ଗଞ୍ଜାମରେ ଆଗଧାଡ଼ିର କୋଭିଡ଼୍ ଯୋଦ୍ଧା ଡାକ୍ତର ବି.କ୍ରୀଷ୍ଣାଙ୍କ ପରଲୋକ, ସ୍ଥାନୀୟ ଅଞ୍ଚଳରେ ଶୋକର ଛାୟା
ଜିଲ୍ଲାରେ ପ୍ରଥମ ଡାକ୍ତରଙ୍କ ମୃତ୍ୟୁ
ପୁରୁଷୋତ୍ତମପୁର: ଗଞ୍ଜାମ ଜିଲ୍ଲାରେ କରୋନା ପ୍ରକୋପ ଲାଗି ରହିଛି। ଏହି ମହାମାରୀ ୨୫ କୋଭିଡ଼୍ ଯୋଦ୍ଧାଙ୍କ ଜୀବନ ନେଲାଣି। ଆଜି ପୁଣି ଜଣେ ଆଗଧାଡ଼ିର କୋଭିଡ଼୍ ଯୋଦ୍ଧା ତଥା ଡାକ୍ତରଙ୍କ ଜୀବନ ନେଇଛି କରୋନା। ଜିଲ୍ଲାରେ କରୋନାରେ ଡାକ୍ତର ମୃତ୍ୟୁ ବରଣ କରିବା ପ୍ରଥମ ଘଟଣା। ପୁରୁଷୋତ୍ତମପୁର ବ୍ଲକ ଭାଟକୁମରଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଇନ୍ଚାର୍ଜ ତଥା ଅଧୀକ୍ଷକ ଡାକ୍ତର ବି.କ୍ରୀଷ୍ଣାଙ୍କ ମୃତ୍ୟୁ ଘଟିଛି। ଏହି ଖବର ପ୍ରଚାରିତ ହେବା କ୍ଷଣି ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
Sambad is now on WhatsApp
Join and get latest news updates delivered to you via WhatsApp
ଭାଟକୁମରଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଇନ୍ଚାର୍ଜ ଭାବେ ବି.କ୍ରୀଷ୍ଣା ୨୦୧୮ରେ କାର୍ଯ୍ୟରେ ଯୋଗ ଦେଇଥିଲେ। କ୍ରୀଷ୍ଣା କୋଭିଡ଼୍ କାର୍ଯ୍ୟରେ ନିୟୋଜିତ ଥିଲେ। ତାଙ୍କ ଦେହ ଅସୁସ୍ଥ ହେବାରୁ ଗତ ୪ ତାରିଖରେ ସ୍ବାବ୍ ପରୀକ୍ଷା କରାଇଥିଲେ। ୫ତାରିଖରେ ତାଙ୍କ ସ୍ବାବ୍ ରିପୋର୍ଟ ପଜିଟିଭ ଆସିବା ପରେ ଭୁବନେଶ୍ବର କିମ୍ସ ହସ୍ପିଟାଲରେ ଭର୍ତ୍ତି ହୋଇଥିଲେ। ଗତକାଲି ରାତି ୩ଟା ବେଳେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ସୂଚନା ମିଳିଛି । ତାଙ୍କର ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ଆଜି ପୂର୍ବାହ୍ନରେ ଭାଟକୁମରଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ଡାକ୍ତର ବି.କ୍ରିଷ୍ଣାଙ୍କ ସ୍ମୃତିରେ ଶୋକସଭା ଅନୁଷ୍ଠିତ ହୋଇଯାଇଛି। ଏଥିରେ ଛତ୍ରପୁର ଉପଜିଳ୍ଲାପାଳ ପ୍ରିୟ ରଞ୍ଜନ ପୃଷ୍ଟି, ଜିଲ୍ଲା ମୁଖ୍ୟ ଚିକିତ୍ସାଅଧିକାରୀ ଉମାଶଙ୍କର ମିଶ୍ର, ପୁରୁଷୋତ୍ତମପୁର ବିଡ଼ିଓ ବିଜୟ କୁମାର ବେହେରା, ଅତିରିକ୍ତ ତହସିଲଦାର ସୁନୀଲ କୁମାର ଟୁଡୁ, ଭାଟକୁମରଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ବର୍ତ୍ତମାନର ଇନ୍ଚାର୍ଜ ମନୋଜ କୁମାର ଦାସ ଏବ˚ ଡାକ୍ତରଖାନାର ସମସ୍ତ କର୍ମଚାରୀ ଉପସ୍ଥିତ ଥିଲେ।।
ଡାକ୍ତରଙ୍କ କର୍ତ୍ତବ୍ୟ ନିଷ୍ଠା ଓ କାର୍ଯ୍ୟ ଶୈଳୀକୁ ଅଧିକାରୀମାନେ ମନେ ପକାଇ ପ୍ରସ˚ଶା କରିଥିଲେ। ଏହି ଅବସର ଦୁଇମିନିଟର ନୀରବ ପ୍ରାର୍ଥନା କରାଯାଇଥିଲା। ଏହାପରେ ଅଧୃକାରୀମାନେ ମୃତ ଡାକ୍ତରଙ୍କ ନାଇଡ଼ୁପଲ୍ଲୀ ସ୍ଥିିତ ବାସଭବନକୁ ଯାଇ ଶୋକସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଇଥିଲେ। ପ୍ରକାଶ ଥାଉ କି, ହିଞ୍ଜଳି ବ୍ଲକର ନାଇଡୁ ପଲ୍ଲୀ ଗ୍ରାମରେ ବି. କ୍ରୀଷ୍ଣା ୧୯୭୭ ମସିହା ଅକ୍ଟୋବର ୩ତାରିଖରେ ଜନ୍ମ ଗ୍ରହଣ କରିଥିଲେ। ତାଙ୍କୁ ମୃତ୍ୟୁ ବେଳକୁ ମାତ୍ର ୪୩ ବର୍ଷ ବୟସ ହୋଇଥିଲା। ତାଙ୍କର ପତ୍ନୀ ଏବ˚ ୭ବର୍ଷ ଝିଅ ଅଛନ୍ତି।