ରାତି ପାହିଲେ ପ୍ରଥମ ପର୍ଯ୍ୟାୟ ଭୋଟ୍: ବୁଥକୁ ଗଲେ ପୋଲିଂ କର୍ମଚାରୀ, ଚାଲିଛି ମତଦାନ ପ୍ରସ୍ତୁତି
ସୁନ୍ଦରଗଡ଼ ଜିଲ୍ଲାର ୪ ବ୍ଲକର ୯ ଜିଲ୍ଲା ପରିଷଦ ଆସନରେ ୪୨ ପ୍ରାର୍ଥୀ
ସୁନ୍ଦରଗଡ଼ : ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ୧୬ ତାରିଖ ବୁଧବାର ପ୍ରଥମ ପର୍ଯ୍ୟାୟ ମତଦାନ ହେବ। ଜିଲ୍ଲାର ବଡ଼ଗାଁ, କୁଆରମୁଣ୍ଡା, ଲାଠିକଟା ଓ ବଣାଇଁଗଡ଼ ବ୍ଲକରେ ମତଦାନ ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି। ୧୫ ତାରିଖ ଅପରାହ୍ନରେ ପ୍ରିଜାଇଡିଂ ଓ ପୋଲିଂ ଅଧିକାରୀ ସମେତ ନିର୍ବାଚନ ପରିଚାଳନାରେ ନିୟୋଜିତ କର୍ମଚାରୀ ବ୍ଲକ୍ କାର୍ଯ୍ୟାଳୟରୁ ବାଲେଟ୍ ବକ୍ସ ଓ ଅନ୍ୟ କାଗଜପତ୍ର ନେଇ ବୁଥରେ ପହଞ୍ଚିଛନ୍ତି। ସେଠାରେ ବାଲେଟ୍ ପେପର୍ ଯାଞ୍ଚ କରିବା ସହ ମତଦାନ କେନ୍ଦ୍ର ପ୍ରସ୍ତୁତିରେ ଶେଷ ସ୍ପର୍ଶ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ବଡ଼ଗାଁ ବ୍ଲକରେ ୯୨ ଜଣ ପ୍ରିଜାଇଡିଂ ଓ ୧୦୩ ଜଣ ପୋଲିଂ ଅଧିକାରୀ ନିୟୋଜିତ ହୋଇଛନ୍ତି। ସେହିପରି କୁଆରମୁଣ୍ଡାରେ ୧୧୫ ପ୍ରିଜାଇଡିଂ ଓ ୧୧୬ ପୋଲିଂ ଅଧିକାରୀ, ଲାଠିକଟାରେ ୬୯ ପ୍ରିଜାଇଡିଂ ଓ ୯୨ ଜଣ ପୋଲିଂ ଅଧିକାରୀ ଓ ବଣାଇଁଗଡ଼ ବ୍ଲକରେ ୧୮୬ ପ୍ରିଜାଇଡିଂ ଓ ୨୦୪ ପୋଲିଂ ଅଧିକାରୀ ନିୟୋଜିତ ହୋଇଛନ୍ତି। ସକାଳ ୭ଟାରୁ ମତଦାନ ଆରମ୍ଭ ହେବ, ଯାହା ଅପରାହ୍ନ ୧ଟା ଯାଏ ଚାଲିବ। ପ୍ରଥମ ପର୍ଯ୍ୟାୟରେ ୪ଟି ବ୍ଲକର ୮୭୩ ବୁଥରେ ୨୮୧୦୬୯ ଭୋଟର ୯ ଜିଲ୍ଲା ପରିଷଦ ଆସନ ପାଇଁ ପ୍ରତିଦ୍ବନ୍ଦ୍ବିତା କରୁଥିବା ୪୨ ପ୍ରାର୍ଥୀ ସମେତ ୱାର୍ଡସଭ୍ୟ, ସରପଞ୍ଚ, ସମିତିସଭ୍ୟ ପ୍ରାର୍ଥୀ ଭାବେ ଲଢ଼ୁଥିବା ୯୬୭ଙ୍କ ଭାଗ୍ୟ ନିର୍ଦ୍ଧାରଣ କରିବେ।