ଚଣ୍ଡୀଗଡ଼: ପଞ୍ଜାବୀ ଗାୟକ ସିଦ୍ଧୁ ମୋସେୱାଲାଙ୍କ ପିତା-ମାତା ଏବଂ ବଲିଉଡ ଅଭିନେତା ସଲମାନ ଖାନଙ୍କୁ ହତ୍ୟା ଧମକ ମିଳିଛି | ଏପ୍ରିଲ ୨୫ ପୂର୍ବରୁ ସେମାନଙ୍କୁ ହତ୍ୟା କରିବାକୁ ଧମକ ଦିଆଯାଇଛି। ସିଦ୍ଧୁ ମୁସେୱାଲାଙ୍କ ପରିବାର ଏ ବାବଦରେ ପୁଲିସ ନିକଟରେ ଅଭିଯୋଗ କରିଛନ୍ତି। ସୂତ୍ରରୁ ଏହା ଜଣାପଡିଛି ଯେ ରାଜସ୍ଥାନର ଯୋଧପୁର ସହରରୁ ଏହି ଫୋନ କଲ ଆସିଥିବାବେଳେ ଧମକ ଦେଇଥିବା ଯୁବକଙ୍କୁ ଧରିବାକୁ ଏବେ ମାନସା ପୁଲିସ ରାଜସ୍ଥାନରେ ଚଢ଼ାଉ କରିଛି | ଉଲ୍ଲେଖନୀୟ କଥା ହେଉଛି, ପଞ୍ଜାବର ମାନସାଠାରେ ମେ ୨୯, ୨୦୨୨ରେ ସିଦ୍ଧୁ ମୁସେୱାଲାଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ମାମଲାର ଅନୁସନ୍ଧାନ ବେଳେ ଦିଲ୍ଲୀ ପୁଲିସର ସ୍ପେଶାଲ୍ ସେଲ୍ ଜାଣିବାକୁ ପାଇଥିଲା ଯେ ଗୋଲ୍ଡି ବ୍ରା-ଲରେନ୍ସ ବିଷ୍ଣୋଇ ଗ୍ୟାଙ୍ଗ ସିଦ୍ଧୁ ମୁସେୱାଲାଙ୍କୁ ହତ୍ୟା କରିଥିଲା ।
Sambad is now on WhatsApp
Join and get latest news updates delivered to you via WhatsApp
ସିଦ୍ଧୁଙ୍କ ହତ୍ୟା ପୂର୍ବରୁ ବଲିଉଡ ଅଭିନେତା ସଲମାନ ଖାନଙ୍କୁ ମଧ୍ୟ ହତ୍ୟା କରିବାର ଯୋଜନା ଥିଲା। ସୂତ୍ରରୁ ଜଣାପଡିଥିଲା ଯେ ଗୋଲ୍ଡି ବ୍ରାର୍-ଲରେନ୍ସ ବିଷ୍ଣୋଇ ଗ୍ୟାଙ୍ଗର ସାର୍ପସୁଟର କପିଲ ପଣ୍ଡିତ ଏହି ସମ୍ପୂର୍ଣ୍ଣ ଅପରେସନ୍ ପରିଚାଳନା କରୁଥିଲା। ପଣ୍ଡିତକୁ ନେପାଳ ସୀମାରୁ ଗିରଫ କରାଯାଇଥିଲା। ଏହି ଯୋଜନା କାର୍ଯ୍ୟକାରୀ କରିବା ପାଇଁ ସେ ମୁମ୍ବାଇର ପନଭେଲ ଅଞ୍ଚଳରେ ଏକ ଭଡା ଘର ନେଇଥିବା ଜଣାପଡିଥିଲା । ପନଭେଲରେ ସଲମାନ ଖାନଙ୍କର ଏକ ଫାର୍ମ ହାଉସ ଅଛି | କପିଲ ପଣ୍ଡିତ ସହ ସନ୍ତୋଷ ଯାଦବ ଓ ଆଉ କିଛି ଅଭିଯୁକ୍ତ ଅସ୍ତ୍ରଶସ୍ତ୍ରକୁ ସେମାନେ ଭଡା ନେଇଥିବା ଘରେ ରଖିଥିଲେ। ତେବେ ଏହା ବିଫଳ ହୋଇଥିଲା |