ଅନୁପ ସାଏଙ୍କୁ ନେଇ ଓଡ଼ିଶାରେ ଛତିଶଗଡ଼ ପୁଲିସର ଛାନଭିନ୍, ଅନୁପଙ୍କ ପୁତୁରା ଓ କଳ୍ପନାଙ୍କ ସଂପର୍କୀୟଙ୍କୁ ନୋଟିସ କଲା ପୁଲିସ
ବ୍ରଜରାଜନଗର: ବହୁଚର୍ଚ୍ଚିତ କଳ୍ପନା ଓ ବବଲି ଡବଲ ମର୍ଡର ଘଟଣାରେ ଆଜି ଛତିଶଗଡ଼ ପୁଲିସ ବ୍ରଜରାଜନଗର ଆସି ଛାନଭିନ କରିଛି | ଏଠାରେ ମୁଖ୍ୟ ଅଭିଯୁକ୍ତ ତଥା ପୂର୍ବତନ ବିଧାୟକ ଅନୁପ ସାଏଙ୍କ ଆକାଉଣ୍ଟ ଥିବା ଏସବିଆଇ ଓ ୟୁକୋ ବ୍ୟାଙ୍କରେ ପୁଲିସ ଛାନଭିନ୍ କରିଛି | ସେହିପରି ଅନୁପ ସାଏଙ୍କ ପୁତୁରାକୁ ଛତିଶଗଡ଼ ପୁଲିସ ନୋଟିସ ଦେଇଥିବା ବେଳେ ଆସନ୍ତାକାଲି ଚକ୍ରଧରନଗର ଥାନାରେ ହାଜର ହେବାକୁ ନୋଟିସରେ କୁହାଯାଇଛି | ମୃତ କଳ୍ପନାଙ୍କ ସମ୍ପର୍କୀୟଙ୍କ ଘରେ ମଧ୍ୟ ପୁଲିସ ଛାନଭିନ କରିଛି | ଏଥିସହ ମୃତ କଳ୍ପନାଙ୍କ ସଂପର୍କୀୟଙ୍କୁ ମଧ୍ୟ ନୋଟିସ୍ ଜାରି କରିଛି ପୁଲିସ୍। ଏଠାରେ ସୂଚନା ଥାଉ କି ଏହି ହତ୍ୟାକାଣ୍ଡ ଦିନକୁ ଦିନ ଚାଞ୍ଚଲ୍ୟକର ମୋଡ ନେଉଛି । ଘଟଣାର ମୁଖ୍ୟ ଅଭିଯୁକ୍ତ ପୂର୍ବତନ ବିଧାୟକ ଅନୁପ ସାଏ ଓ ତାଙ୍କ ଡ୍ରାଇଭର ବର୍ମନ ଟପ୍ପୋଙ୍କ ସମେତ ଆଉ ଜଣଙ୍କ ସଂପୃକ୍ତି ଥିବା ସୂଚନା ଦେଇଛନ୍ତି ରାୟଗଡ ଏସପି ସନ୍ତୋଷ ସିଂ ।
Sambad is now on WhatsApp
Join and get latest news updates delivered to you via WhatsApp
ଏହାସହ ଏହି ଡବଲ ମର୍ଡର ଘଟଣାରେ କେବଳ ବୋଲେରୋ ଗାଡି ନୁହେଁ, ତାହା ସହ ଏକ ଇନୋଭା ଗାଡି ବ୍ୟବହାର ହୋଇଥିବା ସନ୍ଦେହ କରାଯାଉଛି ବୋଲି କହିଛନ୍ତି ରାୟଗଡ ଏସପି। କଳ୍ପନା ଓ ବବଲିଙ୍କୁ ହତ୍ୟା ପରେ ତାଙ୍କ ପରିଚୟ ନଷ୍ଟ କରିବା ଲାଗି ଶବ ଉପରେ ବାରମ୍ବାର ଗାଡ଼ି ଚଢ଼ା ଯାଇଥିଲା। ପୁରା ଘଟଣାର ତଦନ୍ତ ଜାରି ରହିଥିବା ବେଳେ ଅଭିଯୁକ୍ତ ଅନୁପ ସାଏ ଓ ତାଙ୍କ ଡ୍ରାଇଭର ବର୍ମନ ଟପ୍ପୋ ତଦନ୍ତରେ ସହଯୋଗ କରୁନାହାନ୍ତି । ସେମାନଙ୍କୁ ରିମାଣ୍ଡରେ ଆଣି ଜେରା କରିବ ପୁଲିସ । ଆବଶ୍ୟକ ପଡିଲେ ଉଭୟଙ୍କୁ ଓଡ଼ିଶା ନିଆଯିବ ବୋଲି ଏସପି ସନ୍ତୋଷ ସିଂ କହିଛନ୍ତି । ତେବେ ଗତକାଲି ହତ୍ୟାକାଣ୍ଡର ଡେମୋ ଦେଖାଇବା ପାଇଁ ଘଟଣାସ୍ଥଳରେ ଡ୍ରାଇଭରକୁ ନେଇଥିଲା ପୁଲିସ ।
ସେଠାରେ ଡେମୋ ଦେଖାଇବା ବେଳେ ଇନୋଭା ଗାଡି ସାମ୍ନାକୁ ଆସିଥିଲା । ତେବେ ପ୍ରଥମରୁ ହତ୍ୟାକାଣ୍ଡରେ ବୋଲେରୋ ଗାଡି ବ୍ୟବହାର କରାଯାଇଥିବା କଥା କୁହାଯାଉଥିବା ବେଳେ ପୁଲିସ କାହିଁକି ଇନୋଭା ଗାଡିକୁ ନେଇ ଡେମୋ ଦେଖାଇଲା ବୋଲି ଚର୍ଚ୍ଚା ଜୋର ଧରିଥିଲା । ଏହାସହ ଏହି ଇନୋଭା ଗାଡି କାହାର ଓ ତା ଭିତରେ କିଏ ଥିଲେ ତାକୁ ନେଇ ସନ୍ଦେହ ସୃଷ୍ଟି ହୋଇଥିଲା ।