ସହମତି ଭିତ୍ତିରେ ହିଁ ବସ ସେବା ଚାଲିପାରିବ |