ଭୁବନେଶ୍ବର : ଚନ୍ଦନ ଲେପି ଦେବି କି ଶ୍ରୀଅଙ୍ଗେ ମଣିମା… ଗୀତରୁ ଆରମ୍ଭ ହୋଇଥିଲା କାର୍ଯ୍ୟକ୍ରମ। ଏହି ଗୀତକୁ ସୋହିନୀ ମିଶ୍ର ପରିବେଷଣ କରିଥିଲେ। ଏହାପରେ ବହୁ ମନଛୁଆଁ ସୁପରହିଟ୍ ଗୀତ ଭେଟି ଦେଇଥିଲେ ଅନେକ ସ୍ବନାମଧନ୍ୟ କଣ୍ଠଶିଳ୍ପୀ। ଅବସର ଥିଲା ପ୍ରଖ୍ୟାତ ସଂଗୀତଜ୍ଞ ପ୍ରଫୁଲ୍ଲ କରଙ୍କ ୮୩ତମ ଜୟନ୍ତୀ। ରବୀନ୍ଦ୍ର ମଣ୍ଡପରେ ଆୟୋଜିତ ଏହି କାର୍ଯ୍ୟକ୍ରମରେ ବହୁ ପ୍ରଫୁଲ୍ଲ ପ୍ରେମୀ ଯୋଗଦେଇ ସଂଗୀତର ଭରପୂର ମଜା ନେଇଥିଲେ।
Sambad is now on WhatsApp
Join and get latest news updates delivered to you via WhatsApp
ରଶ୍ମିତା ଦାସଙ୍କ ‘ଅଥଳ ସାଗରେ କୂଳ ପାରୁନି ଦେଖି’ ଗୀତ ପ୍ରେକ୍ଷାଳୟ ପରିସରକୁ ଭକ୍ତିମୟ କରିଦେଇଥିଲା। ଏହାପରେ ଆଦ୍ୟାଶା ଦାସ ଢାଳି ଦିଅ ସାରା ଧରଣୀରେ ଆଜି… ପରିବେଷଣ କରିଥିଲେ। କଣ୍ଠଶିଳ୍ପୀ ଛନ୍ଦା ମିଶ୍ରଙ୍କ ‘କେଉଁ ନାମ ଧରି ଡାକିବୁ ତୁମକୁ’, ଅନନ୍ୟା ନନ୍ଦଙ୍କ କଣ୍ଠରୁ ‘ନେଇ ଯା’ରେ ମେଘ ମତେ ଦେ ଛାଡ଼ି ସେଇ ଦେଶେ ମୋ ପ୍ରିୟା ପାଶେ’… ଗୀତକୁ ଦର୍ଶକ ମାନେ ଉପଭୋଗ କରିଥିଲେ। ଅନ୍ତରା ଚକ୍ରବର୍ତ୍ତୀ ‘ରଜନୀ ଗୋ ମୋ ପ୍ରିୟା ନୟନେ’ ଗୀତରେ କଣ୍ଠଦାନ କରିଥିଲେ। ସେହିପରି ଲତା ମଙ୍ଗେଶକରଙ୍କ ସ୍ମୃତିରେ ମହମ୍ମଦ ଅବିଦ୍ ‘ଅଗର ତୁମ ନ ହୋତେ…’ ଏବଂ କଣ୍ଠଶିଳ୍ପୀ ଶର୍ମିଳାଙ୍କ ‘ତେରେ ମେରେ ବିଚ୍ ମେ କୈସା ହେ ୟେ ବନ୍ଧନ ଅଞ୍ଜନା’ ଗୀତ ଦର୍ଶକମାନଙ୍କୁ ଲତାଙ୍କ ପୁରୁଣା ସ୍ମୃତିକୁ ମନେ ପକେଇଦେଇଥିଲା। ପରେ ମହାପ୍ରସାଦ କରଙ୍କ ‘କମଳ ଦେଶର ରାଜ କୁମାର…’ ଭଳି ଚିର ସବୁଜ ଗୀତରେ ହଜିଯାଇଥିଲେ ଶ୍ରୋତା। ଚିତ୍ତ ଜେନାଙ୍କ ସେହି ପୁରୁଣା ଗୀତ ‘ପୁତ୍ର ସ୍ନେହେ ହେଲୁ ବାଇଗୋ ଯଶୋଦେ…’ ଗୀତକୁ ମହାପ୍ରସାଦ କର ପରିବେଷଣ କରିଥିବା ବେଳେ ଏହା ସଂଗୀତ ପ୍ରେମୀଙ୍କ ଆଖିରେ ଲୁହ ଆଣିଦେଇଥିଲା। ପରେ ମହାଦୀପ କର ଓ ମହାପ୍ରସାଦ କର କାଳି କପାଳି ଗୀତକୁ ପରିବେଷଣ କରିଥିଲେ। ଆଲୋ ମାଣିକ ଆଲୋ ମାଣିକ…, ମତୋ ବାନ୍ଧରେ ପୁଲିସ ବାବୁ…, ଟିକ୍ ଟିକ୍ ହୁଏ ମୋ ଛାତି…, ଆରେ ମିତ ଏ ସଂଗାତ…, ଏ ଫୁଲ କହ ଥରେ…, ହେ ଫଗୁଣ…, ଗୁଲ ଗୁଲି ଭଳି ଗୀତରେ ବହୁ ବିଶିଷ୍ଟ କଣ୍ଠଶିଳ୍ପୀ କଣ୍ଠଦାନ କରିଥିଲେ।
ଉତ୍ସବରେ ଅତିଥି ଭାବେ ଶିକ୍ଷାବିତ୍ ତଥା ସମାଜସେବୀ ଡ. ପ୍ରୀତି ଚାନ୍ଦ ଓ ନାଲ୍କୋ ନିର୍ଦ୍ଦେଶକ ରାଧେଶ୍ୟାମ ମହାପାତ୍ର ଯୋଗ ଦେଇଥିଲେ। କାର୍ଯ୍ୟକ୍ରମରେ ବିଶିଷ୍ଟ ସଂଗୀତଜ୍ଞ ପ୍ରଫୁଲ୍ଲ କର ଭର୍ଚୁଆଲ୍ ମାଧ୍ୟମରେ ଯୋଡ଼ି ହୋଇ ଘରେ ପରିବାର ସହ ସମସ୍ତ ଗୀତକୁ ଶୁଣିଥିଲେ। କାର୍ଯ୍ୟକ୍ରମକୁ ମୃତ୍ୟୁଞ୍ଜୟ ରଥ ସଂଯୋଜନା କରିଥିବା ବେଳେ ସଂସ୍କାରର ସାଧାରଣ ସଂପାଦକ ମହାଦୀପ କର ଧନ୍ୟବାଦ ଦେଇଥିଲେ।