ସାଧାରଣରୁ ମଧ୍ୟମ ଧରଣର ରୋଗୀଙ୍କ ପାଇଁ ଅକ୍ସିଜେନ ସହାୟତା ଦରକାର ନାହିଁ: ବିଶେଷଜ୍ଞ ଡାକ୍ତର
ଭୁବନେଶ୍ୱର: କରୋନାର ଦ୍ୱିତୀୟ ଲହରରେ ଅଧିକ ସଂକ୍ରମଣ ହେଉଛି । ଏହା ଫୁସ୍ଫୁସ୍କୁ ମଧ୍ୟ ପ୍ରଭାବିତ କରୁଛି । ସମସ୍ତ ରୋଗୀଙ୍କ ପାଇଁ ଅକ୍ସିଜେନ୍ ସହାୟତା ଆବଶ୍ୟକ ନାହିଁ ବୋଲି ବିଶେଷଜ୍ଞ ଡାକ୍ତର ପରାମର୍ଶ ଦେଇଛନ୍ତି । ରାଜ୍ୟ ସରକାରଙ୍କ କରୋନା ସଂପର୍କିତ ପ୍ରଶ୍ନ- ‘କୋଭିଡ୍ ରୋଗୀଙ୍କ ପାଇଁ ଅକ୍ସିଜେନ ସହାୟତା କେତେ ଆବଶ୍ୟକ’ର ଉତ୍ତରରେ ବିଶେଷଜ୍ଞ ଡାକ୍ତର କହିଛନ୍ତି ଯେ, ସାଧାରଣରୁ ମଧ୍ୟମ ଧରଣର ରୋଗୀଙ୍କ ପାଇଁ ଅକ୍ସିଜେନ ସହାୟତା ଦରକାର ନାହିଁ । ମଧ୍ୟମରୁ ଘନିଷ୍ଠ ଧରଣର ରୋଗୀଙ୍କ ପାଇଁ ଅକ୍ସିଜେନ ସହାୟତା ଦରକାର । ଅକ୍ସିଜେନ କମ ହେଲେ କଥା କହିବାର ଅସୁବିଧା ହେବ । ମୁହଁ ମାଡ଼ି ଶୋଇଲେ ଶରୀର ଭିତରକୁ ଅକ୍ସିଜେନ ସୁବିଧାରେ ଯାଇ ପାରିଥାଏ ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ସରକାରଙ୍କ କୋଭିଡ ସଚେତନତା ସଂପର୍କିତ ସାମ୍ବାଦିକ ସମ୍ମିଳନୀରେ ଶୁକ୍ରବାର ବିଶିଷ୍ଟ ଛାତି ରୋଗ ବିଶେଷଜ୍ଞ ଡାକ୍ତର କ୍ଷୀରୋଦ ରାଉତ କହିଛନ୍ତି, ସବୁ କରୋନା ରୋଗୀଙ୍କୁ ଅକ୍ସିଜେନ ଆବଶ୍ୟକ ନଥାଏ । ଅକ୍ସିଜେନ ମାତ୍ରା ୯୪ରୁ ତଳକୁ ଖସିଲେ ଡାକ୍ତରଙ୍କ ପରାମର୍ଶ ନେବା ଦରକାର । କିନ୍ତୁ ବ୍ୟାୟାମ ମାଧ୍ୟମରେ ମଧ୍ୟ ଅକ୍ସିଜେନ ମାତ୍ରା ବଢ଼ାଇ ଦିଆଯାଇପାରିବ । ପ୍ରୋନିଂ ବା ପେଟ ମାଡ଼ି ଶୋଇବା ଦ୍ୱାରା ଅକ୍ସିଜେନ ମାତ୍ରା ବଢ଼ାଇ ହେବ ।
ବିଶେଷଜ୍ଞ ଡାକ୍ତର ଶ୍ରୀ ରାଉତ କହିଛନ୍ତି ଯେ, ଅକ୍ସିଜେନ ମାପିବା ଲାଗି ଅକ୍ସିମିଟର ବି ସଠିକ ଭାବରେ ଲଗାଇବା ଜରୁରୀ । ଡାହାଣ ହାତ ମଝି ଆଙ୍ଗୁଠିରେ ଅକ୍ସିମିଟର ଲଗାଇଲେ ଭଲ । ଅକ୍ସିମିଟର ଭିତରେ ଆଙ୍ଗୁଠି ଠିକ୍ ଭାବେ ଖାପିବା ଜରୁରୀ । ଆଙ୍ଗୁଠିରେ ନେଲପଲିସ ଲାଗି ନଥିବା ଦରକାର । ସେହିଭଳି ବଙ୍କାତେଢ଼ା ମଧ୍ୟ ହୋଇ ନଥିବା ଉଚିତ । ଅନୁଲୋମ ବିଲୋମ, ଜୋରରେ ନିଶ୍ୱାସ ନେଇ ଛାଡିବା ଦ୍ୱାରା ମଧ୍ୟ ଉପକାର ମିଳିଥାଏ ।