ଭୁବନେଶ୍ୱର : କ୍ରମାଗତ ଭାବେ ତୈଳ ଦର ବୃଦ୍ଧି ଯୋଗୁ ରାଜ୍ୟରେ ବସ୍ ଭଡ଼ା ବଢ଼ିଛି। ସ୍ବୟଂକ୍ରିୟ ପଦ୍ଧତ୍ତିରେ ଏହି ଭଡ଼ା ବୃଦ୍ଧି କରାଯାଇଛି। ଅର୍ଡିନାରି ବସ୍ ଭଡ଼ା କିଲୋମିଟର ପିଛା ୧ ପଇସା ବୃଦ୍ଧି ପାଇଁ ୭୨ ପଇସାରୁ ୭୩ ପଇସା ହୋଇଥିବା ବେଳେ ଏକ୍ସପ୍ରେସ ଭଡ଼ା ୧ ପଇସା ବଢ଼ି ୭୫ ପଇସାରୁ ୭୬ ପଇସା ହୋଇଛି। ସେହିପରି ଡିଲକ୍ସ ବସ୍ ଭଡ଼ା ୧ ଟଙ୍କା ୦୫ରୁ ବଢ଼ି ୧ ଟଙ୍କା ୦୭ ହୋଇଥିବା ବେଳେ ଏସି ଡିଲକ୍ସ କିମି ପିଛା ୧ଟଙ୍କା ୨୭ରୁ ବଢ଼ି ୧ଟଙ୍କା ୨୯ ପଇସା ହୋଇଛି।
Sambad is now on WhatsApp
Join and get latest news updates delivered to you via WhatsApp
ବସ୍ ଭଡ଼ା ବୃଦ୍ଧିକୁ ନେଇ ବସ୍ ମାଲିମାନେ ସନ୍ତୁଷ୍ଟ ନାହାନ୍ତି। ଏ ସମ୍ପର୍କରେ ଓଡ଼ିଶା ଘରୋଇ ବସ୍ ମାଲିକ ସଂଘ ଭିନ୍ନ ମତ ରଖିଛି। ସଂଘ ପକ୍ଷରୁ ଯୁକ୍ତି କରାଯାଇଛି ଯେ ଡିଜେଲ୍ରୁ ଲିଟର ପିଛା ଉଭୟ କେନ୍ଦ୍ର ଓ ରାଜ୍ୟ ସରକାର ପାଖାପାଖି ୪୯ ଟଙ୍କା ଟିକସ ଆକାରରେ ନିଅନ୍ତି। ପୁଣି କରୋନା ପାଇଁ ଏବେ ଅତିରିକ୍ତ ୧୪ ଟଙ୍କା ଟିକସ ନିଆଯାଉଛି। ଯଦି ଉଭୟ କେନ୍ଦ୍ର ଓ ରାଜ୍ୟ ସରକାର ଡିଜେଲ୍ ଉପରୁ ଟିକସ ବାବଦରେ ଲିଟର ପ୍ରତି ୧୫ ଟଙ୍କା ଛାଡ଼ କରନ୍ତେ, ତେବେ ତୈଳ ଦର ବୃଦ୍ଧି ପାଆନ୍ତା ନାହିଁ। ଏହା ଦ୍ବାରା ଯାତ୍ରୀ ଭଡ଼ା ଓ ଅନ୍ୟାନ୍ୟ ମାଲ୍ ପରିବହନ ଖର୍ଚ୍ଚ ବି କମ୍ ରୁହନ୍ତା। ଏହି ଦିଗ ପ୍ରତି ଉଭୟ ସରକାର ପ୍ରାଥମିକତା ନ ଦେଉଥିବାରୁ ଡିଜେଲ୍ ଦର ବୃଦ୍ଧି ହେଉଛି ଓ ବସ୍ ଭଡ଼ା ବଢ଼ୁଛି। ରାଜ୍ୟରେ କରୋନା ସଂକ୍ରମଣ ଯୋଗୁ କମ୍ ସଂଖ୍ୟକ ଯାତ୍ରୀ ନେଇ ବସ୍ଗୁଡ଼ିକ ଯାତାୟତ କରୁଥିଲା ବେଳେ ଭଡ଼ା ବଢ଼ିବା ଦ୍ବାରା ସମସ୍ୟା ଆହୁରି ଜଟିଳ ହେବ ବୋଲି ସଂଘ ଆଶଙ୍କା କରିଛି।