କରୋନା ଟିକାକରଣ : ପୁଣି ଥରେ ୧ କୋଟି ମାଇଲଖୁଣ୍ଟ ଅତିକ୍ରମ କଲା ଭାରତ
ନୂଆଦିଲ୍ଲୀ : କରୋନା ଟିକାକରଣରେ ମଙ୍ଗଳବାର ପୁଣି ଥରେ ରେକର୍ଡ କରିଛି ଭାରତ । ଆଜି ସଂଧ୍ୟା ୬ଟା ସୁଦ୍ଧା ଦେଶରେ ୧ କୋଟି ୯ ଲକ୍ଷ ମାତ୍ରା ଟିକା ଦିଆଯାଇଛି । ଏବେ ବି ଟିକାକରଣ ଚାଲିଥିବାରୁ ଏହି ସଂଖ୍ୟା ଆହୁରି ବଢିବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ଲାଲ ମାଣ୍ଡଭିୟା ଏକ ଟୁଇଟ କରି ଏ ସମ୍ପର୍କରେ ସୂଚନା ଦେଇଛନ୍ତି । ଗତ ୫ ଦିନରେ ଭାରତ ଦୁଇଥର ୧ କୋଟି ଦୈନିକ ଟିକା ମାଇଲ ଖୁଣ୍ଟ ଅତିକ୍ରମ କରିଛି । ଆଜି ସଂଧ୍ୟା ୬ଟା ସୁଦ୍ଧା ୧ କୋଟି ୯ ଲକ୍ଷ ମାତ୍ରା ଟିକା ଦେଇ ଭାରତ ନିଜର ପୂର୍ବ ରେକର୍ଡକୁ ଟପିଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ଭାରତ କରୋନା ବିରୋଧରେ ଲଢେଇ କରିଚାଲିଛି ବୋଲି ସେ ଲେଖିଛନ୍ତି ।
1⃣ Crore, 2⃣ Times, in 5⃣ days
Congratulations, as India administers another 1 crore #COVID19 vaccinations today
Highest one-day record of 1.09 crore vaccine doses achieved till 6 pm – and still counting!
Under PM @NarendraModi ji, India is fighting strongly against corona. pic.twitter.com/ByEECsn1T5
— Mansukh Mandaviya (@mansukhmandviya) August 31, 2021
ସୂଚନାଯୋଗ୍ୟ ଯେ ଗତ ଶୁକ୍ରବାର ଭାରତ ପ୍ରଥମ ଥର ପାଇଁ ଗୋଟିଏ ଦିନରେ ୧ କୋଟି ମାତ୍ରା ଟିକା ଦେବାର ମାଇଲଖୁଣ୍ଟ ଅତିକ୍ରମ କରିଥିଲା । ସେ ଦିନ ମୋଟ ୧ କୋଟି ୬୪ ହଜାର ଟିକା ଦିଆଯାଇଥିଲା ।
ଅନ୍ୟପକ୍ଷରେ, ଟିକାକରଣ ଦୃଷ୍ଟିରୁ ଚଳିତ ଅଗଷ୍ଟ ମାସ ସବୁଠାରୁ ସଫଳ ମାସର ମାନ୍ୟତା ଲାଭ କରିବାକୁ ଯାଉଛି । କାରଣ ଚଳିତ ମାସରେ ଏପର୍ଯ୍ୟନ୍ତ ୧୭ କୋଟିରୁ ଅଧିକ ମାତ୍ରା ଟିକା ଦିଆଯାଇସାରିଲାଣି । ଏହାକୁ ମିଶାଇ ଦେଶରେ ଏପର୍ଯ୍ୟନ୍ତ ପ୍ରାୟ ୬୫କୋଟି ମାତ୍ରା ଟିକା ଦିଆଯାଇଛି । ଗତ ଜୁଲାଇ ମାସରେ ୧୩ କୋଟି ୪୫ ଲକ୍ଷ ଓ ଜୁନରେ ୧୧ କୋଟି ମାତ୍ରା କରୋନା ଟିକା ଦିଆଯାଇଥିଲା ।