କଣ୍ଟ୍ରୋଲ ଦୋକାନରେ ସାନିଟାଇଜର, ଫେସ ମାସ୍କ ବିକିବାକୁ ରାଜ୍ୟମାନଙ୍କୁ କହିଲା କେନ୍ଦ୍ର
ନୂଆଦିଲ୍ଲୀ : କରୋନା ଭାଇରସ ଯୋଗୁଁ ଦେଶରେ ହଠାତ ବଜାରରୁ ସାନିଟାଇଜର ଓ ଫେସ ମାସ୍କ ଉଭାନ ହୋଇଯାଇଛି । ଅସାଧୁ ଓ ଜମାଖୋର ବ୍ୟବସାୟୀମାନ ଏଗୁ଼ଡ଼ିକର କଳାବଜାର ଆରମ୍ଭ କରିଦେଇଥିବା ଆଲୋଚନା ହେଉଛି । ଫଳରେ ଲୋକମାନେ ଏସବୁ ସାମଗ୍ରୀ ପାଇପାରୁନାହାନ୍ତି । ଏହି ସମସ୍ୟାକୁ ଦୃଷ୍ଟିରେ ରଖି ଏସବୁ ସାମଗ୍ରୀ ଗୁଡ଼କୁ ସରକାରୀ କଣ୍ଟ୍ରୋଲ ଦୋକାନମାଧ୍ୟମରେ ସାଧାରଣ ଲୋକମାନଙ୍କୁ ଯୋଗାଇଦେବାକୁ କେନ୍ଦ୍ର ଖାଉଟି ବ୍ୟାପାର ମନ୍ତ୍ରାଳୟ ପକ୍ଷରୁ ରାଜ୍ୟ ସରକାରମାନଙ୍କୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଦେଶରେ କରୋନା ଭାଇରସ ଜନିତ ପରିସ୍ଥିତିର ସମୀକ୍ଷା କରିବା ଅବସରରେ ଖାଉଟି ସଚିବ ପଓ୍ଵନ ଅଗ୍ରଓ୍ଵାଲ ରାଜ୍ୟ ସରକାରମାନଙ୍କୁ ଏହି ପରାମର୍ଶ ଦେଇଛନ୍ତି । ରାଜ୍ୟମାନେ ଏହି ପ୍ରସ୍ତାବରେ ରାଜି ହୋଇଛନ୍ତି ଓ କେତେକ ରାଜ୍ୟ ବଣ୍ଟନ ଆରମ୍ଭ କରିଦେଲେଣି ବୋଲି ସେ କହିଛନ୍ତି ।
ଅନ୍ୟପକ୍ଷରେ ସରକାରଙ୍କ ପକ୍ଷରୁ ସାନିଟାଇଜର ଓ ଫେସ ମାସ୍କର ସର୍ବୋଚ୍ଚ ମୂଲ୍ୟ ନିର୍ଦ୍ଧାରଣ କରାଯାଇଛି । ଏକ ୨୦୦ ମିଲି ସାନିଟାଇଜର ବୋତଲର ମୂଲ୍ୟ ୧୦୦ ଟଙ୍କାରୁ ଅଧିକ ହେବ ନାହିଁ । ସେହିପରି ଥ୍ରୀପ୍ଲାଇ ସର୍ଜିକାଲ ମାସ୍କର ମୂଲ୍ୟ ୧୦ ଟଙ୍କାରୁ ଅଧିକ ହେବ ନାହିଁ ଓ ଟୁ-ପ୍ଲାଇ ସର୍ଜିକାଲ ମାସ୍କର ମୂଲ୍ୟ ୮ ଟଙ୍କାରୁ ଅଧିକ ହେବ ନାହିଁ ବୋଲି ସରକାରୀ ବିଜ୍ଞପ୍ତିରେ କୁହାଯାଇଛି । ଏହି ନିର୍ଦ୍ଦେଶ ତୁରନ୍ତ ଲାଗୁ ହୋଇଛି ।