ରାଉରକେଲା: କୋରୋନାକୁ ନେଇ ରାଜ୍ୟରେ ଲକଡାଉନ ଘୋଷଣା କରାଯାଇଥିବା ବେଳେ ସୁନ୍ଦରଗଡ ଜିଲ୍ଲା ନୂଆଗାଁରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ଜିଲ୍ଲାର ଲାଙ୍କୋଇ ଗାଁରେ କୋରୋନା ସନ୍ଦେହକୁ ନେଇ ଜଣେ ଯୁବକ ବିଷ ପିଇ ଆତ୍ମହତ୍ୟା ଉଦ୍ୟମ କରିଛନ୍ତି । ଯୁବକ ଜଣଙ୍କ ଶିଙ୍ଗ୍ରା ମୁଣ୍ଡାରୀ ବୋଲି ଜଣାପଡିଛି । ସେ ଓ ତାର ସାଙ୍ଗ ଚେନ୍ନାଇରେ ରହି କାମ କରୁଥିଲେ l
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଯୁବକ ଜଣକ ବର୍ଷକ ତଳେ ପାଖ ଗାଁର କିଛି ଯୁବକଙ୍କ ସହ ଚେନ୍ନାଇ କାମ କାମ କରିବାକୁ ଯାଇଥିଲେ । କରୋନା ଯୋଗୁଁ ସମଗ୍ର ଭାରତ ଲକଡାଉନ ଘୋଷଣା ହେବା ପୂର୍ବରୁ ସେ ଗତ ୨୦ ତାରିଖରେ ଘରକୁ ଫେରିଥିଲେ । କିନ୍ତୁ ସେ ଘରକୁ ନଯାଇ ନିକଟସ୍ଥ ଲିଣ୍ଡ୍ରା ଗାଁରେ ଥିବା ଜଣେ ସାଙ୍ଗଙ୍କ ଘରେ ୪ ଦିନ ରହିଥିଲେ । ୨୪ ତାରିଖରେ ଲାଙ୍କୋଇସ୍ଥିତ ନିଜ ଘରକୁ ଫେରିଥିଲେ । ତାପରେ ଗାଁ ଲୋକେ ରକ୍ତ ନମୁନା କରିବାକୁ ଶିଙ୍ଗ୍ରାଙ୍କୁ ପରାମର୍ଶ ଦେଇଥିଲେ ।
ସେହିପରି ଗାଁଲୋକେ ସ୍ଥାନୀୟ ଅଙ୍ଗନବାଡ଼ି କର୍ମୀ, ଆଶା ଦିନି ଓ ବିଶ୍ରା ଥାନାକୁ ସଂପୃକ୍ତ ଯୁବକଙ୍କ ସଂପର୍କରେ ସୂଚନା ଦେଇଥିଲେ । ତାପରେ ଯୁବକଙ୍କ ବାପା ମଧ୍ୟ ଶିଙ୍ଗ୍ରାଙ୍କୁ ନମୁନା ପରୀକ୍ଷା କରିବାକୁ ପରାମର୍ଶ ଦେଇଥିଲେ । ଫଳରେ ବାପ ଓ ପୁଅଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏହା ପରେ ଯୁବକ ଜଣକ ୨୫ ତାରିଖ ଅପରାହ୍ନରେ ବିଷ ପିଇ ଦେଇଥିଲେ । ତାଙ୍କୁ ଗୁରୁତର ଅବସ୍ଥାରେ ହାତୀବାରୀ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ଗୁରୁବାର ରାଉରକେଲା ସରକାରୀ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ରିପୋର୍ଟ ଲେଖାଯିବା ବେଳକୁ ଶିଙ୍ଗ୍ରା ମୁଣ୍ଡାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଅଛି ।