ଆକାଶରୁ ନିଆଁ ବର୍ଷା : ସତର୍କ କରାଇଲା ପାଣିପାଗ ବିଭାଗ, ଟିଟିଲାଗଡ଼ରେ ୪୫ଂ ଛୁଇଁଲା ପାରଦ

ଭୁବନେଶ୍ବର : ପ୍ରବଳ ଖରାରେ ସାରା ଓଡ଼ିଶା ଜଳୁଛି। ଆକାଶରୁ ନିଆଁ ବର୍ଷା ହେଲା ଭଳି ତାତି ହେଉଛି। ପୂର୍ବାହ୍ନ ୧୦ଟା ପରେ ଆକାଶରୁ ନିଆଁ ହୁଳା ଖସି ଦେହରେ ପଡ଼ିଲା ଭଳି ଲୋକ ଅନୁଭବ କରୁଛନ୍ତି। ଆଜି ସାରା ରାଜ୍ୟରେ ଅସହ୍ୟ ଖରା ହୋଇଥିବାବେଳେ ଆଉ ତିନି ଦିନ, ଅର୍ଥାତ୍‌ ୩୦ ତାରିଖ ପର୍ଯ୍ୟନ୍ତ ଏହିଭଳି ଗ୍ରୀଷ୍ମପ୍ରବାହ ଜାରି ରହିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି।

ତିନି ଦିନ ପ୍ରବଳ ଗ୍ରୀଷ୍ମ ପ୍ରବାହ ହେବାକୁ ଥିବାରୁ ପାଣିପାଗ ବିଭାଗ ସତର୍କ ସୂଚନା ଜାରି କରିଛି। ପାଣିପାଗ ବିଭାଗ କହିଛି ଯେ, ଖରା ସାଧାରଣ ଲୋକଙ୍କ ପାଇଁ ସହ୍ୟ ହେଲେ ବି ଶିଶୁ, ବୟସ୍କ ଏବଂ କ୍ରୋନିକ ରୋଗୀ ଖରାକୁ ନବାହାରିବାକୁ କହିଛି। ସାଧାରଣ ଲୋକଙ୍କ ପାଇଁ ଖରା ବେଶୀ ବିପଦଜନକ ନଥିଲେ ବି ଜରୁରୀ କାମ ନଥିଲେ ଲୋକ ଘରୁ ନବାହାରିବାକୁ କୁହାଯାଇଛି। ଏପରିକି ପୂର୍ବାହ୍ନ ୧୦ଟାରୁ ଅପରାହ୍ନ ୪ଟା ଭିତରେ ବାହାରକୁ ଗଲେ ସଙ୍ଗରେ ପାଣିବୋତଲ, ଓଦା ଗାମୁଛା, ଛତା ନେଇ ଯିବାକୁ କୁହାଯାଇଛି।

ବିଶେଷକରି ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମ, ବାଲେଶ୍ବର, ମୟୂରଭଞ୍ଜ, କେନ୍ଦୁଝର, ସୋନପୁର, ବରଗଡ଼, ବଲାଙ୍ଗୀର, ବୌଦ୍ଧ, ନବରଙ୍ଗପୁର ଆଦି ଜିଲ୍ଲାର ଲୋକମାନେ ଅଧିକ ସତର୍କ ରହିବାକୁ କୁହାଯାଇଛି।

ଆଜି ଗୋପାଳପୁର, ପାରାଦୀପ, ପୁରୀକୁ ଛାଡ଼ି ଦେଲେ ସବୁଠି ପାରଦ ଉପରମୁହାଁ ରହିଛି। ଆଜି ୧୪ଟି ସହରରେ ପାରଦ ୪୦ଡିଗ୍ରି ଉପରେ ଥିବାବେଳେ ଟିଟିଲାଗଡ଼ରେ ଚଳିତବର୍ଷର ସର୍ବାଧିକ ତାପମାତ୍ରା ରେକର୍ଡ ହୋଇଛି। ଏଠାରେ ପାରଦ ୪୫ଡିଗ୍ରି ଛୁଇଁଛି। ଗତ କିଛି ଦିନ ହେଲା ୪୩ଡିଗ୍ରି ପାଖାପାଖି ରହୁଥିବା ଟିଟିଲାଗଡ଼ରେ ଆଜି ୪୫ଡିଗ୍ରି ଛୁଇଁବା ପରେ ଏହା ତତଲାଗଡ଼ରେ ପରିଣତ ହୋଇଛି।

କେବଳ ଟିଟିଲାଗଡ଼ ନୁହେଁ ପୂରା ପଶ୍ଚିମ ଓଡ଼ିଶା ଜଳୁଛି। ବଲାଙ୍ଗୀର, ଝାରସୁଗୁଡ଼ା, ସମ୍ବଲପୁର, ସୁନ୍ଦରଗଡ଼, ହୀରାକୁଦ, ଭବାନିପାଟଣା ଓ ସୋନପୁରରେ ପାରଦ ୪୩ଡିଗ୍ରି ଅତିକ୍ରମ କରିଛି। ବଲାଙ୍ଗୀରରେ ଆଜି ୪୩.୫, ସୋନପୁରରେ ୪୩.୨, ‌ଝାରସୁଗୁଡ଼ାରେ ତାତି ୪୩ଡିଗ୍ରି ‌େରକର୍ଡ ହୋଇଛି। ସମ୍ବଲପୁରରେ ୪୨.୭, ସୁନ୍ଦରଗଡ଼ରେ ୪୨, ଭାବନିପାଟଣାରେ ୪୨.୬, ହୀରାକୁଦରେ ୪୨ଡିଗ୍ରି ଛୁଇଁଛି।

କେବଳ ପଶ୍ଚିମ ନୁହେଁ, ଆଭ୍ୟନ୍ତରୀଣ ଓ ଦକ୍ଷିଣ ଓଡ଼ିଶାରେ ବି ପାରଦ ୪୦ଡିଗ୍ରି ଉପରେ ପହଞ୍ଚିଛି। ଆଜି ଆଭ୍ୟନ୍ତରୀଣ ଓଡ଼ିଶାର ଅନୁଗୁଳରେ ୪୨.୭, ତାଳଚେରରେ ୪୩.୩, ଫୁଲବାଣୀରେ ୪୧.୬, କେନ୍ଦୁଝରରେ ୪୦.୩ ଡିଗ୍ରି ରେକର୍ଡ ହୋଇଥିବାବେଳେ ଦକ୍ଷିଣ ଓଡ଼ିଶାର ମାଲକାନଗିରିରେ ୪୨.୫, କୋରାପୁଟରେ ୩୯.୬, ଦାରିଙ୍ଗବାଡ଼ିରେ ୩୮.୫ଡିଗ୍ରି ଛୁଇଁଛି। ଏପରିକି ଉପକୂଳ ଓଡ଼ିଶାର ଭୁବନେଶ୍ବରରେ ୩୯.୪, କଟକରେ ୩୯.୮ ଡିଗ୍ରି ରେକର୍ଡ ହୋଇଥିବାବେଳେ ଉତ୍ତର ଓଡ଼ିଶାର ବାଲେଶ୍ବରରେ ୩୮.୮ ଏବଂ ଚାନ୍ଦବାଲିରେ ୪୦.୭ଡିଗ୍ରି ପାରଦ ଛୁଇଁଛି।

ଅପରପକ୍ଷେ ପାଣିପାଗ ବିଭାଗ କହିଛି ଯେ, ୩୦ତାରିଖ ପର୍ଯ୍ୟନ୍ତ ପାଗ ପରିବର୍ତ୍ତନ ହେବାର ନଥିବାବେଳେ ୨ତାରିଖ ପରଠାରୁ ପାଗ ବଦଳିବ। କିନ୍ତୁ ବଡ଼ ଧରଣର ପରିବର୍ତ୍ତନ ହେବନି। ଗତ ୨୪ଘଣ୍ଟା ମଧ୍ୟରେ କଟକରେ କେବଳ ୭ମିମି କା‌ଳବୈଶାଖୀଜନିତ ବର୍ଷା ହୋଇଥିବାବେଳେ ବାକି ରାଜ୍ୟରେ କେଉଁଠି ବର୍ଷା ପବନ ହୋଇନି।

ହେଲେ ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି ଯେ, ରବିବାର ଓ ସୋମବାର ଭୁବନେଶ୍ବର ସମେତ ଓଡ଼ିଶା ଉପକୂଳରେ ତାତି କମିବ। ଏପରିକି ୩୦ରୁ ‌୪ତାରିଖ ପର୍ଯ୍ୟନ୍ତ ସର୍ବାଧିକ ତାପମାତ୍ରା ୩୬ଡିଗ୍ରି ପାଖାପଖି ରହିବ। କିନ୍ତୁ ପଶ୍ଚିମ ଓଡ଼ିଶାରେ ହେଉଥିବା ତାତି ଓ ଗରମ ଆସନ୍ତା ୨ତାରିଖ ଭିତରେ କମିବାର ନାହିଁ।