ନବୀନଙ୍କ ମନ୍ତ୍ରିମଣ୍ଡଳ: ୧୭ ବର୍ଷରେ ଗଡ଼ିଛି ୪୪ ମୁଣ୍ଡ
ଭୁବନେଶ୍ୱର : ୨୦୦୦ରୁ ୨୦୧୭। ଚାରି ଥରରେ ୧୭ ବର୍ଷ ଧରି ରାଜ୍ୟକୁ ଶାସନ କରୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ନିଜକୁ ସ୍ୱଚ୍ଛ ଓ ନିରଙ୍କୁଶ ଦେଖାଇବା ପାଇଁ ବାରମ୍ବାର ନିଜ ମନ୍ତ୍ରିମଣ୍ଡଳର ସହଯୋଗୀଙ୍କ ପ୍ରତି କଠୋର ଆଭିମୁଖ୍ୟ ଗ୍ରହଣ କରିବାକୁ ପଛଘୁଞ୍ଚା ଦେଇ ନାହାନ୍ତି ନବୀନ। ଏହି ୧୭ ବର୍ଷ ଭିତରେ ବିଭିନ୍ନ କାରଣରୁ ୪୪ ଜଣଙ୍କୁ ବିଦା ହୋଇଛନ୍ତି ତାଙ୍କ ମନ୍ତ୍ରିମଣ୍ଡଳରୁ।
ପ୍ରଥମ ପାଳି ଅର୍ଥାତ ୨୦୦୦ରୁ ୨୦୦୪ ମଧ୍ୟରେ ଛଅ ଜଣ ମନ୍ତ୍ରୀଙ୍କୁ ବିଦା କରିଥିଲେ ନବୀନ। ସେମାନେ ହେଲେ କମଳା ଦାସ, ପ୍ରଶାନ୍ତ ନନ୍ଦ, ନଳିନୀକାନ୍ତ ମହାନ୍ତି, ଅମର ଶତପଥୀ, ଦେବୀ ପ୍ରସାଦ ମିଶ୍ର ଓ ଏ ପି ସିଂହ। ତାହା ବାଦ୍ ତତ୍କାଳୀନ ଅର୍ଥ ମନ୍ତ୍ରୀ ରାମକୃଷ୍ଣ ପଟ୍ଟନାୟକଙ୍କ ହାତରୁ ଅର୍ଥ ବିଭାଗ ଚାଲିଗଲା ପରେ ସେ ବି ଇସ୍ତଫା ଦେଇଥିଲେ। କେବଳ ଦୁର୍ନୀତିର ଅଭିଯୋଗରେ ଅଧିକାଂଶ ମନ୍ତ୍ରୀଙ୍କୁ ବଳି ପକାଯାଇଥିଲା। ଚତୁରତାର ସହ ସହଯୋଗୀମାନଙ୍କୁ ବିଦା କରି ନବୀନ ନିଜ ଭାବମୂର୍ତ୍ତିକୁ ବେଶ୍ ଉଜ୍ଜ୍ୱଳ କରିବାରେ ସଫଳ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
୨୦୦୪ରୁ ୨୦୦୯ ମଧ୍ୟରେ ନବୀନ ଗଡ଼ାଇଥିଲେ ୧୪ ମୁଣ୍ଡ। ସେହିପରି ତୃତୀୟ ପାଳିରେ ପୁଣି ବିଭିନ୍ନ କାରଣରୁ ବଳି ପକାଇଥିଲେ ଆଉ ୧୪ ମନ୍ତ୍ରୀଙ୍କୁ। ଏହି ପାଳିରେ ସବୁଠାରୁ ବଡ଼ କାର୍ଯ୍ୟାନୁଷ୍ଠାନ ହୋଇଥିଲା ୨୦୧୨ ମସିହା ଅଗଷ୍ଟ ମାସରେ। ପ୍ୟାରୀ ମହାପାତ୍ରଙ୍କ ଯୁଗ ଶେଷ ହେଲା ପରେ ତାଙ୍କ ସହ ସମ୍ପର୍କ ଅଭିଯୋଗରେ ବଳି ପଡ଼ିଥିଲେ ପ୍ରଫୁଲ୍ଲ ଘଡ଼ାଇ, ପ୍ରଫୁଲ୍ଲ ସାମଲ, ପ୍ରତାପ ଜେନା, ପୁଷ୍ପେନ୍ଦ୍ର ସିଂହଦେଓ ଓ ଅତନୁ ସବ୍ୟସାଚ୍ଚୀ ନାୟକ। ତେବେ ୨୦୧୪ ନିର୍ବାଚନ ପରେ ପୁଷ୍ପେନ୍ଦ୍ର ଓ ଅତନୁ ନବୀନ ମନ୍ତ୍ରିମଣ୍ଡଳକୁ ପ୍ରତ୍ୟାବର୍ତ୍ତନ କରିଥିଲେ। ପରବର୍ତ୍ତୀ ସମୟରେ ପ୍ରଫୁଲ୍ଲ ସାମଲ ଓ ପ୍ରତାପ ଜେନା ବି ମନ୍ତ୍ରିମଣ୍ଡଳକୁ ଫେରିଥିଲେ।
ଚତୁର୍ଥ ପାଳିରେ ପ୍ରଥମ ମୁଣ୍ଡ ଗଡ଼ିଥିଲା ୨୦୧୬ ଅକ୍ଟୋବରରେ ତତ୍କାଳୀନ ସ୍ୱାସ୍ଥ୍ୟ ମନ୍ତ୍ରୀ ଅତନୁ ସବ୍ୟସାଚ୍ଚୀ ନାୟକଙ୍କର। ସମ୍ ହସ୍ପିଟାଲ୍ ଅଗ୍ନିକାଣ୍ଡ ଘଟଣାରେ ତାଙ୍କ ଠାରୁ ଇସ୍ତଫା ମଗାଇଥିଲେ ନବୀନ। ତାହା ପରେ ଚଳିତ ବର୍ଷ ମନ୍ତ୍ରିମଣ୍ଡଳ ପୁନର୍ଗଠନ ପ୍ରକ୍ରିୟାରେ ବାଦ୍ ପଡ଼ିଲେ ଆଉ ୮ ଜଣ। ତେବେ ସାଂଗଠନିକ କାର୍ଯ୍ୟରେ ଅଧିକ ସମୟ ଦେବା ପାଇଁ ସେମାନେ ଇସ୍ତଫା ଦେଇଛନ୍ତି ବୋଲି କୁହାଗଲା। ୮ ଜଣଙ୍କ ମଧ୍ୟରୁ କେବଳ ପ୍ରଦୀପ ଅମାତଙ୍କୁ ବାଚସ୍ପତି କରାଗଲା। ଚତୁର୍ଥ ପାଳିରେ ଆଜି ମୁଣ୍ଡ ଗଡ଼ିଛି ମନ୍ତ୍ରୀ ଦାମୋଦର ରାଉତଙ୍କର।