ଅଖିଳେଶଙ୍କ ପାଇଁ ବାରଣାସୀରେ ପ୍ରଚାର କରିବେ ମମତା
ଲଖନଉ: ଉତ୍ତରପ୍ରଦେଶରେ ହେବାକୁ ଥିବା ବିଧାନସଭା ନିର୍ବାଚନରେ ତୃଣମୂଳ କଂଗ୍ରେସ (ଟିଏମସି) ସମାଜବାଦୀ ଦଳକୁ ସମର୍ଥନ କରିବ। ଏଥିପାଇଁ ଆସନ୍ତା ମାସରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମସି ସୁପ୍ରିମୋ ମମତା ବାନାର୍ଜୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀ ଗସ୍ତ କରିବେ। ଟିଏମସି ନେତା ଲଳିତେଶ ତ୍ରିପାଠୀ କହିଛନ୍ତି ଯେ ମମତା ବାନାର୍ଜୀଙ୍କ ଗସ୍ତକୁ ନେଇ ଆମେ ଡିସେମ୍ବର ମାସରେ ଯୋଜନା କରିଥିଲୁ କିନ୍ତୁ ଏହା ସମ୍ଭବ ହୋଇପାରିନଥିଲା । ତେବେ ମମତା ଜାନୁଆରୀ ଦ୍ୱିତୀୟ ସପ୍ତାହରେ ବାରଣାସୀ ଆସିବେ ।
Sambad is now on WhatsApp
Join and get latest news updates delivered to you via WhatsApp
ଉତ୍ତରପ୍ରଦେଶରେ ହେବାକୁ ଥିବା ବିଧାନସଭା ନିର୍ବାଚନରେ ତୃଣମୂଳ କଂଗ୍ରେସର ଭୂମିକା କଣ ହେବ ପ୍ରଶ୍ନ ଉପରେ ସେ କହିଛନ୍ତି,ଯେ‘ ମମତା ବାନାର୍ଜୀ ଏହା ପୂର୍ବରୁ କହିଛନ୍ତି ଯେ ଯଦି ଏସପି(ସମାଜବାଦୀ ପାର୍ଟି) ଅଧ୍ୟକ୍ଷ ଅଖିଳେଶ ଯାଦବଙ୍କୁ ଆମର ସାହାଯ୍ୟ ଆବଶ୍ୟକ, ଆମେ ଏଥିପାଇଁ ପ୍ରସ୍ତୁତ’ | ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଏସପି ନେତା ଜୟା ବଚ୍ଚନ ତୃଣମୂଳ କଂଗ୍ରେସ ପାଇଁ ଭୋଟ୍ ମାଗିଥିଲେ। ତେଣୁ ଉତ୍ତରପ୍ରଦେଶରେ ଏସପି ପାଇଁ ଆମେ ମଧ୍ୟ ନିର୍ବାଚନ ପ୍ରଚାର କରିବୁ। ସେ କହିଛନ୍ତି, ‘ଆମର ଲକ୍ଷ୍ୟ ସମାନ। ବିଜେପିକୁ ପରାସ୍ତ କରିବାକୁ ଆମେ ଏସପି ଅଧ୍ୟକ୍ଷଙ୍କ ସହ ଅଛୁ’।
ସେହିପରି ଏସପିର ରାଷ୍ଟ୍ରୀୟ ଉପସଭାପତି କିରଣମୟ ନନ୍ଦା କହିଛନ୍ତି ଯେ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଅଖିଳେଶ ମମତା ବାନାର୍ଜୀଙ୍କ ଦଳକୁ ସମର୍ଥନ କରିଥିଲେ । ବାନାର୍ଜୀଙ୍କ ସହଯୋଗର ଅଫରକୁ ଆମେ ସ୍ୱାଗତ କରୁଛୁ | ଆମେ ବିଜେପିକୁ ପରାସ୍ତ କରିବାକୁ ଚାହୁଁ ଏବଂ ସେମାନଙ୍କର ସମାନ ଉଦ୍ଦେଶ୍ୟ ଅଛି। ଯଦି ସେ ଆମ ସହ ସହଯୋଗ କରନ୍ତି ତେବେ ଆମେ ଖୁସି ହେବୁ ଏବଂ ଆମେ ଏହାକୁ ସ୍ୱାଗତ କରିବୁ |