ପ୍ରଥମ ମହିଳା ଟ୍ବେଣ୍ଟି-୨୦: ଭାରତକୁ ୯ ୱିକେଟ୍ରେ ହରାଇଲା ଅଷ୍ଟ୍ରେଲିଆ
ମୁମ୍ବାଇ : ଭାରତ ଗସ୍ତରେ ଥିବା ଭ୍ରମଣକାରୀ ଅଷ୍ଟ୍ରେଲିଆ ମହିଳା ଦଳ ପ୍ରଥମ ଟ୍ବେଣ୍ଟି-୨୦ ମ୍ୟାଚ୍ ଜିତିନେଇଛି। ଡି ୱାଇ ପାଟିଲ ଷ୍ଟାଡିୟମ୍ରେ ଶୁକ୍ରବାର ଖେଳାଯାଇଥିବା ଏହି ମ୍ୟାଚ୍ରେ ଓପ୍ନର ବେଥ୍ ମୁନିଙ୍କ ଅପରାଜିତ (୮୯* ରନ୍, ୫୭ ବଲ୍, ୧୬ ଚୌକା) ଅର୍ଦ୍ଧଶତକ ସାଙ୍ଗକୁ ଅବିଭାଜିତ ଦ୍ବିତୀୟ ୱିକେଟ୍ରେ ତାଲିହା ମ୍ୟାକ୍ଗ୍ରା (୪୦* ରନ୍, ୨୯ ବଲ୍, ୪ ଚୌକା, ୧ ଛକା)ଙ୍କ ସହ ୧୦୦ ରନ୍ (୫୬ ବଲ୍) ଭାଗୀଦାରି ବଳରେ ଅଷ୍ଟ୍ରେଲିଆ ୧୧ ବଲ୍ ପୂର୍ବରୁ ୯ ୱିକେଟ୍ରେ ଭାରତକୁ ପରାସ୍ତ କରିଛି। ଏକମାତ୍ର ୱିକେଟ୍ଟି ଦେବିକା ବୈଦ୍ୟଙ୍କୁ ମିଳିଥିଲା। ସେ ଏଲିସା ହିଲି (୩୭ ରନ୍, ୨୩ ବଲ୍, ୪ ଚୌକା, ୨ ଛକା)ଙ୍କୁ ଆଉଟ୍ କରିଥିଲେ। ଅଷ୍ଟ୍ରେଲିଆ ୧୮.୧ ଓଭରରେ ୧୭୩/୧ କରିନେଇଥିଲା। ମୁନି ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ ଟସ୍ ହାରି ବ୍ୟାଟିଂ ପାଇଥିବା ଘରୋଇ ଦଳ ଅଲ୍ରାଉଣ୍ଡର ଦୀପ୍ତି ଶର୍ମା (୩୬ ରନ୍, ୧୫ ବଲ୍, ୮ ଚୌକା), ୱିକେଟ୍ରକ୍ଷକ ରିଚା ଘୋଷ (୩୬ ରନ୍, ୨୦ ବଲ୍, ୫ ଚୌକା, ୨ ଛକା), ଓପ୍ନର ଶେଫାଳି ବର୍ମା (୨୧* ରନ୍, ୧୦ ବଲ୍, ୨ ଚୌକା, ୨ ଛକା)ଙ୍କ ବିସ୍ଫୋରକ ପାଳି ସାଙ୍ଗକୁ ସ୍ମୃତି ମନ୍ଧାନା (୨୮ ରନ୍, ୨୨ ବଲ୍, ୫ ଚୌକା), ଦେବିକା ବୈଦ୍ୟ (୨୫ ରନ୍, ୨୪ ବଲ୍, ୧ ଚୌକା, ୧ ଛକା) ଏବଂ ଅଧିନାୟିକା ହର୍ମନପ୍ରୀତ୍ କୌର (୨୧ ରନ୍, ୨୩ ବଲ୍, ୨ ଚୌକା)ଙ୍କ ଧୈର୍ଯ୍ୟପୁର୍ଣ୍ଣ ଅବଦାନ ବଳରେ ୫ ୱିକେଟ୍ ବିନିମୟରେ ୧୭୨ ରନ୍ କରିଥିଲା। ଅଷ୍ଟ୍ରେଲିଆ ପକ୍ଷରୁ ଏଲିସା ପେରି (୨/୧୦) ସଫଳ ବୋଲର ରହିଥିଲା ବେଳେ କିମ୍ ଗାର୍ଥ, ଆସ୍ଲେ ଗାର୍ଡନର, ଆନାବେଲ୍ ସଦରଲାଣ୍ଡ୍ ଗୋଟିଏ ଲେଖାଏଁ ୱିକେଟ୍ ପାଇଥିଲେ। ଦେବିକା ଓ ରିଚାଙ୍କ ମଧ୍ୟରେ ପଞ୍ଚମ ୱିକେଟ୍ରେ ହୋଇଥିବା ୫୬ ରନ୍ (୩୩ ବଲ୍) ଏବଂ ଦେବିକା ଓ ଦୀପ୍ତିଙ୍କ ମଧ୍ୟରେ ଅସମାପ୍ତ ଷଷ୍ଠ ୱିକେଟ୍ରେ ୪୦ ରନ୍ (୧୯ ବଲ୍)ର ଭାଗୀଦାରି ଭାରତୀୟ ପାଳିର ଉଲ୍ଲେଖନୀୟ ଥିଲା।