ଜିଏସଟି ସଂଗ୍ରହ କ୍ଷେତ୍ରରେ ଶିଳ୍ପ ସମୃଦ୍ଧ ରାଜ୍ୟମାନଙ୍କୁ ପଛରେ ପକାଇଲା ଓଡ଼ିଶା
ନୂଆଦିଲ୍ଲୀ : ଜିଏସଟି ସଂଗ୍ରହ କ୍ଷେତ୍ରରେ ଓଡ଼ିଶା ଦେଶର ଅନ୍ୟ ଶିଳ୍ପ ସମୃଦ୍ଧ ରାଜ୍ୟମାନଙ୍କୁ ପଛରେ ପକାଇଦେଇଛି । ୨୦୧୯-୨୦ ଆର୍ଥିକ ବର୍ଷର ଏପ୍ରିଲ-ଜୁଲାଇ ୪ ମାସରେ ଓଡ଼ିଶାରେ ଜିଏସଟି ସଂଗ୍ରହ ହାର ଅନ୍ୟ ପ୍ରମୁଖ ରାଜ୍ୟମାନଙ୍କ ତୁଳନାରେ ଅଧିକ ରହିଛି । ଏହି ୪ ମାସରେ ଓଡ଼ିଶାର ଜିଏସଟି ସଂଗ୍ରହ ୨୦.୮ ପ୍ରତିଶତ ବୃଦ୍ଧି ପାଇ ୯୨୬୪ କୋଟି ଟଙ୍କାରେ ପହଞ୍ଚିଛି । ୨୦୧୮ର ଏହି ୪ ମାସରେ ଓଡ଼ିଶାରେ ଜିଏସଟି ସଂଗ୍ରହ ପରିମାଣ ୭୬୬୬ କୋଟି ଟଙ୍କା ଥିଲା ।
Sambad is now on WhatsApp
Join and get latest news updates delivered to you via WhatsApp
ଇଂରାଜୀ ଦୈନିକ ଟାଇମ୍ସ ଅଫ ଇଣ୍ଡିଆରେ ପ୍ରକାଶିତ ଏକ ରିପୋର୍ଟ ଅନୁସାରେ, କେବଳ ଓଡ଼ିଶା ନୁହେଁ, ଆଉ କେତେକ ଅପେକ୍ଷାକୃତ ପଛୁଆ ରାଜ୍ୟ ଉତ୍ତରାଖଣ୍ଡ, ବିହାର, ମଧ୍ୟପ୍ରଦେଶ,ଆସାମ ଓ ଉତ୍ତରପ୍ରଦେଶ ମଧ୍ୟ ଜିଏସଟି ସଂଗ୍ରହ କ୍ଷେତ୍ରରେ ଆଗୁଆ ରହିଛନ୍ତି । ଉତ୍ତରାଖଣ୍ଡର ଜିଏସଟି ରାଜସ୍ୱ ଅଭିବୃଦ୍ଧି ପରିମାଣ ୧୯.୯ ପ୍ରତିଶତ ଓ ବିହାରର ଜିଏସଟି ସଂଗ୍ରହ ଅଭିବୃଦ୍ଧି ୧୭.୮ ପ୍ରତିଶତ ରହିଛି । ଅନ୍ୟପକ୍ଷରେ ଏହି ୪ ମାସରେ ଶିଳ୍ପ ସମୃଦ୍ଧ ରାଜ୍ୟ ମହାରାଷ୍ଟ୍ରର ଜିଏସଟି ସଂଗ୍ରହ ପରିମାଣ ୭.୨ ପ୍ରତିଶତ ବୃଦ୍ଧି ପାଇ ୫୪୨୦୮ କୋଟି ଟଙ୍କାରେ ପହଞ୍ଚିଛି । ସେହିପରି କର୍ଣ୍ଣାଟକର ଜିଏସଟି ସଂଗ୍ରହ ପରିମାଣ ୧୦.୭ ପ୍ରତିଶତ ବୃଦ୍ଧି ପାଇ ୨୯୭୮୯ କୋଟି ଟଙ୍କାରେ ପହଞ୍ଚିଛି । ଗୁଜୁରାଟର ଜିଏସଟି ସଂଗ୍ରହ ହାର ମାତ୍ର ୬ ପ୍ରତିଶତ ବୃଦ୍ଧି ପାଇ ୨୪୬୬୩ କୋଟି ଟଙ୍କାରେ ପହଞ୍ଚିଛି ।