ଡେରାଡୁନ : ବଦ୍ରିନାଥ ଓ କେଦାରନାଥ ଧାମରେ ଲଗାଣ ବର୍ଷା ଓ ତୁଷାରପାତ ପ୍ରଶାସନ ତଥା ତୀର୍ଥଯାତ୍ରୀଙ୍କ ପାଇଁ ସମସ୍ୟା ପାଲଟିଛି । ସୋମବାର ବଦ୍ରିନାଥ ଓ କେଦାରନାଥ ଧାମରେ ପ୍ରବଳ ତୁଷାରପାତ ଓ ବର୍ଷା ହେବା ପରେ ସତର୍କତାମୂଳକ ପଦକ୍ଷେପ ସ୍ୱରୂପ ଚାରିଧାମ ଯାତ୍ରାକୁ ବନ୍ଦ କରି ଦିଆଯାଇଛି ଓ ଯାତ୍ରୀମାନଙ୍କୁ ଶ୍ରୀନଗରରେ ଅଟକାଯାଇଛି ।
Sambad is now on WhatsApp
Join and get latest news updates delivered to you via WhatsApp
ପୌଡ଼ି ଏସଏସପି ଶ୍ୱେତା ଚୌବେ କହିଛନ୍ତି, ବଦ୍ରିନାଥ ଏବଂ କେଦାରନାଥରେ ଲଗାଣ ତୁଷାରପାତ ଏବଂ ପ୍ରବଳ ବର୍ଷା ଯୋଗୁଁ ବଦ୍ରିନାଥ ଏବଂ କେଦାରନାଥ ଯାଉଥିବା ତୀର୍ଥଯାତ୍ରୀଙ୍କୁ ଶ୍ରୀନଗର ଗଡ଼ୱାଲରେ ଅଟକାଇ ଦିଆଯାଇଛି । ପାଗ ସଫା ନ ହେବା ପର୍ଯ୍ୟନ୍ତ ଯାତ୍ରୀମାନଙ୍କୁ ଶ୍ରୀନଗରରେ ରହିବାକୁ ଅନୁରୋଧ କରାଯାଇଛି ।
ପାଣିପାଗ ବିଭାଗ ପକ୍ଷରୁ ଉତ୍ତରାଖଣ୍ଡରେ ଅରେଞ୍ଜ ଆଲର୍ଟ ଜାରି କରାଯାଇଛି। ଏଠାରେ କେଦାରନାଥ ଓ ବଦ୍ରିନାଥରେ ପ୍ରବଳ ତୁଷାରପାତ ଓ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ପାଣିପାଗ ବିଜ୍ଞାନୀଙ୍କ ସୂଚନା ଅନୁଯାୟୀ, ମେ ୧ରୁ ୪ ତାରିଖ ପର୍ଯ୍ୟନ୍ତ ପାଗ ଖରାପ ରହିବ। ସୋମବାର ମଧ୍ୟ କେଦାରନାଥ ଧାମରେ ପ୍ରବଳ ତୁଷାରପାତ ହୋଇଥିବାରୁ ଏଠାରେ ଶୀତ ବଢ଼ିଛି । ସେପଟେ ବରଫପାତ ଯୋଗୁଁ ରାସ୍ତା ବନ୍ଦ ହେବା ଭୟରେ ଶ୍ରୀନଗରରେ ଯାତ୍ରୀଙ୍କୁ ଅଟକାଇ ଦିଆଯାଇଛି । ପାଗ ଠିକ୍ ନ ହେବା ପର୍ଯ୍ୟନ୍ତ ଯାତ୍ରୀଙ୍କୁ ଆଗକୁ ନଯିବାକୁ ନିବେଦନ କରାଯାଇଛି ।