ଓମିକ୍ରନ୍ ଡର: ଦୁବାଇ ଫେରନ୍ତା ପଜିଟିଭ୍ ଚିହ୍ନଟ
ଭଞ୍ଜନଗର : ଗଞ୍ଜାମ ଜିଲ୍ଲା ଭଞ୍ଜନଗରରୁ ମଙ୍ଗଳବାର କରୋନାରେ ସଂକ୍ରମିତ ଜଣେ ଦୁବାଇ ଫେରନ୍ତାଙ୍କୁ ଚିହ୍ନଟ କରାଯାଇଛି। ଏହା ଜଣାପଡ଼ିବା ପରେ ଭଞ୍ଜନଗର ଡାକ୍ତରଖାନାର ଏକ ଟିମ୍ ତାଙ୍କୁ ଠାବ କରି ଆଇସୋଲେସନ୍ ୱାର୍ଡ଼ରେ ରଖିଛନ୍ତି। କିନ୍ତୁ ତାଙ୍କ ଶରୀରରେ ଓମିକ୍ରନ୍ ପ୍ରଜାତି ଚିହ୍ନଟ ପାଇଁ ସ୍ବାବ୍କୁ ଭୁବନେଶ୍ବର ପଠାଯାଇଛି।
Sambad is now on WhatsApp
Join and get latest news updates delivered to you via WhatsApp
ଉକ୍ତ ବ୍ୟକ୍ତିଙ୍କ ନିଜ ଘର ରାଉରକେଲାରେ। ସେ ଗତ ୩୦ ତାରିଖରେ ଦୁବାଇରୁ ବିମାନ ଯୋଗେ ଆସିଥିଲେ। ବିମାନବନ୍ଦରରେ ତାଙ୍କର ଆରଟିପିସିଆର୍ ଟେଷ୍ଟ୍ ହୋଇଥିଲା। କିନ୍ତୁ ରିପୋର୍ଟ ଆସି ନଥିଲା। ହେଲେ ବ୍ୟକ୍ତିଜଣକ ନିୟମାନୁସାରେ ସଙ୍ଗରୋଧରେ ନରହି ଆଜି ଭୋର୍ ୪ଟାରେ ଭଞ୍ଜନଗର ସହର ଲଣ୍ଡେଇ ସାହିକୁ ତାଙ୍କର ଜଣେ ସଂପର୍କୀୟଙ୍କ ଘରକୁ ଆସିଥିଲେ।
ବ୍ୟକ୍ତିଜଣକ ପଜିଟିଭ୍ ବୋଲି ଜଣାପଡ଼ିବା ପରେ ତାଙ୍କ ମୋବାଇଲ୍କୁ ସ୍ବାସ୍ଥ୍ୟ ବିଭାଗରୁ କଲ୍ ଆସିଥିଲା। ସେ ଭଞ୍ଜନଗରରେ ଥିବା କହିବା ପରେ ଭଞ୍ଜନଗର ଡାକ୍ତରଖାନାର ଏକ ଟିମ୍ ପହଞ୍ଚି ତାଙ୍କୁ ନେଇ ଆଇସୋଲେସନ୍ ୱାର୍ଡ଼ରେ ରଖିଛନ୍ତି। ଓମିକ୍ରନ୍ ଚିହ୍ନଟ ପାଇଁ ସ୍ବାବ୍କୁ ଭୁବନେଶ୍ବର ପଠାଯାଇଛି। ଏହି ଘଟଣା ପ୍ରଚାର ହେବା ପରେ ଭଞ୍ଜନଗରରେ ଆଲୋଡ଼ନ ସୃଷ୍ଟି ହୋଇଛି।