ରାଜ୍ୟସଭାରେ ବିଶୃଙ୍ଖଳିତ ଆଚରଣ ପାଇଁ ବିରୋଧୀ ସାଂସଦମାନେ ଦେଶବାସୀଙ୍କୁ କ୍ଷମା ମାଗନ୍ତୁ : ସରକାର
ସରକାର ଜାରି କଲେ ସିସିଟିଭି ଭିଡିଓ
ନୂଆଦିଲ୍ଲୀ : ରାଜ୍ୟସଭାରେ ଗତ ବୁଧବାର ହୋଇଥିବା ହଙ୍ଗାମାକୁ ନେଇ ଉଭୟ ଶାସକ ଓ ବିରୋଧ ଦଳ ପରସ୍ପରକୁ ଦୋଷାରୋପ କରିଛନ୍ତି । ଉଭୟ ପକ୍ଷ ପରସ୍ପର ଉପରେ ଗଣତନ୍ତ୍ରର ହତ୍ୟା କରୁଥିବା ଅଭିଯୋଗ ଆଣିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଏକ ସାମ୍ବାଦିକ ସମ୍ମିଳନୀରେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର କହିଛନ୍ତି ଯେ ବିରୋଧୀ ଦଳର ସାଂସଦମାନେ ମୌସୁମୀ ଅଧିବେଶନକୁ ଭଣ୍ଡୁର କରିବାକୁ ପୂର୍ବରୁ ଯୋଜନା କରିଆସିଥିଲେ । ସେହିପରି କେନ୍ଦ୍ରମନ୍ତ୍ରୀ ପ୍ରହଲ୍ଲାଦ ଯୋଷୀ କହିଛନ୍ତି ଯେ ବିରୋଧୀ ଦଳର ସାଂସଦମାନେ ସଦନର ଟେବୁଲ, ଚେୟାର ଭାଙ୍ଗିବା ସହ ମହିଳା ମାର୍ସାଲଙ୍କୁ ଦୁର୍ବ୍ୟବହାର କରିଥିଲେ । ନିଜର ଏହି ଅଭିଯୋଗକୁ ପ୍ରମାଣିତ କରିବାକୁ ସରକାରଙ୍କ ପକ୍ଷରୁ ଆଜି ଏକ ସିସିଟିଭି ଭିଡିଓ ଜାରି କରାଯାଇଛି । ଏଥିରେ ଦେଖାଯାଉଛି ଯେ ବିରୋଧୀ ଦଳ ସାଂସଦମାନେ ଟେବୁଲ ଉପରେ ଛିଡ଼ା ହେବା ସହ ସଦନରେ ଥିବା ସୁରକ୍ଷାକର୍ମୀ (ମାର୍ସାଲ)ମାନଙ୍କୁ ଠେଲାପେଲା କରୁଛନ୍ତି ।
ଅନ୍ୟପକ୍ଷରେ ବିରୋଧୀ ଦଳମାନଙ୍କ ପକ୍ଷରୁ ଆଜି ଦିଲ୍ଲୀର ଜନ୍ତରମନ୍ତରଠାରେ ଏକ ପ୍ରତିବାଦ ସଭା ଆୟୋଜନ କରି ଅଭିଯୋଗ କରାଯାଇଛି ଯେ ସଦନରେ ସେମାନଙ୍କୁ କହିବାକୁ ଦିଆଯାଉନାହିଁ । କଂଗ୍ରେସ ନେତା ରାହୁଲ ଗାନ୍ଧି କହିଛନ୍ତି ଯେ ବିରୋଧୀ ଦଳର ସାଂସଦମାନଙ୍କୁ ସଦନ ଭିତରେ ଆକ୍ରମଣ କରାଯାଇଛି । ସଂସଦ ବାହାରର ସୁରକ୍ଷାକର୍ମୀ ଆଣି ଆକ୍ରମଣ କରାଯାଇଛି । ଏହା ଗଣତନ୍ତ୍ରର ହତ୍ୟା ବୋଲି ସେ କହିଛନ୍ତି ।