ଜିଏସଟି ହ୍ରାସର ଲାଭ ସାଧାରଣ ଖାଉଟିଙ୍କ ନିକଟରେ ପହଞ୍ଚାଇବାକୁ ମୋଦିଙ୍କ ନିର୍ଦ୍ଦେଶ
ନୂଆଦିଲ୍ଲୀ: ଜିଏସଟିର ସୁଫଳ ଯେପରି ସାଧାରଣ ଲୋକଙ୍କ ପାଖରେ ପହଞ୍ଚେ ତାହା ନିଶ୍ଚିତ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଖାଉଟି ବ୍ୟାପାର ମନ୍ତ୍ରଣାଳୟକୁ ନିର୍ଦ୍ଦେଶ ଦେଇଛନ୍ତି । ସରକାର ଜିଏସଟି ହାରକୁ କମାଇବା ସତ୍ତ୍ୱେ କେତେକ ବ୍ୟବସାୟ ପ୍ରତିଷ୍ଠାନ, ହୋଟେଲ ଓ ରେସ୍ତୋରାଁ ତାହାର ଲାଭ ଖାଉଟିଙ୍କୁ ଦେଉ ନ ଥିବା ଅଭିଯୋଗ ଆସିବା ପରେ ପ୍ରଧାନମନ୍ତ୍ରୀ ଏହି ନିର୍ଦ୍ଦେଶ ଦେଇଛନ୍ତି । ଗତ ସପ୍ତାହରେ ଅନୁଷ୍ଠିତ ବିଭିନ୍ନ ରାଜ୍ୟର ମୁଖ୍ୟଶାସନ ସଚିବ ଓ ସଚିବମାନଙ୍କ ସହ ମାସିକ େଓ୍ଵବ ଭିତ୍ତିକ ସମୀକ୍ଷା ବୈଠକରେ ମୋଦି ଏହି ନିର୍ଦ୍ଦେଶ ଦେଇଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଜିଏସଟି କାଉନ୍ସିଲର ସୁପାରିଶ କ୍ରମେ ସରକାର ଗତ ୧୮ ତାରିଖରେ ୧୭୮ଟି ସାମଗ୍ରୀ ଉପରେ ଜିଏସଟି ହାରକୁ ୨୮ ପ୍ରତିଶତରୁ ହ୍ରାସ କରି ୧୮ ପ୍ରତିଶତ କରିଥିଲେ । ଏହା ସହିତ ଏସି ଓ ନନ୍-ଏସି ସବୁ ରେସ୍ତୋରାଁ ଉପରେ ସମାନ ଭାବରେ ୫ ପ୍ରତିଶତ ଜିଏସଟି ଲାଗୁ କରାଯାଇଥିଲା ।
ସରକାରଙ୍କ ଏହି ନିଷ୍ପତ୍ତି ପରେ କେନ୍ଦ୍ର ଖାଉଟି ବ୍ୟାପାର ମନ୍ତ୍ରଣାଳୟ ପକ୍ଷରୁ ରାଜ୍ୟ ସରକାରମାନଙ୍କୁ ଏକ ସର୍କୁଲାର ଜାରି କରାଯାଇ ସବୁ ପ୍ୟାକେଜଡ୍ ସାମଗ୍ରୀରେ ଯେପରି ଏହି ହ୍ରାସ ପାଇଥିବା ଜିଏସଟି ମୂଲ୍ୟ ଲେଖା ରହେ ତାହା ନିଶ୍ଚିତ କରିବାକୁ କୁହାଯାଇଥିଲା ।
ଅନ୍ୟପକ୍ଷରେ ଜିଏସଟି ସମ୍ପର୍କିତ ଅଭିଯୋଗର ଶୁଣାଣି ପାଇଁ ସରକାରଙ୍କ ପକ୍ଷରୁ ଏକ ଆଣ୍ଟି-ପ୍ରଫିଟରିଂ ବା ଲାଭଖୋର ନିରୋଧୀ ସଂସ୍ଥା ଗଠନ କରାଯାଇଥିଲା ।