ଦିଲ୍ଲୀ ସରକାର ଆଣୁଛନ୍ତି ନୂଆ ନିୟମ: କ୍ୟାବ ବୁକିଂ ପରେ ଯଦି ଗାଡ଼ି ନ ଆସେ ତେବେ ୨୫,୦୦୦ ଟଙ୍କାର ତଣ୍ଡ ଗଣିବେ ଓଲା/ଉବେର୍ ଭଳି କମ୍ପାନି
ନୂଆଦିଲ୍ଲୀ : ଯଦି ଆପଣ ମୋବାଇଲ ଆପ ଜରିଆରେ କ୍ୟାବ୍ ବୁକ୍ କରିଛନ୍ତି ଏବଂ ଶେଷ ମୁହୂର୍ତରେ ହିଁ କ୍ୟାବ୍ ଡ୍ରାଇବର ଆସିବାକୁ ମନା କରିଦିଏ ତେବେ ଏଥିପାଇଁ କ୍ୟାବ୍ କଂପାନି ଆପଣଙ୍କୁ କ୍ଷତିପୂରଣ ଦେବ । ପୁଣି କୌଣସି ଛୋଟ ପରିମାଣ ନୁହେଁ, କ୍ଷତିପୂରଣ ଦେବ ୨୫ ହଜାର ଟଙ୍କା । ତେବେ ଏଭଳି ଏକ ନିୟମ ଖୁବ୍ ଶୀଘ୍ର କାର୍ଯ୍ୟକାରୀ କରିବାକୁ ଯାଉଛନ୍ତି ଦିଲ୍ଲୀ ସରକାର । ଏହି ନୂଆ ନିୟମ ଅନୁସାରେ, ଡ୍ରାଇଭରର ଅବହେଳା ଲାଗି କ୍ୟାବ୍ କଂପାନି ବିରୋଧରେ ଅଭିଯୋଗ ହେଲେ ୨୫ ହଜାର ଟଙ୍କାର ଜରିମାନା ଲାଗୁ କରାଯିବ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଦିଲ୍ଲୀ ସରକାର ଲାଇସେନ୍ସିଂ ଆଣ୍ଡ ରେଗୁଲେସନ ଆପ୍ ବେସଡ ଏଗ୍ରିଗେଟର ରୁଲ ୨୦୧୭ ଏବଂ ସିଟି ଟ୍ୟାକ୍ସି ସ୍କିମ୍ ୨୦୧୭ ପ୍ରସ୍ତୁତ କରୁଛନ୍ତି। କ୍ୟାବିନେଟ ମୋହର ଲାଗିବା ପରେ ଏହି ନିୟମ ଲାଗୁ କରିଦିଆଯିବ । ନୂଆ ନୀତି ଅନୁସାରେ, ଯଦି କୌଣସି ଯାତ୍ରୀ ଦୁର୍ବ୍ୟବହାର କିମ୍ବା ଡ୍ରାଇଭରର ଖରାପ ବ୍ୟବହାର ନେଇ ଅଭିଯୋଗ କରନ୍ତି ତେବେ ତାଙ୍କ ଅଭିଯୋଗକୁ ଏଗ୍ରିଗେଟରଙ୍କୁ ପୁଲିସରେ ଦାଖଲ କରିବାକୁ ପଡିବ । ଯଦି ସେ ଏଭଳି କରିବାରେ ଅସଫଳ ହୁଅନ୍ତି ତେବେ ତାଙ୍କ ଉପରେ ୧ ଲକ୍ଷ ଟଙ୍କାର ଜରିମାନା ଲାଗିବ ।
ପରିବହନ ବିଭାଗର ଜଣେ ବରିଷ୍ଠ ଅଧିକାରୀଙ୍କ ସୂଚନା ମୁତାବକ, ଗୋଟି ଏ ସ୍ଥାନରୁ ଅନ୍ୟ ଏକ ସ୍ଥାନକୁ ନେବା ଆଣିବା ପାଇଁ କ୍ୟାବ୍ ସର୍ଭିସ ଏକ ବହୁତ ଭଲ ମାଧ୍ୟମ। ଏଭଳି ପରିସ୍ଥିତିରେ କ୍ୟାବ୍ ସର୍ଭିସର ପରିଚାଳନା ପାଇଁ ଏକ ନିୟମ ପ୍ରସ୍ତୁତ କରାଯିବା ମଧ୍ୟ ବହୁତ ଜରୁରୀ । ଏହି ନିୟମ ଲାଗୁ ହୋଇଗଲେ , ଆପ ଜରିଆରେ କ୍ୟାବ ଚଳାଉଥିବା କଂପାନୀମାନଙ୍କୁ ଦିଲ୍ଲୀରେ ବ୍ୟବସାୟ କରିବା ପାଇଁ ପରିବହନ ବିଭାଗରୁ ଲାଇସେନ୍ସ ନେବାକୁ ପଡିବ । କ୍ୟାବ୍ କଂପାନିମାନଙ୍କୁ ଏକ ୨୪ ଘଣ୍ଟିଆ କଲ ସେଣ୍ଟର ଖୋଲିବାକୁ ପଡିବ । ଆଉ ସମସ୍ତ କ୍ୟାବ୍ ଲାଇଭ ଜିପିଏସ ଡାଟା ପରିବହନ ବିଭାଗର କଣ୍ଟ୍ରୋଲ୍ ସେଣ୍ଟର ସହ ସଂଯୋଗ କରିବାକୁ ପଡିବ। ନୂଆ କ୍ୟାବ ନୀତି ଦ୍ୱାରା ଯାତ୍ରୀମାନଙ୍କର ଉଭୟ ଡାଟା ଏବଂ ଯାତ୍ରା ସୁରକ୍ଷିତ ତଥା ସୁଖମୟ ହେବ । ନୂଆ ନୀତି ମୁତାବକ, ପ୍ରତ୍ୟେକ ଗାଡିରେ ଗୋଟିଏ ପ୍ୟାନିକ ବଟନ ମଧ୍ୟ ରହିବ, ଯାହା ଯାତ୍ରୀଙ୍କ ସୁରକ୍ଷା ପାଇଁ କାମ କରିବ ।
ନୂଆ ନୀତି ଦ୍ୱାରା ଏଗ୍ରିଗେଟରଙ୍କୁ ଏକ ନୂଆ ଫିଚର ମଧ୍ୟ ଯୋଡିବାକୁ ପଡିବ । ଯେଉଁଥିରେ ଯାତ୍ରୀ ନିଜ ଲୋକେସନ ଏବଂ କ୍ୟାବର ସୂଚନା ଆପ ଜରିଆରେ ଅତି କମରେ ୨ ଜଣଙ୍କୁ ପଠାଇ ପାରିବେ ।