ହାଇକୋର୍ଟଙ୍କ ନିର୍ଦ୍ଦେଶ: ୧୦ ସୁଦ୍ଧା ତପସ୍ବିନୀଙ୍କୁ ୧୭ ହଜାର ଟଙ୍କା ଦେବେ ସୁମିତ୍
କଟକ: ଆସନ୍ତା ଫେବ୍ରୁଆରି ୧୦ ତାରିଖ ସୁଦ୍ଧା ପତ୍ନୀ ତପସ୍ବିନୀଙ୍କୁ ୧୭ ହଜାର ଟଙ୍କା ଦେବାକୁ ହାଇକୋର୍ଟ ଆଜି ଡାକ୍ତର ସୁମିତ୍ କୁମାର ସାହୁଙ୍କୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ ସଂଜୀବ କୁମାର ପାଣିଗ୍ରାହୀଙ୍କୁ ନେଇ ଗଠିତ ଖଣ୍ଡପୀଠ ସୁମିତଙ୍କ ଆବେଦନର ଶୁଣାଣି କରି ଏପରି ନିର୍ଦ୍ଦେଶ ଦେଇଛନ୍ତି। ଏଥିସହିତ, ଏ ସମ୍ପର୍କରେ ଗଞ୍ଜାମ ଜିଲ୍ଲା ଓ ଦୌରାଜଜ୍ ଅଦାଲତଙ୍କ ରାୟକୁ ଖଣ୍ଡପୀଠ କାଏମ ରଖିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗତ ଜାନୁଆରି ୪ରେ ଗଞ୍ଜାମ ଜିଲ୍ଲା ଓ ଦୌରାଜଜ୍ ଅଦାଲତ ବ୍ରହ୍ମାନଗରସ୍ଥିତ ଶ୍ବଶୁରଘରେ ତପସ୍ବିନୀ ରହିବେ ବୋଲି ନିର୍ଦ୍ଦେଶ ଦେଇଥିଲେ। ଏଥିସହିତ ପ୍ରତିମାସ ୧୦ ତାରିଖ ସୁଦ୍ଧା ତପସ୍ବିନୀଙ୍କୁ ୧୭ ହଜାର ଟଙ୍କା ଭରଣପୋଷଣ ବାବଦରେ ସୁମିତ ପ୍ରଦାନ କରିବେ ବୋଲି କହିଥିଲେ। ତପସ୍ବିନୀଙ୍କ ପ୍ରତି କୌଣସି ପ୍ରକାର ଘରୋଇ ହିଂସା ଆଚରଣ ଯେପରି ନ ହେବ, ତାହା ସୁନିଶ୍ଚିତ କରିବାକୁ ଅଦାଲତ କଡ଼ା ନିର୍ଦ୍ଦେଶ ପ୍ରଦାନ କରିଥିଲେ। ଜିଲ୍ଲା ଓ ଦୌରାଜଜ୍ ଅଦାଲତ ପ୍ରଦାନ କରିଥିବା ରାୟକୁ ଚାଲେଞ୍ଜ କରି ସୁମିତ ଗତ ଜାନୁଆରି ୧୧ରେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଜିଲ୍ଲା ଅଦାଲତଙ୍କ ରାୟ ଗ୍ରହଣୀୟ ନୁହେଁ ଓ ଏହାକୁ ରଦ୍ଦ କରାଯାଉ ବୋଲି ଦର୍ଶାଇ ଏହି ମାମଲା ସେ ଦାୟର କରିଥିଲେ। ଆଜି ଏହି ମାମଲାର ଶୁଣାଣି କରାଯାଇଥିଲା। ନିମ୍ନ ଅଦାଲତଙ୍କ ରାୟ ବିରୋଧରେ ତପସ୍ବିନୀଙ୍କ ତରଫରୁ ଆଇନଜୀବୀ ମାନସ ଚାନ୍ଦ ଉପସ୍ଥିତ ରହି ପକ୍ଷ ରଖିଥିଲେ। ହାଇକୋର୍ଟ ସୁମିତ ଓ ତପସ୍ବିନୀଙ୍କ ଓକିଲଙ୍କ ଯୁକ୍ତି ଶୁଣିବାପରେ ଜିଲ୍ଲା ଓ ଦୌରା ଜଜ୍ ଧାର୍ଯ୍ୟ କରିଥିବା ମଧ୍ୟବର୍ତ୍ତୀକାଳୀନ ଭରଣପୋଷଣ ବାବଦ ୧୭ ହଜାର ଟଙ୍କା ଫେବ୍ରୁଆରି ୧୦ ଭିତରେ ତପସ୍ବିନୀଙ୍କୁ ପ୍ରଦାନ ପାଇଁ ନିର୍ଦ୍ଦେଶ ଦେଇଛନ୍ତି। ଏଥିସହିତ ଗଞ୍ଜାମ ଜିଲ୍ଲା ଓ ଦୌରାଜଜ ଅଦାଲତଙ୍କ ୨୦୨୨, ଜାନୁଆରି ୪ ନିର୍ଦ୍ଦେଶ ବିରୋଧରେ ସୁମିତ ଦାୟର କରିଥିବା ଆବେଦନର ପରବର୍ତ୍ତୀ ଶୁଣାଣି ଫେବ୍ରୁଆରି ୧୫ରେ କରାଯିବା ପାଇଁ ଧାର୍ଯ୍ୟ କରାଯାଇଛି। ସୁମିତଙ୍କ ତରଫରୁ ଆଇନଜୀବୀ ବ୍ୟୋମକେଶ ତ୍ରିପାଠୀ ମାମଲା ପରିଚାଳନା କରୁଛନ୍ତି।