ଅତ୍ୟାବଶ୍ୟକ ଚିକିତ୍ସା ସାମଗ୍ରୀ ପରିବହନରେ ବ୍ୟସ୍ତ ୪୯୦ ଲାଇଫ ଲାଇନ୍ ବିମାନ
ନୂଆଦିଲ୍ଲୀ : ଲାଇଫଲାଇନ ଉଡାଣ ଅଧୀନରେ ଏୟାର ଇଣ୍ଡିଆ, ଆଲାଏନ୍ସ ଏୟାର, ଇଣ୍ଡିଆନ ଏୟାର ଫୋର୍ସ ଏବଂ ଘରୋଇ ବିମାନର ସମନ୍ୱୟରେ ଲାଇଫଲାଇନ ବିମାନଗୁଡ଼ିକ ବର୍ତ୍ତମାନ ସୁଦ୍ଧା ୪,୭୩,୬୦୯ କିଲୋମିଟର ଦୂରତା ଅତିକ୍ରମ କରିସାରିଲେଣି । କୋଭିଡ-୧୯ ବିରୋଧୀ ଲଢେଇରେ ସହାୟତା କରିବା ପାଇଁ ଦେଶର ଦୂରବର୍ତ୍ତୀ ଅଞ୍ଚଳକୁ ଅତ୍ୟାବଶ୍ୟକ ଚିକିତ୍ସା ସାମଗ୍ରୀ ପହଞ୍ଚାଇବାରେ ବେସାମରିକ ବିମାନ ଚଳାଚଳ ମନ୍ତ୍ରାଳୟ ଦ୍ୱାରା ଏହି ବିମାନଗୁଡିକ ପରିଚାଳିତ ହେଉଛି। ଏପରିକି ‘ପବନ ହଂସ’ ହେଲିକପ୍ଟର ସେବା ଦ୍ୱାରା ଜମ୍ମୁ-କଶ୍ମୀର, ଲଦାଖ ଏବଂ ଉତ୍ତର ପୂର୍ବାଞ୍ଚଳକୁ ଗୁରୁତ୍ୱପୂର୍ଣ୍ଣ ଚିକିତ୍ସା ସାମଗ୍ରୀ ଓ ରୋଗୀମାନଙ୍କୁ ପରିବହନ କରାଯାଉଛି। ପବନ ହଂସ ୮ ମେ’ ୨୦୨୦ ସୁଦ୍ଧା ୨.୩୨ ଟନ୍ କାର୍ଗୋ ସହିତ ୮୦୦୧ କିଲୋମିଟର ଦୂରତା ଅତିକ୍ରମ କରିଛି ।
Sambad is now on WhatsApp
Join and get latest news updates delivered to you via WhatsApp
ଘରୋଇ କାର୍ଗୋ ଅପରେଟର ସ୍ପାଇସଜେଟ, ବ୍ଲୁ ଡାର୍ଟ, ଇଣ୍ଡିଗୋ ଏବଂ ଭିସ୍ତାରା ସଂସ୍ଥାଗୁଡ଼ିକ ବ୍ୟବସାୟିକ ଭିତ୍ତିରେ କାର୍ଗୋ ବିମାନ ପରିଚାଳନା କରୁଛନ୍ତି । ୨୪ ମାର୍ଚ୍ଚରୁ ୮ ମଇ ମଧ୍ୟରେ, ସ୍ପାଇସଜେଟ୍ ୬୫୮୭ ଟନ, ବ୍ଲୁ ଡାର୍ଟ ୫,୨୩୧ ଟନ୍, ଇଣ୍ଡିଗୋ ୩ ଏପ୍ରିଲରୁ ୮ ମଇ ମଧ୍ୟରେ ୫୮୫ ଟନ, ଭିସ୍ତାରା ୧୯ ଏପ୍ରିଲରୁ ୮ ମେ ମଧ୍ୟରେ ୩୨ ଟନ ମାଲ ପରିବହନ କରିପାରିଛି। ଏଥିରେ ଔଷଧ, ଚିକିତ୍ସା ଉପକରଣ ଏବଂ କୋଭିଡ-୧୯ ରିଲିଫ ସାମଗ୍ରୀ ରହିଛି। ଏୟାର ଇଣ୍ଡିଆ ୧୦୭୫ ଟନ୍ ଚିକିତ୍ସା ସାମଗ୍ରୀ ପରିବହନ କରିଥିବା ବେଳେ ଗ୍ୱାଙ୍ଗଝୋ ଓ ସାଂଘାଇରୁ ପ୍ରାୟ ୧୩୧ ଟନ ଏବଂ ହଂକଂରୁ ୨୪ ଟନ ମାଲ୍ ବ୍ଲୁ ଡାର୍ଟ ଦ୍ୱାରା ପରିବହନ କରାଯାଇଛି। ସ୍ପାଇସ ଜେଟ ସାଂଘାଇ ଓ ଗ୍ୱାଙ୍ଗଝୋରୁ ୨୦୫ ଟନ ଏବଂ ହଂକଂ ଓ ସିଙ୍ଗାପୁରରୁ ୨୧ ଟନ ଚିକିତ୍ସା ସାମଗ୍ରୀ ଉଠାଇଛି ।