ଉନ୍ନାଓ ଦୁଷ୍କର୍ମ ମାମଲା: ବିଧାୟକ ସେଙ୍ଗର୍ ଦୋଷୀ ସାବ୍ୟସ୍ତ
ଚାର୍ଜସିଟ୍ରେ ବିଳମ୍ବ ପାଇଁ ସିବିଆଇକୁ ଭର୍ତ୍ସନା
ନୂଆଦିଲ୍ଲୀ: ଉତ୍ତରପ୍ରଦେଶର ବହୁଚର୍ଚିତ ଉନ୍ନାଓ ନାବାଳିକାଙ୍କୁ ଅପହରଣ ଓ ଦୁଷ୍କର୍ମ ମାମଲାରେ ବହିଷ୍କୃତ ବିଜେପି ବିଧାୟକ କୁଲଦୀପ ସିଂହ ସେଙ୍ଗର ଆଜି ଦୋଷୀସାବ୍ୟସ୍ତ ହୋଇଛନ୍ତି। ଆଇପିସିର ଧାରା ୩୭୬ ଏବଂ ପୋକ୍ସୋ ଆଇନର ଧାରା ୫ ଏବଂ ୬ ଅଧୀନରେ ଦିଲ୍ଲୀର ତିସ୍ ହଜାରୀ କୋର୍ଟ ସେଙ୍ଗର୍ଙ୍କୁ ଦୋଷୀସାବ୍ୟସ୍ତ କରିଛନ୍ତି। ତେବେ ମାମଲାରୁ ଅନ୍ୟ ଜଣେ ଅଭିଯୁକ୍ତ ଶଶି ସିଂହଙ୍କୁ ଜିଲ୍ଲା ବିଚାରପତି ଧର୍ମେଶ ଶର୍ମା ଦୋଷମୁକ୍ତ କରିଛନ୍ତି। ତଦନ୍ତକାରୀ ସଂସ୍ଥା ସିବିଆଇ ଉକ୍ତ ମାମଲାରେ ଚାର୍ଜସିଟ୍ ଦାଖଲ କରିବାରେ ବିଳମ୍ବ କରିଥିବାରୁ କୋର୍ଟ ଭର୍ତ୍ସନା କରିଛନ୍ତି। ସିବିଆଇ ଉକ୍ତ ମାମଲାରେ ଚାର୍ଜସିଟ୍ ଦାଖଲ କରିବାପାଇଁ ବର୍ଷେ କାହିଁକି ନେଲା ବୋଲି କୋର୍ଟ ପ୍ରଶ୍ନ କରିଛନ୍ତି। ସିବିଆଇ ଚାର୍ଜସି୍ଟ୍ ଦାଖଲ କରିବାରେ ବିଳମ୍ବ କରିବାରୁ ମାମଲାରେ ବିଚାରରେ ବିଳମ୍ବ ହୋଇଛି ବୋଲି କୋର୍ଟ କହିଛନ୍ତି। ଆସନ୍ତାକାଲି ସେଙ୍ଗରଙ୍କ ବିରୋଧରେ କୋର୍ଟ ଦଣ୍ଡାଦେଶ ଘୋଷଣା କରିବେ।
Sambad is now on WhatsApp
Join and get latest news updates delivered to you via WhatsApp
ଆଜି କୋର୍ଟ ରାୟ ଆସିବାପରେ ସେଙ୍ଗର କୋର୍ଟରେ କାନ୍ଦି ପକାଇଥିଲେ। ତେବେ ଦୀର୍ଘ ଦୁଇବର୍ଷ ଧରି ପୀଡ଼ିତା ନ୍ୟାୟ ପାଇଁ ଯେଉଁ ସଂଘର୍ଷ କରିଛନ୍ତି ଏବଂ ସେଙ୍ଗରଙ୍କ ଭଳି ଜଣେ ଟାଣୁଆ ନେତା ବିରୋଧରେ ପୀଡ଼ିତା ଯେଭଳି ଲଢ଼ିଛନ୍ତି ସେଥିପାଇଁ କୋର୍ଟ ପୀଡ଼ିତାଙ୍କୁ ପ୍ରଶଂସା କରିଛନ୍ତି। ୨୦୧୭ରେ ଉନ୍ନାଓ ନାବାଳିକା ସେଙ୍ଗରଙ୍କ ଦ୍ବାରା ଦୁଷ୍କର୍ମର ଶିକାର ହୋଇଥିଲେ। ପୀଡ଼ିତା ଏବଂ ତାଙ୍କ ପରିବାର ସଦସ୍ୟ ବାରମ୍ବାର ପୁଲିସରେ ଅଭିଯୋଗ କରିବାକୁ ଉଦ୍ୟମ କରିଥିଲେ ମଧ୍ୟ ପୁଲିସ ଅଭିଯୋଗ ଗ୍ରହଣ କରିନଥିଲା। ସେଙ୍ଗର ସ୍ଥାନୀୟ ଅଂଚଳର ଜଣେ ଟାଣୁଆ ନେତା ହୋଇଥିବାରୁ ପୁଲିସ ଅଭିଯୋଗ ରଖିନଥିଲା ବୋଲି ପୀଡ଼ିତା ଅଭିଯୋଗ କରିଥିଲେ। ତେବେ ସେଙ୍ଗରଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପୀଡ଼ିତା ବାରମ୍ବାର ଦାବି କରିବା ପରେ ତାଙ୍କ ବାପାଙ୍କୁ ସେଙ୍ଗରଙ୍କ ଭାଇ ଗୁଣ୍ଡା ଲଗାଇ ମାରପିଟ୍ କରିଥିଲା ଏବଂ ତାଙ୍କୁ ମିଥ୍ୟା ମାମଲାରେ ଏପ୍ରିଲ ୩ରେ ଗିରଫ କରି ଜେଲ୍ ପଠାଯାଇଥିଲା। ଶେଷରେ ଉନ୍ନାଓ ପୀଡ଼ିତା ଉପାୟଶୂନ୍ୟ ହୋଇ ମୁଖ୍ୟମନ୍ତ୍ରୀଙ୍କ ବାସଭବନ ଆଗରେ ଆତ୍ମାହୁତି ଉଦ୍ୟମ କରିଥିଲେ। ଏହାପରେ ଏପ୍ରିଲ ୯ ତାରିଖରେ ଜେଲ୍ ହାଜତରେ ପୀଡ଼ିତାଙ୍କ ପିତାଙ୍କ ମୃତ୍ୟୁ ହୋଇଯାଇଥିଲା।।
ଉକ୍ତ ମାମଲାରେ ମଧ୍ୟ ବିଧାୟକ ସେଙ୍ଗର, ତାଙ୍କ ଭାଇ ଅତୁଲ ଏବଂ ଅନ୍ୟ ୯ ଜଣଙ୍କ ବିରୋଧରେ ହତ୍ୟା ମାମଲା ରୁଜୁ ହୋଇଥିଲା। ଏହି ମାମଲାରେ ଅତୁଲକୁ ପୁଲିସ ଗିରଫ କରିଥିଲା। । ତେବେ ଆହ୍ଲାବାଦ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ପୁଲିସ ସେଙ୍ଗରଙ୍କୁ ଗିରଫ କରିଥିଲା ଏବଂ ଏହି ମାମଲାର ତଦନ୍ତଭାର ସିବିଆଇକୁ ଦିଆଯାଇଥିଲା। ପ୍ରଥମେ ଲକ୍ଷ୍ନୌ କୋର୍ଟରେ ଉକ୍ତ ମାମଲାରେ ଶୁଣାଣି ଚାଲିଥିଲେ ମଧ୍ୟ ପରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ଲକ୍ଷ୍ନୌ କୋର୍ଟରୁ ଦିଲ୍ଲୀ କୋର୍ଟକୁ ସମସ୍ତ ମାମଲା ସ୍ଥାନାନ୍ତର କରାଯାଇଥିଲା। ଉକ୍ତ ଦୁଷ୍କର୍ମ ମାମଲା ବାଦ୍ ଅନ୍ୟ ୪ଟି ମାମଲା ତଥା ପୀଡ଼ିତାଙ୍କ ବାପାଙ୍କୁ ବେଆଇନ ଅସ୍ତ୍ର କାରବାର ମାମଲାରେ ଫସାଇବା ଏବଂ ଜେଲ୍ରେ ତାଙ୍କର ମୃତ୍ୟୁ ମାମଲା, ଗତ ଜୁଲାଇରେ ପୀଡ଼ିତାଙ୍କ କାର୍ ଦୁର୍ଘଟଣାରେ ସେଙ୍ଗରଙ୍କ ଷଡ଼ଯନ୍ତ୍ର ଏବଂ ଅନ୍ୟ ୩ ଜଣଙ୍କ ଦ୍ବାରା ପୀଡ଼ିତାଙ୍କୁ ଦୁଷ୍କର୍ମ ମାମଲାରେ ବିଚାର ଜାରି ରହିଛି। ଉକ୍ତ ମାମଲାରେ ପୀଡ଼ିତାଙ୍କ ମା’ ଏବଂ ତାଙ୍କ ମାମୁଁ ମୁଖ୍ୟ ସାକ୍ଷୀ ଥିଲେ। ଉଲ୍ଲେଖଯୋଗ୍ୟ ଚଳିତ ବର୍ଷ ଜୁଲାଇରେ ଉତ୍ତରପ୍ରଦେଶର ରାଏବରେଲିରେ ପୀଡ଼ିତାଙ୍କ କାର୍କୁ ଏକ ଦ୍ରୁତଗାମୀ ଟ୍ରକ୍ ଧକ୍କା ଦେଇଥିଲା। ଏହା ଫଳରେ ପୀଡ଼ିତାଙ୍କ ଦୁଇ ମାଉସୀଙ୍କର ମୃତ୍ୟୁ ହୋଇଯାଇଥିଲା ଏବଂ ପୀଡ଼ିତା ଓ ତାଙ୍କ ଆଇନଜୀବୀ ଗୁରୁତର ଥିଲେ। ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ଉନ୍ନାଓ ପୀଡ଼ିତା ଏବଂ ତାଙ୍କ ପରିବାର ସଦସ୍ୟଙ୍କୁ ସିଆରପିଏଫ୍ ସୁରକ୍ଷା ଦିଆଯାଉଛି।