ସରିତା ଓ ମଧୁସ୍ମିତାଙ୍କ ଅର୍ଦ୍ଧଶତକରେ ଜିତିଲା ପର୍ପଲ୍
ୟେଲୋକୁ ୮ ୱିକେଟ୍ରେ ହରାଇଲା ଭାଓଲେଟ୍
ଭୁବନେଶ୍ବର : କିଟ୍ରେ ଚାଲିଥିବା ଏମ୍ଜିଏମ୍ ଓଡ଼ିଶା ମହିଳା ଟ୍ବେଣ୍ଟି-୨୦ ଲିଗ୍ର ଶୁକ୍ରବାର ଦୁଇଟି ମ୍ୟାଚ୍ରେ ଓଡ଼ିଶା ପର୍ପଲ ଏବଂ ଓଡ଼ିଶା ଭାଓଲେଟ୍ ଦମ୍ଦାର ବିଜୟ ହାସଲ କରିଛନ୍ତି। ପର୍ପଲ ୪୫ ରନ୍ରେ ଓଡ଼ିଶା ଗ୍ରିନ୍କୁ ଏବଂ ଭାଓଲେଟ୍ ୮ ୱିକେଟ୍ରେ ଓଡ଼ିଶା ୟେଲୋକୁ ପରାସ୍ତ କରିଛି। ଏଥି ସହିତ ପର୍ପଲ ୬ ମ୍ୟାଚ୍ରୁ ପଞ୍ଚମ ବିଜୟ ସହ ପଏଣ୍ଟ୍ ତାଲିକାର ଶୀର୍ଷରେ (୨୦)ରେ ସ୍ଥିର ରହିଥିଲା ବେଳେ ସପ୍ତମ ମ୍ୟାଚ୍ରୁ ଚତୁର୍ଥ ବିଜୟ ସହ ଭାଓଲେଟ୍ (୧୬ ପଏଣ୍ଟ୍) ଦ୍ବିତୀୟ ସ୍ଥାନକୁ ଉଠିଛି। ଅନ୍ୟପକ୍ଷରେ ଉଭୟ ଗ୍ରିନ୍ ଓ ୟେଲୋ ନିଜ ନିଜର ପଞ୍ଚମ ପରାଜୟ ବରଣ କରିଛନ୍ତି। ଗ୍ରିନ୍ ୭ ମ୍ୟାଚ୍ ଖେଳିସାରିଥିଲା ବେଳେ ୟେଲୋ ୬ ମ୍ୟାଚ୍ ଖେଳିଛି। ଏହି ପ୍ରତିଯୋଗିତାର ଲିଗ୍ ପର୍ଯ୍ୟାୟରେ ପ୍ରତ୍ୟେକ ଦଳ ୮ ଲେଖାଏଁ ମ୍ୟାଚ୍ ଖେଳିବେ।
Sambad is now on WhatsApp
Join and get latest news updates delivered to you via WhatsApp
ଶୁକ୍ରବାର ମଧୁସ୍ମିତା ବେହେରାଙ୍କ ଅଲ୍ରାଉଣ୍ଡ ପ୍ରଦର୍ଶନ ହିଁ ପର୍ପଲ ବିଜୟର ପ୍ରମୁଖ କାରଣ ଥିଲା। ଟସ୍ ଜିତି ବ୍ୟାଟିଂ ନେଇଥିବା ପର୍ପଲ ପ୍ରାରମ୍ଭିକ ଯୋଡ଼ି ସରିତା ମେହେର (୭୯*, ୬୧ ବଲ୍, ୧୨ ଚୌକା) ଏବଂ ମଧୁସ୍ମିତା (୬୮* ରନ୍, ୫୯ ବଲ୍, ୧୦ ଚୌକା)ଙ୍କ ଅପରାଜିତ ଅର୍ଦ୍ଧଶତକୀୟ ପାଳି ବଳରେ କୌଣସି ୱିକେଟ୍ ନହରାଇ କରିଥିଲା ୧୫୪ ରନ୍। ଜବାବରେ ମଧୁସ୍ମିତାଙ୍କ ୪-୦-୧୮-୩ ବୋଲିଂ ଚିତ୍ର ବଳରେ ପର୍ପଲ ପ୍ରତିପକ୍ଷ ଗ୍ରିନ୍କୁ ରୋକିବାକୁ ସମର୍ଥ ହୋଇଥିଲା। ଅଲିସ୍ପା ବିଶ୍ବାଳ (୩୭), ସୁମିତ୍ରା ସାହୁ (୧୯), ରୋସ୍ନାରା ପରୱିନ୍ (୧୭) ଓ ଅଧିନାୟିକା ପ୍ରଜ୍ଞା ମହାନ୍ତି (୧୫)ଙ୍କ ଦୁଇ ଅଙ୍କ ବିଶିଷ୍ଟ ସ୍କୋର୍ ସତ୍ତ୍ବେ ଗ୍ରିନ୍ ୬ ୱିକେଟ୍ ବିନିମୟରେ ୧୦୯ ରନ୍ରେ ସୀମିତ ରହିଯାଇଥିଲା। ମଧୁସ୍ମିତାଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା।
ଅନ୍ୟ ମ୍ୟାଚ୍ରେ ଭାଓଲେଟ୍ ଟସ୍ ଜିତି ପ୍ରଥମେ କ୍ଷେତ୍ରରକ୍ଷଣ କରିଥିଲା। କୁନି ବଦରା (୪-୦-୧୩-୨), ଅଞ୍ଜଳି ସିଂହ (୪-୧-୧୯-୧) ଓ କଳ୍ପନା ନାୟକ (୪-୦-୧୦-୧)ଙ୍କ ଚମତ୍କାର ବୋଲିଂ ନିକଟରେ ତିଷ୍ଠିନପାରି ୟେଲୋ ୭ ୱିକେଟ୍ ବିନିମୟରେ ମାତ୍ର ୭୮ ରନ୍ କରିପାରିଥିଲା। ସସ୍ମିତା ମହାଲିକ (୨୪), ପ୍ରିୟଙ୍କା ସାହୁ (୧୬) ଓ ସଂଗୀତା ଖାଡ଼ିଆ (୧୦) କେବଳ ଦୁଇ ଅଙ୍କ ଛୁଇଁଥିଲେ। ଜବାବରେ ଅଦ୍ବିତୀ ଦେଓ’ଙ୍କ ଅପରାଜିତ ୩୩ ଓ ସୁଶ୍ରୀ ଦିବ୍ୟଦର୍ଶିନୀଙ୍କ ଅପରାଜିତ ୧୫ ସାଙ୍ଗକୁ ଅଞ୍ଜଳି ସିଂହଙ୍କ ୨୬ ରନ୍ ବଳରେ ଭାଓଲେଟ୍ ୧୫.୪ ଓଭରରେ ମାତ୍ର ୨ ୱିକେଟ୍ ହରାଇ ୮୨ ରନ୍ ସହ ମ୍ୟାଚ୍ ଜିତି ନେଇଥିଲା। କୁନି ବଦରାଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା।