ଆଇପିଏଲ୍: ରୋମାଞ୍ଚକ ବିଜୟ ସହ ରାଜସ୍ଥାନ ଶୀର୍ଷରେ
ମୁମ୍ବାଇ: ଲକ୍ଷ୍ନୌ ସୁପରଜିଆଣ୍ଟ୍ସ ବିପକ୍ଷରେ ରାଜସ୍ଥାନ ରୟାଲ୍ସ ରବିବାର ୩ ରନ୍ର ଉତ୍କଣ୍ଠାପୂର୍ଣ୍ଣ ବିଜୟ ହାସଲ କରିଛି। ୧୬୬ ରନ୍ର ବିଜୟ ଲକ୍ଷ୍ୟକୁ ପିଛା କରୁଥିବା ଲକ୍ଷ୍ନୌ ୧୨୬ ରନ୍ରେ ୮ ୱିକେଟ୍ ହରାଇ ପରାଜୟ ଦ୍ବାର ଦେଶରେ ଥିଲା। ତେବେ ମାର୍କସ ଷ୍ଟୋଇନିସ୍ ମାତ୍ର ୧୭ ବଲ୍ରୁ ୩୮ ରନ୍ର ପାଳି ଖେଳି ଏହି ଦଳକୁ ମ୍ୟାଚ୍କୁ ଫେରାଇ ଆଣିଥିଲେ। ଶେଷ ଓଭରରୁ ବିଜୟ ପାଇଁ ୧୫ ରନ୍ର ଦରକାର ଥିଲା ବେଳେ ପ୍ରଥମ ୪ ବଲ୍ରୁ ମାତ୍ର ୧ ରନ୍ କରିଥିବା ଲକ୍ଷ୍ନୌ ପାଇଁ ଷ୍ଟୋଇନିସ୍ ଶେଷ ଦୁଇ ବଲ୍ରୁ ଚୌକା, ଛକା ଅମଳ କରିଥିଲେ। ଫଳରେ ଲକ୍ଷ୍ନୌ ୮ ୱିକେଟ୍ ବିନିମୟରେ ୧୬୨ ରନ୍ କରି ଦୁଃଖଦ ପରାଜୟ ବରଣ କରିଥିଲା। ରାଜସ୍ଥାନ ରୋମାଞ୍ଚକ ବିଜୟ ସହ ପଏଣ୍ଟ୍ ତାଲିକାର ପ୍ରଥମକୁ ଉନ୍ନୀତ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ ଟସ୍ ହାରି ବ୍ୟାଟିଂ କରିବାକୁ ଆମନ୍ତ୍ରଣ ପାଇଥିବା ରାଜସ୍ଥାନ ରୟାଲ୍ସ ସିମରନ୍ ହେଟମେୟର (୫୯*)ଙ୍କ ଅର୍ଦ୍ଧଶତକ ବଳରେ ନିର୍ଦ୍ଧାରିତ ୨୦ ଓଭରରେ ୬ ୱିକେଟ୍ ହରାଇ ୧୬୫ ରନ୍ କରିଥିଲା। ରବିଚନ୍ଦ୍ରନ୍ ଅଶ୍ବିନ (୨୮) ଆହତ ଆଉଟ୍ ହେବା କିନ୍ତୁ ପ୍ରଶଂସକଙ୍କୁ ଦ୍ବନ୍ଦ୍ବରେ ପକାଇଥିଲା। ଏହା ପୂର୍ବରୁ କିନ୍ତୁ ଅଶ୍ବିନ-ହେଟମେୟର ପଞ୍ଚମ ୱିକେଟ୍ରେ ରାଜସ୍ଥାନ ପାଇଁ ବହୁମୂଲ୍ୟ ୬୮ ରନ୍ ଯୋଡ଼ି ନେଇଥିଲେ। ହେଟମେୟରଙ୍କ ଏକ ସହଜ କ୍ୟାଚ୍କୁ କ୍ରୁନାଲ ପାଣ୍ଡ୍ୟା ଛାଡ଼ିବା ଶେଷରେ ଲକ୍ଷ୍ନୌ ସୁପରଜିଆଣ୍ଟ୍ସ ପାଇଁ ଅତ୍ୟନ୍ତ ମହଙ୍ଗା ସାବ୍ୟସ୍ତ ହୋଇଥିଲା।