ନାନସି ପେଲୋସିଙ୍କ ସ୍ବାମୀଙ୍କ ଉପରେ ଆକ୍ରମଣ
ସାନ ଫ୍ରାନସିସକୋ : ଆମେରିକାର ସଂସଦର ନିମ୍ନ ସଦନର ବାଚସ୍ପତି ନାନସି ପେଲୋସିଙ୍କ ସ୍ବାମୀ ପଲ ପେଲୋସିଙ୍କ ଉପରେ ପ୍ରାଣାନ୍ତକ ଆକ୍ରମଣ ହୋଇଛି । ଶୁକ୍ରବାର ସକାଳେ ଜଣେ ବ୍ୟକ୍ତି ସାନ ଫ୍ରାନସିସକୋସ୍ଥିତ ପେଲୋସିଙ୍କ ଘରର ଝରକା ଭାଙ୍ଗି ଘରେ ଅନୁପ୍ରବେଶ କରିଥିଲା । ଉକ୍ତ ବ୍ୟକ୍ତି ପଲଙ୍କ ଉପରେ ଆକ୍ରମଣ କରିଥିଲା । ଏହି ଆକ୍ରମଣରେ ପଲ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଏହି ଆକ୍ରମଣ ସମୟରେ ନାନସି ପେଲୋସି ଘରେ ନଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହି ଘଟଣା ଉପରେ ଡେମୋକ୍ରାଟିକ ଦଳ ପକ୍ଷରୁ ଏକ ବୟାନ ଜାରି କରି କୁହାଯାଉଛି ଯେ, ଆକ୍ରମଣକାରୀକୁ ପୁଲିସ ଗିରଫ କରିଛି । ତେବେ ଆକ୍ରମଣର ଉଦ୍ଦେଶ୍ୟ ଜଣାପଡ଼ିନାହିଁ । ଏ ନେଇ ପୁଲିସ ତଦନ୍ତ ଚଳାଇଛି । ଗତ ମେ ମାସରେ ମଦ ପିଇ ଗାଡ଼ି ଚଳାଇବା ଓ ଦୁର୍ଘଟଣା ଘଟାଇବା ଅଭିଯୋଗରେ ପଲଙ୍କୁ ଜେଲ ଦଣ୍ଡାଦେଶ ହୋଇଥିଲା ।
ସୂଚନାଯୋଗ୍ୟ ଯେ, ଗତ ଅଗଷ୍ଟ ମାସରେ ନାନସି ପେଲୋସିଙ୍କ ତାଇଓ୍ବାନ ଗସ୍ତ ପରେ ଆମେରିକା ଓ ଚୀନ ମୁହାଁମୁହିଁ ଅବସ୍ଥାକୁ ଚାଲିଆସିଥିଲେ । ଚୀନ ଭୀଷଣ ପ୍ରତିକ୍ରିୟାଶୀଳ ହବା ସହ ତାଇଓ୍ବାନକୁ ଘେରି ବୃହତ ସମରାଭ୍ୟାସ କରିଥିଲା । ପରେ ଆମେରିକା ଓ ଚୀନର ଉଦ୍ୟମ ପରେ ସ୍ଥିତି ଶାନ୍ତ ହୋଇଥିଲା । କିନ୍ତୁ ଏବେ ବି ତାଇଓ୍ବାନ ଅଂଚଳରେ ଉତ୍ତେଜନା ଲାଗି ରହିଛି । ୨୦୨୪ରେ ଆମେରିକାରେ ନିର୍ବାଚନ ହେବାକୁ ଯାଉଥିବାବେଳେ ନାନସି ରାଷ୍ଟ୍ରପତି ଦୌଡ଼ରେ ସାମିଲ ହେବାର ସମ୍ଭାବନା ରହିଛି ।