ମନରେଗା ଯୋଜନାର ପ୍ରକଳ୍ପକୁ ଅନ୍ୟ ସହଯୋଗୀ ବିଭାଗର ଅଣଦେଖା
ଖୋର୍ଦ୍ଧା: ଜାତୀୟ ଗ୍ରାମୀଣ ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା (ମନରେଗା) ପଂଚାୟତରାଜ ବିଭାଗର ଏକ ଗୁରୁତ୍ୱପୂର୍ଣ୍ଣ ଯୋଜନା । କୋଭିଡ ମହାମାରୀ ସମୟରେ ସହରରୁ ଗାଁକୁ ଫେରିଥିବା ବେକାର ପ୍ରବାସୀ ଶ୍ରମିକଙ୍କୁ ଏହି ଯୋଜନାରେ କର୍ମ ସଂସ୍ଥାନ ମିଳିଥିଲା । ତେବେ ଏହି ଯୋଜନାରେ ଅନୁଦିତ କାର୍ଯ୍ୟର ସମ୍ପାଦନ ପ୍ରତି ପଂଚାୟତ ଓ ପଂଚାୟତ ସମିତି (ବ୍ଲକ) ଯେଭଳି ଆଗ୍ରହ ଦେଖାଉଛନ୍ତି ଅନ୍ୟ ସହଯୋଗୀ ବିଭାଗ ନିକଟରେ ସେଭଳି ଆଗ୍ରହ ଦେଖିବାକୁ ମିଳୁନାହିଁ । ମନରେଗା ଯୋଜନାରୁ ଅର୍ଥ ଆଣି କାର୍ଯ୍ୟାନ୍ୱୟନ କରୁଥିବା ଅନ୍ୟ ବିଭାଗ କେବଳ ୨୦ରୁ ୩୦ ପ୍ରତିଶତ ହିଁ ଶେଷ କରିପାରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମନରେଗା ଯୋଜନାରେ ପଂଚାୟତିରାଜ ବିଭାଗ ପ୍ରମୁଖ କାର୍ଯ୍ୟାନ୍ୱୟନ ସଂସ୍ଥା ହୋଇଥିଲେ ମଧ୍ୟ ବନ ବିଭାଗ, ଗ୍ରାମ୍ୟ ଉନ୍ନୟନ, ରୁରାଲ୍ ୱାର୍କସ୍, କୃଷି, ଉଦ୍ୟାନ, କ୍ଷୁଦ୍ର ଜଳସେଚନ ଆଦି ଅନ୍ୟ ସରକାରୀ ବିଭାଗ ଏହି ଯୋଜନାରେ ଅନୁଦିତ ପ୍ରକଳ୍ପର କାର୍ଯ୍ୟ କରିଥାନ୍ତି । କିନ୍ତୁ ଯୋଜନାର ଅନୁଦିତ ପ୍ରକଳ୍ପଗୁଡ଼ିକୁ ଶେଷ କରିବାରେ ପଂଚାୟତ ଓ ବ୍ଲକ ଯେଭଳି ଆଗ୍ରହ ଦେଖାଉଛନ୍ତି ସେଭଳି ଆଗ୍ରହ ଅନ୍ୟ ସହଯୋଗୀ ସଂସ୍ଥା ନିକଟରେ ଦେଖିବାକୁ ମିଳୁନାହିଁ ।
ପଂଚାୟତିରାଜ ବିଭାଗ ପକ୍ଷରୁ ମିଳିଥିବା ସୂଚନାନୁସାରେ, ଖୋର୍ଦ୍ଧା ଜିଲ୍ଲାରେ, ୨୦୧୯-୨୦ ଆର୍ଥିକ ବର୍ଷରେ ମୋଟ ୧୦୭୬ଟି ମନରେଗା ପ୍ରକଳ୍ପ ଶେଷ ହେବା ତ ଦୂରର କଥା ଆରମ୍ଭ ମଧ୍ୟ ହୋଇପାରିନଥିଲା ।, ୨୦୨୦-୨୧ରେ ଏଭଳି ପ୍ରକଳ୍ପର ସଂଖ୍ୟା ୫୦୫୮ ଥିବା ବେଳେ ୨୦୨୧-୨୨ରେ ଏହା ୩୪୬୧ ରହିଥିଲା । ଏଭଳି ତିନି ବର୍ଷରେ ଅନୁଦାନ ପାଇ ଆରମ୍ଭ ହୋଇପାରିନଥିବା ପ୍ରକଳ୍ପ ସଂଖ୍ୟା ୯୫୯୫ ଅଟେ । ଚଳିତ (୨୦୨୨-୨୩) ଆର୍ଥିକ ବର୍ଷରେ ୧୨୩୩ଟି ନୂତନ ପ୍ରକଳ୍ପ ପାଇଁ ଅନୁଦାନ ମିଳିଛି । ୪ ବର୍ଷରେ ମୋଟ ୧୦,୮୨୮ଟି ପ୍ରକଳ୍ପ ମଧ୍ୟରୁ ଚଳିତ ବର୍ଷ ୬୫୭ଟି ପ୍ରକଳ୍ପ କାମ ହାତକୁ ନିଆଯାଇଛି । କିନ୍ତୁ ଚଳିତ ଆର୍ଥିକ ବର୍ଷର ୪ ମାସ ବିତିଯାଇଥିବା ବେଳେ କେବଳ ଗୋଟିଏ ପ୍ରକଳ୍ପ ହିଁ ଶେଷ ହୋଇଛି । ଏ ହେଲା ଖୋର୍ଦ୍ଧା ଜିଲ୍ଲାର ମନରେଗା ପ୍ରକଳ୍ପର ସାମଗ୍ରିକ ସ୍ଥିତି । ଯଦି ପ୍ରକଳ୍ପର କାର୍ଯ୍ୟାନ୍ୱୟନ କରୁଥିବା ସରକାରୀ ସଂସ୍ଥାର ଦକ୍ଷତାର ଅନୁଶୀଳନ କରାଯାଏ ତେବେ ପଂଚାୟତ ଓ ବ୍ଲକ ତୁଳନାରେ ଅନ୍ୟ ସରକାରୀ ବିଭାଗଗୁଡ଼ିକର ସ୍ଥିତି ନୈରାଶ୍ୟଜନକ ଅଟେ ।
ଚଳିତ ଆର୍ଥିକ ବର୍ଷରେ, ଗ୍ରାମ ପଂଚାୟତସ୍ତରରେ, ୭୧୫୫ଟି ପ୍ରକଳ୍ପ ପଂଚାୟତକୁ ଓ ୩୧୬ଟି ପ୍ରକଳ୍ପ ଅନ୍ୟ ବିଭାଗକୁ ଦିଆଯାଇଛି । ସେହିଭଳି ବ୍ଲକସ୍ତରରେ, ବ୍ଲକକୁ ୬୫୧ଟି ପ୍ରକଳ୍ପ ଓ ୨୨୫୭ଟି ପ୍ରକଳ୍ପ ଅନ୍ୟ ବିଭାଗକୁ ଦିଆଯାଇଛି । ଚଳିତ ଆର୍ଥିକ ବର୍ଷରେ ବର୍ତମାନ ସୁଦ୍ଧା କୌଣସି କାର୍ଯ୍ୟ ଜିଲ୍ଲା ପରିଷଦକୁ ଦିଆଯାଇନାହିଁ । ଗ୍ରାମପଂଚାୟତସ୍ତରରେ ପଂଚାୟତକୁ ଦିଆଯାଇଥିବା ମୋଟ ୭୧୫୫ଟି ପ୍ରକଳ୍ପ ମଧ୍ୟରୁ ୬୮.୯୪ ପ୍ରତିଶତ କାର୍ଯ୍ୟ ଆରମ୍ଭ ହୋଇସାରିଥିବା ବେଳେ ଅନ୍ୟ ବିଭାଗକୁ ଦିଆଯାଇଥିବା ପ୍ରକଳ୍ପଗୁଡ଼ିକ ମଧ୍ୟରୁ ୩୨ ପ୍ରତିଶତ ହିଁ କାମ ଆରମ୍ଭ ହୋଇପାରିଛି ।