ନୂଆଦିଲ୍ଲୀ : ଭାରତୀୟ ସେନା ବିଦ୍ରୋହ କରିବା କଥା ଚିନ୍ତା କରିହେବ ନାହିଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି । ୨୦୧୧-୧୨ରେ ୟୁପିଏ ସରକାରଙ୍କ ଅମଳରେ ଭାରତୀୟ ସେନା ବିଦ୍ରୋହ ଯୋଜନା କରିଥିବା ସଂପର୍କିତ ଘଟଣାକୁ ଲକ୍ଷ୍ୟ କରି ମୋଦି ଏହା କହିଛନ୍ତି । “କିଛି ଦିନ ତଳେ ଖବର ଆସିଥିଲା ଯେ କିପରି ଜଣେ ୟୁପିଏ ମନ୍ତ୍ରୀ ଏପରି ଏକ ମିଛ ଖବରକୁ ପ୍ରଚାର କରିଥିଲେ । ପ୍ରତ୍ୟେକ ଭାରତୀୟ ଜାଣିଛନ୍ତି ଯେ ଭାରତୀୟ ସେନା ଏପରି କାମ କେବେ ହେଲେ କରିବ ନାହିଁ, କିନ୍ତୁ କଂଗ୍ରେସର ଔଦ୍ଧତ୍ୟକୁ ଦେଖନ୍ତୁ” ବୋଲି ମୋଦି କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ୨୦୧୨ ଜାନୁୟାରି ୧୬ ତାରିଖରେ ଏକ ଚିନ୍ତାଜନକ ଖବର କେତେକ ଗଣମାଧ୍ୟମରେ ପ୍ରକାଶ ପାଇଥିଲା। ଖବରଟି ଥିଲା ଯେ, ଭାରତୀୟ ସେନାର ଦୁଇଟି ୟୁନିଟ ରାଜଧାନୀ ଦିଲ୍ଲୀଆଡକୁ ଅଗ୍ରସର ହେଉଛନ୍ତି। ଲକ୍ଷ୍ୟ ସରକାରଙ୍କୁ ପଦଚ୍ୟୁତ କରି ସେନା ଶାସନ ଚଳାଇବା। ପାକସ୍ତାନରେ ଏପରି ଘଟଣା ସାଧାରଣ ହୋଇଥିଲେ ମଧ୍ୟ ଭାରତରେ ଏପରି କେବେ ହୋଇନାହିଁ। ଏଣୁ ଏପରି ରିପୋର୍ଟ ଆସିବା ପରେ ସମସ୍ତେ ଛାନିଆ ହୋଇଯାଇଥିଲେ। ସେତେବେଳେ ତତକାଳୀନ ସେନାମୁଖ୍ୟ ଜେନେରାଲ ଭି.କେ.ସିଂ ଙ୍କ ସହ ସରକାରଙ୍କର ଏକ ବିବାଦ ଚାଲିଥିବାରୁ ଏହି ଘଟଣା ଅସ୍ୱାଭାବିକ ନୁହେଁ ବୋଲି ସମସ୍ତେ ମନେ କରୁଥିଲେ। କିନ୍ତୁ ଏହି ଖବର ସମ୍ପୂର୍ଣ୍ଣ ମନଗଢା ଓ ମିଛ ଥିଲା ବୋଲି ଏବେ ଜଣାପଡିଛି।
ୟୁପିଏ ସରକାରଙ୍କ କେତେଜଣ କ୍ୟାବିନେଟ ମନ୍ତ୍ରୀଙ୍କ ଇଶାରାରେ କେତେକ ସାମ୍ବାଦିକ ଏହି ଖବର ପରିବେଷଣ କରିଥିବା ଜଣାଯାଇଛି। ଉଦ୍ଦେଶ୍ୟ ଥିଲା ଭାରତୀୟ ସେନାକୁ ଓ ତତକାଳୀନ ସେନାମୁଖ୍ୟ ଜେନେରାଲ ଭି.କେ.ସିଂଙ୍କୁ ବଦନାମ କରିବା । ଏହା ଜଣାପଡିବା ପରେ ଏବେ ବିଜେପି କଂଗ୍ରେସକୁ ଟର୍ଗେଟ କରିଛି। ଏ ସଂପର୍କରେ ରାହୁଲ ଗାନ୍ଧି ଜବାବ ଦିଅନ୍ତୁ ବୋଲି ବିଜେପି ଦାବି କରିଛି।