ସତୀଘାଟର ୩ ଯୁବକଙ୍କୁ ଛୁରାମାଡ଼, ୫ଦିନରେ ଦ୍ଵିତୀୟ ଘଟଣା
ମୁରିବାହାଲ: ମୁରିବାହାଲ ଥାନା ଗୁଡ଼ିଘାଟ-ଟିକ୍ରାପଡ଼ା ରାସ୍ତାର ସତୀଘାଟ ନିକଟରେ ମଙ୍ଗଳବାର ରାତିରେ ଦୁର୍ବୃତ୍ତଙ୍କ ଛୁରାମାଡ଼ରେ ୩ ଜଣ ଯୁବକ ଆହତ ହୋଇଛନ୍ତି। ସେମାନେ ହେଲେ ସତୀଘାଟ ଗ୍ରାମର ରାଜେଶ ମାଝୀ (୨୬), ଦେବାଶିଷ ମାଝୀ ଓ ସାହିଲ ଖମାରୀ। ରାଜେଶ ଓ ଦେବାଶିଷଙ୍କ ଅବସ୍ଥା ଗୁରୁତର ଅଛି। ଏନେଇ ମୁରିବାହାଲ ଥାନାରେ ଅଭିଯୋଗ ହୋଇଛି।
Sambad is now on WhatsApp
Join and get latest news updates delivered to you via WhatsApp
ପୁଲିସର ସୂଚନା ଅନୁସାରେ, ଅଭିଯୋଗ ହୋଇଛି। ରାଜେଶ, ଦେବାଶିଷ ଓ ସାହିଲ ମଙ୍ଗଳବାର ରାତି ପ୍ରାୟ ୧୦ଟାରେ ମୁରିବାହାଲରୁ ଧନୁଯାତ୍ରା ଦେଖି ବାଇକ (ଓଡି ୦୩ ଏଲ୍ ୪୫୯୬)ରେ ନିଜ ଗାଁକୁ ଫେରୁଥିଲେ। ଘଟଣାସ୍ଥଳରେ ଏକ ଏଚ୍ଏଫ୍ ଡିଲକ୍ସ ବାଇକ୍ରେ ଥିବା ୩ ଜଣ ମୁଖାପିନ୍ଧା ଦୁର୍ବୃତ୍ତ ସେମାନଙ୍କୁ ଛୁରିରେ ଅତର୍କିତ ଆକ୍ରମଣ କରିଥିଲେ। ଖବର ପାଇ ପରିବାର ଲୋକେ ସମସ୍ତଙ୍କୁ ଉଦ୍ଧାର କରି ପ୍ରଥମେ ମୁରିବାହାଲ ସିଏଚ୍ସିକୁ ନେଇଥିଲେ। ବୁଧବାର ଏ ସମ୍ପର୍କରେ ଥାନାରେ ଲିଖିତ ଅଭିଯୋଗ ହୋଇଥିଲା। କେସ୍ ନଂ ୨୨୦/୨୨ ରୁଜୁ କରି ପୁଲିସ ତଦନ୍ତ କରୁଛି ବୋଲି ଆଇଆଇସି କମଳ ଲୋଚନ ବେହେରା ପ୍ରକାଶ କରିଛନ୍ତି। ଏହା ପୂର୍ବରୁ ଗତ ଶୁକ୍ରବାର ଥାନାଠାରୁ ମାତ୍ର ୧କିମି ଦୂର ତ୍ରିଖୁଟି ବଜାର ଛକରେ ସ୍ଥାନୀୟ ବଜାରପଡ଼ାର ନିରଞ୍ଜନ ଆଚାରୀ(୨୫) ଓ ରବି ମହାରଣା(୩୦)ଙ୍କୁ ୬ଜଣ ଦୁର୍ବୃତ୍ତ ହଠାତ୍ ଛୁରିରେ ଆକ୍ରମଣ କରିଥିଲେ। ଏହି ଘଟଣାରେ ବର୍ତ୍ତମାନ ସୁଦ୍ଧା ପୁଲିସକୁ କୌଣସି ସଫଳତା ମିଳି ନଥିବା ବେଳେ ସତୀଘାଟ ଆକ୍ରମଣ ଘଟଣା ପରେ ଲୋକେ ଅସୁରକ୍ଷିତ ମନେ କରୁଛନ୍ତି।