ତ୍ରିଚି: ଏଣିକି ତାମିଲନାଡୁର ଜଣାଶୁଣା ରେଳ ଷ୍ଟେସନ ତ୍ରିଚି ପରିସରରେ ଥିବା ବୁକଷ୍ଟଲରେ ଦେଖିବାକୁ ମିଳିବନି ଚେତନ ଭଗତଙ୍କ ‘ହାଫ ଗାର୍ଲଫ୍ରେଣ୍ଡ’ ବହି ସହ ଖୁଶବନ୍ତ ସିଂଙ୍କ ଉପନ୍ୟାସ ‘ଓମେନ, ସେକ୍ସ, ଲଭ ଏଣ୍ଡ ଲଷ୍ଟ’ | କାରଣ ଏହି ଦୁଇଟି ବହିକୁ ବିକ୍ରି ନ କରିବାକୁ ନିର୍ଦ୍ଦେଶ ଦିଆଯାଇଛି | ରେଲୱେ ବୋର୍ଡର ଯାତ୍ରୀ ସେବା ସମିତି(ପିଏସସି) ଅଧ୍ୟକ୍ଷ ରମେଶ ଚନ୍ଦ୍ର ରତ୍ନ ପ୍ରସିଦ୍ଧ ଲେଖକ ଖୁଶବନ୍ତ ସିଂଙ୍କ ଉପନ୍ୟାସ ‘ଓମେନ, ସେକ୍ସ, ଲଭ ଏଣ୍ଡ ଲଷ୍ଟ’କୁ ନେଇ ଆପତ୍ତି ଜଣାଇଛନ୍ତି | ସେ ରେଳ ଷ୍ଟେସନରେ ଥିବା ବୁକ ଷ୍ଟଲରୁ ଏହି ବହି ହଟାଇବାକୁ ନିର୍ଦ୍ଦେଶ ଦେଇଛନ୍ତି | ରତ୍ନ, ଚେତନ ଭଗତଙ୍କ ପୁସ୍ତକ ‘ହାଫ ଗାର୍ଲଫ୍ରେଣ୍ଡ’ ବହିକୁ ମଧ୍ୟ ଷ୍ଟେସନ ପରିସରରେ ବିକ୍ରି ନ କରିବାକୁ ନିର୍ଦ୍ଦେଶ ଦେଇଛନ୍ତି | ଏହା ପୂର୍ବରୁ ମଧ୍ୟପ୍ରଦେଶର ଭୋପାଳରେ ମଧ୍ୟ ଏହି ବହିକୁ ବିକ୍ରି ନ କରିବାକୁ ରତ୍ନ ନିର୍ଦ୍ଦେଶ ଦେଇଥିଲେ |
Sambad is now on WhatsApp
Join and get latest news updates delivered to you via WhatsApp
ଏବାବଦରେ ରମେଶ ଚନ୍ଦ୍ରଙ୍କ କହିବା କଥା ଯେ ଏହାକୁ ପଢିବା ଆବଶ୍ୟକ ନାହିଁ, ଏହାର ପ୍ରଛଦ ପୃଷ୍ଠା ହିଁ ବହି ଭିତରେ କଣ ଲେଖାଯାଇଛି ତାହା ଦର୍ଶାଉଛି | ରେଳ ଆଇନ ଏଭଳି ଅଶ୍ଳୀଳ ପୁସ୍ତକ ବିକ୍ରି ରୋକିବାକୁ ଅଧିକାର ଦେଇଛି ବୋଲି ରତ୍ନ କହିଛନ୍ତି |
ଏଠାରେ ସୂଚନା ଥାଉ କି ପଦ୍ମ ବିଭୂଷଣ ପୁରସ୍କାରରେ ସମ୍ମାନିତ ଖୁଶବନ୍ତ ସିଂଙ୍କ ଉପନ୍ୟାସ ‘ଓମେନ, ସେକ୍ସ, ଲଭ ଏଣ୍ଡ ଲଷ୍ଟ’ ତାଙ୍କର କିଛି ସର୍ବଶ୍ରେଷ୍ଠ ରଚନା ମଧ୍ୟରୁ ଗୋଟିଏ ବୋଲି ସମସ୍ତେ ଜାଣନ୍ତି | ସେହିପରି ହାଫ ଗାର୍ଲଫ୍ରେଣ୍ଡ ପୁସ୍ତକ ମଧ୍ୟ ଯୁବପିଢ଼ିଙ୍କ ମଧ୍ୟରେ ବେଶ ଆଦୃତି ପାଇଥିଲା | ଏହାକୁ ନେଇ ସିନେମା ମଧ୍ୟ ନିର୍ମାଣ ହୋଇଥିଲା |