୪ ସପ୍ତାହରେ କେରଳ ସଂକ୍ରମଣ ୨୩୩% ବୃଦ୍ଧି, ଦୈନିକ ସଂକ୍ରମଣ କେରଳରେ ସର୍ବାଧିକ
ନୂଆଦିଲ୍ଲୀ: କରୋନାକୁ ସଠିକ୍ ଭାବେ ମୁକାବିଲା କରିଥିବାରୁ ଦିନେ କେରଳ ଏଥିପାଇଁ ଆଦର୍ଶ ରାଜ୍ୟ ଭାବେ ପରିଗଣିତ ହୋଇଥିଲା। ଏବେ ସ୍ଥିତି ଓଲଟି ଯାଇଛି ଏବଂ କେରଳର ସଂକ୍ରମଣ ଚିନ୍ତା ବଢ଼ାଇଛି। ଉଭୟ କେରଳ ଏବଂ ପଶ୍ଚିମବଙ୍ଗରେ ମୋଟ୍ ସଂକ୍ରମଣ ମାମଲା ୩ ଲକ୍ଷ ଟପିଯାଇଛି। କେରଳରେ ଗତ ସୋମବାର ସଂକ୍ରମଣ କମ୍ ଥିଲେ ମଧ୍ୟ ଗତକାଲି ପୁଣି ୮,୭୬୪ ସଂକ୍ରମିତ ଚିହ୍ନଟ ହୋଇଛନ୍ତି। ତେବେ ଗତ ୭ ମାସ ଧରି ମହାରାଷ୍ଟ୍ରରେ ଦେଶର ଦୈନିକ ସଂକ୍ରମଣ ମାମଲା ସବୁଠୁ ଅଧିକ ରହେ କିନ୍ତୁ ଗତକାଲି ପ୍ରଥମ ଥର ପାଇଁ କେରଳରେ ଦୈନିକ ସଂକ୍ରମଣ ସବୁଠୁ ଅଧିକ ଥିଲା। ମହାରାଷ୍ଟ୍ରରେ ଗତକାଲି ସଂକ୍ରମଣ ୮ ହଜାର ୫୨୨ ଥିବାବେଳେ କେରଳର ସଂକ୍ରମଣ ୮ ହଜାର ୭୬୪ ରହିଛି।
Sambad is now on WhatsApp
Join and get latest news updates delivered to you via WhatsApp
ଦେଶରେ ସକ୍ରିୟ ମାମଲା ଲଗାତାର ୧୨ ଦିନ ଧରି କମ୍ ରହୁଛି। କିନ୍ତୁ କେରଳରେ ଠିକ୍ ବିପରୀତ କଥା ଦେଖିବାକୁ ମିଳିଛି। କେରଳରେ ସକ୍ରିୟ ମାମଲା ଲଗାତାର ବଢ଼ୁଛି। ଗତ ୪ ସପ୍ତାହରେ ଦେଶର ସକ୍ରିୟ ମାମଲା ୧୧ ପ୍ରତିଶତ କମିଛି। କିନ୍ତୁ କେରଳରେ ଗତ ୪ ସପ୍ତାହରେ ସକ୍ରିୟ ମାମଲା ୨୩୩ ପ୍ରତିଶତ ବୃଦ୍ଧି ହୋଇଛି। ଦେଶରେ ମୋଟ୍ ସକ୍ରିୟ ମାମଲାରୁ ୧୦ ପ୍ରତିଶତ କେରଳରେ ଚିହ୍ନଟ ହୋଇଛି। କେରଳ ଏବଂ ପଶ୍ଚିମବଙ୍ଗ ଯଥାକ୍ରମେ ସପ୍ତମ ଏବଂ ଅଷ୍ଟମ ରାଜ୍ୟରେ ଭାବେ ସଂକ୍ରମଣ ୩ ଲକ୍ଷ ଟପିଛି। ପୂର୍ବରୁ ମହାରାଷ୍ଟ୍ର, ଆନ୍ଧ୍ରପ୍ରଦେଶ, କର୍ଣ୍ଣାଟକ, ତାମିଲନାଡ଼ୁ, ଉତ୍ତରପ୍ରଦେଶ ଏବଂ ଦିଲ୍ଲୀରେ ସଂକ୍ରମଣ ୩ ଲକ୍ଷ ଟପିଥିଲା।